Roreltute thu kan awih vek ang em?

Tirhkoh Paula’n Rom 13:1-7 ah rorel­tute thu kan awih tur a nih thu min hrilh a. Kan ram hruaitute leh roretute an dik tawk loh pawha an rorelna hnuaia kun tawp mai tura ngaihna hi kristiante zingah tam tak kan awm awm e. 

Chuti ang a roreltu ṭha lote pawhin he lai Bible chang hi thur chhuakin ṭanchhanah an hmang fo ṭhin. Tirhkoh Paula hian hetih hun laia Rom khua a mite hnena an chunga rolreltute thu awih tura a hrilhna chhan hi kan zirchian erawh chuan roreltu ṭha lo leh sual takte thu a kawi a ngila zawm ngawt tur kan ni lo tih kan inhre thei awm e. 

Paula hian Rom khua mite hnena lehkha a thawn hun lai hi kum AD 85 vel niin Bible zirmi te chuan an ngai deuh ber a. Kan hriat angin Paula hian kan Bible Thuthlung Tharah hian lehkhathawn 13 zet mai a nei a. Rawngbawla zin­chhuakin hmun hrang hrang a tlawh a; lehkha a thawn a. Rom lehkhathawn tur a ziah lai hian hetih hun laia khawvela khawpui ber Rome hi a la tlawh lo a. Hetih hun laia ram ropui tak a la tlawh loh Spain chu Rome aṭang hian kal a duh a. (Rom 15:25, 28)

Hetih hun lai hian Rom-ah hian bawih tam tak an awmin Kristian sakhua a ṭhan chhoh lai mek a ni a. Rom a Kristian hmasa te pawh chu bawih a ni a. Chung kristian bawihte chu an pute laka hel loa thuawih tur leh tuar turin Paula hian he thu hi a sawi a. Buaina leh helna an chawhchhuah chuan Kristiante bawihte chuan nasa takin an tuar dawn a ni. Chumi hre reng chuan leh heng bawih te dinhmun mil hian Paula hian a sawi hi a ni tiin Bible zirmi te chuan an sawi.

Tuna kan rama roreltu thu hi a dik loh pawha zawm hmiah hmiah tur kan ni lo. Roreltu fel leh ṭhate thu chu awih tur kan ni. Mahse roreltu ṭha lo leh dik lote hi dodal ngam miah lo tura Kristian nih erawh hi chu Paula min zirtirna a ni lo awm lo e. 

A ṭul chuan Kris­tiante hian kan ram hruaitute hi an dik­lohnaah chuan khalh ngil turin mawhphurh­na kan nei tih kan hriat a pawimawh hle. 

Thuhthlung Hlui lama Zawlneite rawng­bawlna kan en chuan an hun laia sawr­karna chelhtu lalte diklohna pawh an do nasa tih kan hmu thei awm e. Kum zabi pariatna (BC) lai vela zawlnei Amosa, Hosea, Isaia leh Mika te pawh khan mihausa leh rethei inkar zau tak te, mi hausa in mi rethei an tihduhdah te, sakhaw lama an kal sualna nasa tak te kha an sawiselin an thil tih dik lo te an puangchhuak ṭhin a. Lal Isua pawh khan sakhaw hruaitute leh sorkar hruaitute thil tih dik lo kha huaisen takin a sawisel ṭhin. 

Kan ram hruaitute-ah hian mi tamtak hi chu kan beidawng tih a hriat a. An ṭhat tawklohna leh dik tawklohna te, hma kan sawn hleih theih­lohnaah te hi ngun taka ngaihtuahin roreltu ṭha leh fel kan mamawhzia a lang thei awm e. 

Chumi siam ṭha tur chuan Kohhran mite hian kan hruaitu thlanchhuah tur aṭang hian mawhphurhna kan nei nghal a ni tih kan hriat a hun. Kan ram hi hmasawn ve tak tak tur te, Kristian ram a nihna te chawi nung thar leh tur te, ram rolelna ṭha a awm theihna tur te in keini Kohhran mi te hian tihtur leh mawhphurhna thui tak kan nei a ni. 

Roreltu sual leh ṭha lo te laka kun reng tur Kristian kan ni lo e.