Khawvel ral hun atan an dah ta e

Mizo hlaa ka hriatthiam hleihtheih loh chu ‘Ni ropui a lo thleng dawn ta,’ tih hlaa ‘khawvel ral hun atan an dah ta e,’ tih lo lang ve mauh hi a ni a, he hla thu hi fiamthu thawhna ṭawngkamah kailekin an hmang zauh zauh ṭhin a. Kan MNF President-in Citizenship Ammendment Bill 2016 vanga BJP kaihhruai leh din National Democratics Alliance (NDA) aṭanga ‘a ṭul chuan kan inhnukdawk ang,’ a tih hun kha tun khawvel nge khawvel ral hun hi? tih zawhna hi chhan thiam a va harsa tak em ve le! 

Mizoramin tun hnaia kan thil tawn chu ‘Hnam Hnatlang’ a ni a, kha kha kan thlir kir chuan a issue deuh ber chu kan Mizo IAS officer pakhatin inthlanna buatsaih an tum dana ECI thil tih dan a duh lohna a zawhfiahna avang leh Vai IAS pakhatin a hekna avanga an sawn duh lohna a ni a. Kha thil kha mimal ngaihdan sawi ta ila, Hnam Hnatlang’ a tling lova, Bru leh Chakma vote pakhat pawh paiha nih phah lova, IAS inhek tawn leh transfer thu hla mai mai a ni a, a hunlai kha chuan kan thinrim tlang a. Kei pawh ka kal ve a, rilru fima han ngaihtuah let hian hnam issue lam aiin IAS leh IAS thil leh inthlan dawn boruak sa hulh hrin chhuah, hnam ang zawnga thiam taka laihlek niin ka hmu ta a ni, mi pawi ka sawi em lovang chu maw?

Tunah hian ‘Hnam Hnatlang’ kan tih aia thil issue pawimawh zawk a lo lang a, chu chu kan ram leh hnam chimrala awm theihna Citizenship Ammendment Bill 2016 a ni a, a hre zawkte sawi dan chuan he dan thara siam an tum mek hi pass a nih chuan kan ram, kan hnam leh kan sakhua hi nasa taka tihbuai leh tihchhiat tur niin an sawi a, chumi chu a thlen lohna tur chuan Rajya Sabha-a lo dan chiah tih theih kan nei tawh an ti. 

Kan MNF party hian politics an thiam riau a, Citizenship Ammendment Bill 2016 vanga Total Bandh kha 100% in an thlawp thu an puang a, mahse a bill pu luttu party an support zia entirna atan NDA leh NEDA-ah an la tel lui tlat bawk si. Tin, Rajya Sabha-a member pakhatmah nei lovin Rajya Sabha-a pass a nih lohna turin theihtawp an chhuah thu an han sawi leh a, hei pawh hi “Engtin nge an tel lohna House-ah theihtawp an chhuah ni?” tih zawhna hi kan zawh a ngai. Mipui min bum tumna mai mai niin a lang mai lo maw? Dan leh sorkar kalphung hre deuhte khan han hai chhuak teh u. 

Tirhkoh Pawla em ni kha “Ngaiteh u, ‘tun’ hi,” han ti deuh hluai kha, kha thu chiah kha hmang hawh ve ta ila, “Ngai teh u ka Mizo pui zawng zawng te u, ‘tun’ hi hun pawimawh chu a ni e,” tiin thiam loh ang angin ka rawn au chhuak a ni. Ka au chhuah chhan chu Citizenship Ammendment Bill 2016 hi an pass vaih chuan Mizorama Chakma awmte hi dan anga ziah luh an ni dawn a, Chakma awmna area hi chu Mizoram ni lovin Chakma-ram a ni tawh ang a, Kristianna aiin Bhuddism a langsar chho tawlh tawlh ang a, dan lova awm kan tih zawng zawng hi dan anga lo lut an ni dawn a ni. 

Chumi dan min pass sak tumtu chu NDA leh NEDA-ah kan la thlawp thei hi a dik lo. Ngai teh u, MNF-te u, tun hi Mizo zawng zawng ṭang rualin NDA leh NEDA chhuahsan vek hun ṭha a ni. In sorkar tawh tho tho bawk a, inhnukdawk tawh rawh u, tuna kan muan chuan he ram hian a tuar dawn a ni. 

Kan duh loh thu ‘sawi’ ringawt hian awmzia a nei lova, kan duh loh tak tak chuan NDA leh NEDA aṭangin kan bang  mai tur a ni. Kan MNF President-in 

“A ṭul chuan kan bang ang’ a tih kha engtikah nge a ṭul dawn? “Tun” ah hian a ṭul kan nih loh chuan, inhnuhdawh chu “Khawvel ral hun atan an dah ta e,” kan ti ve mai dawn em ni?