ZIRLAITE KA ZIR A

Zirlai nih lai khan van­tlangin zirlaite min hmuh dan kha kan hre fuh lo fo em ni aw ka ti ta. Zirlai nih lai chuan nakina engemaw tak la ni tur, sorkar babu lal tak emaw, politician thei ve tak tur emaw kan inti chawk a; mi tlemte zawng an ni ngei reng e. 

Tlemlai deuh khan University zirlaite leh trucker te kan inhmu thiam lo deuh a, kawng inchuhin kan thu a inhmu lo va. Facebook group lamah te khan kan chhang, chhang leh, chhang leh te pawh rual lo khan huaisar tak tak maiin, "zak rawh..." te min rawn ti bawih bawih mai a. Minister-in a pisa-ah min ko khawm alawm mawle. Zirlai hruaitu inthlan kha a hnai deuh bawk nen, kan zirlai hruaitute kha an thawm a na khawp mai a. Zoṭawng hrethiam vek kalkhawm zingah khan sapṭawnga han ti hram pawl, thiam ziktluak chiah si lo te kha kan awm a. Sapṭawnga ṭawng hun te chu a awm nameuh ngai a, a ngaithlatute tana a fiah zawk dawnin. 

Pakhat rawn ding phei kha chuan Minister kha, "I dinhmun anga kan din hun te pawh hi a la awm ang a," te kha a ti ta zet zet mai a. Ka sira ṭhu MCS leh MPS te kha an nui teuh teuhin ka zu hmu a, kei tak pawh kha ka nui ru hmãwn hmãwn a. Zirlai hruaitu nih hi hringnun zinkawnga pumpelh hnaivai nge ni ang a, Aesop-a thawnthu-a nula bawnghnute bel chhip­chhuan zawk kha tih te ka ngaihtuah nasa fe. 

Tun laiin kan khua-ah zirlai exam tur denchhenin Badminton Club chuan an inkhelh an titawp tih thawm ka hria a, ho ka ti lehpek. Zirlai chuan an zirlai an zir mai hi an chanvo a ni a, an zir thiang. Inkhel mi chuan inkhelh kha dik taka a chanvo a ni a, a inkhel thiang. Mi lehkha zir ṭha hle hle kiangah a va inkhel pawh ni lo, zirlai lahin mi inkhelhna takah a va zir pawh ni lo, a inkalh lo khawpin ka lo hria a. 

Hmanah kan khua-ah Pu Zaphunga a awm a, kan Hawaiian Guitarist neih­chhun a ni. Kan khaw awi hian zantin maiin a ṭingṭang a nawt a, sound amplifier hmang khan min chheu ṭhin a. Zan thla enga a ṭingṭang nawt ri chu mitin beng fah a ni. Chu guitarist thih ni chuan a khawnawtin kan sûn a, khawhar inriak tlangvalin an ina leng lo mutbu an keuh a. 

A damlai khan zirlai exam hnai chhuanlamin a ṭingṭang nawt lo tura ngen tumna thawm ka hria a, ka awih zawng a ni awzawng lo mai a. A tan chuan ṭingṭang nawh kha vantlang tana a mimal hnatlang a ni a, a public service liau liau a ni. Hawrawppuiin a hming a ziak ve thei ṭawk ṭawk a ni maithei, zirlai exam a lungkham ve lo. 

Khaw tam takah zirlai exam kan engto a, a khaw­tlangin kan buaipui luai luai a, a ṭha e. Mahse kum tam tak kan buaipui zirlai te kha khawnge an awm... kan khawtlang tana an belhfakawmna chu khaw'nge...? Zirlai hma-a thu sawi nazawng hian, "Nangni zirlai te hi kan ram hmachhuan, kan hruaitu turte in ni a..." te hi an ti thlazen a, tih tawh loh tawp tur niin ka hria. Mimawlah a thawk na a, an mawl kan tihluhlâng mai mai a ni. 

Zirlai naupang, an zir thiam tuma bei ngar ngar hi zawng, engmah hian an thiam a dál lo va, kan vensak ngar ngar te bawk hi a ni hlawh­chham leh nge nge ṭhin.