Thleng khawm huk kher lo ila

KṬP Gen Confe­rence kal a lo hun leh dawn ta. Zoram khawvela ṭhalai pun khawm tamna ber an lo tih ṭhin a ni a. Kal dawn tuk thlengin, "Ka tum ve leh ta thut mai," ti te, "Kan puin chawlh a remti lo a, ka ṭhulh leh ta thut," tihte chu hriattur a awm zut ang. 

Branch hruaituten thlen dan tur leh mutbu ken dan tur te, awm dan tur leh ruih­hlo laka fihlim turin member-te thu an chah mawlh mawlh ang a. Chhiat ang anga 'confi' ve riau dan tur zawngin nula 

ṭhenkhat an hmanhlel leh hle ang. 

Counter tina branch leh bial thleng tur te, an member zat ziahna hotu lam chuan an keu deuh sek ang. Whatsapp group an siam ang a, member kal tur zat an report zat a danglam deuh reng ang. Chutiang en chung chuan thlengtu lam chuan mikhual thleng tur zat in tinah an lo sem lawk a. 

Thlenin tur lam chuan an ar vulh te, vawk vulh te, bawng sa an lei tur nen lam chhut lawk vekin an mikhualte duat nan an lo in ruahman ṭhin. Ṭhalai rual mikhual thleng turin theihtawp an chhuah e. 

Hmanah kan khuaah YMA Gen conference kan thleng dawn a. Kan venga in ṭhenawm chhungkaw hnih chuan bawng an inphel a. Mikhual pahnih ve ve an nei! Karei, mikhual an haw chiah chu sa uih hlau reng rengin an sawisa nileng ṭhak alom! 

Kan khuaah KṬP General Conference kan thleng leh a. Branch pakhat (Aizawl) chu tumah thleng darh loin in pakhatah an thleng tehreng a nih kha. An ṭhenawmte sawi danin bualin leh inthiarna chu zankhuaiin kawngka a ri reng mai an ti. An thlenin te unaupa kha an Kohhran huam chhungah an awm a. Ṭawngkam ṭhain, "Han thleng khawm ula," a tih chu thu taka lain an vai thlen ta huk mai a ni awm e. Mi 15 vel thlen inbei khan mi 40 chuang an thleng! 

Hemi ṭum vek hian inkulh a, thlen khawm tum branch pakhat chu a thlengtu lamin remchangin an hre lo a. An inhmuthiam lo lek lek a, khawiah emaw an thleng khawm leh ta tho a nih kha. 

Chuvangin, tun ṭum KṬP Gen Conference-ah hi chuan thlengtu lamin min thlentir an tum dan hi thuawih taka zawm i tum hram hram ang u. Pehlawn nula te, Mamit tlangval te, Bungkawn Branch OB te leh Hnahlan zaipawl member han thlenho te hi a hlu a nia. Thlen kim zan chuan kan ṭhian bilte nen chauh kan inbia a.  Pathianni chawhma inkhawm hmaa thlalak ho loh a kim lo a tan a. Zan inkhawm kalho phet kan tum a. Zan fellowship ṭhutho leh hnuah ei tur lam chawpin kan tlaivar lek lek ṭhin. Aw, motor han in tlan pelh a, kan thlenpuite nen han inhmuh leh zuaih te kha a va hlu tak. 

He hlutna hi inti khawpui mi deuh hian in hmu thiam lo. In sum neih chhuangin inkulh leh thlen khawm kher in kherh ngar ngar a. Conference in kal hmaa in hmuh ṭhin Kawngi te leh Buanga te tho thleninah in tiho leh a. Midang chet phung in hre lo. 

Bus bang benga an zai ṭhup ṭhup laiin Bawngkawn Zaipawl in ngaithla a, zawm peih pawh in awm der loh kha. Thlengtu lam inbuatsaih dan in ti thlawn fo a nia. 

Mikhual nei ve lo naupang inti hawihai a. Harsatna tute emaw in siam daih zawk ṭhin a nia. 

Chuvangin thlenin pakhata in vaia thleng loin mi pali panga den denten insem ve ula. 

Thlarau lam mai ni lo tisa malsawmna thlengin nula senior tan leh tlangval senior tan a inhawng ngei ang.