ROSE PÂR AṬANGIN NUN ZIR ILA

Rose pâr hi a vul chhûng a rei lo, mahse pangpar mawi tak nia sawi leh hriat reng a hlawh ṭhin. Hlîng a nei miah lo a ni bik lo va, mahse a hlîng aiin a par mawi a langsar ṭhin. 

Kan dam chhûng nite hi a rei dâwn lo va, mawi taka vul zêl i tum ang u aw. 

Lainatna leh hma­ngaihna nena inen a, khawngaihna leh duhsakna rilru pu chunga in en chuan mi zawng zawng hi an hmelṭha a, an mawi hliah hliah ṭhin. 

Indonaa khing­puite ang maia vau zàm tumna nena midang thlir te, mahni kianga awm apiangte huatna leh ngeina mita thlir zêl mai te hi Lalpa ramah a awm ve ngai lo. 

Sum a ngah avang leh In lianpui a neih avanga 'hausa' nih hlawhte hian an lei phak loh hriselna leh hlimna awtin an za ruai thei a. Kâwla ni chhuak chhiara sadai êk ham pherh ṭhinte hian an thawh hlawhah lungawina leh hlimna an lo chang reng thei bawk. 

Ram ropuiah lung­ngai takin a awm theih a; hnam ropui zîngah mahni hmuhsit ṭhin hnam hnuaihnung anga langte awt ngawih ngawih an awm thei bawk. 

Personal peon leh vengtu sipai nei pha ngat zîngah thinthi diaia mu ngam lo a awm thluah theih a; mahni khum laizawla mu chunga arsi chhiar pah thei lungmuang êm êm si a awm theih bawk. 

Kawrchung nalh ber ber haa mipui hmaa ding ṭhin Pathian chènna hnuhma lang miah si lo a awm theih a. Silipar hrui chat zawm bawl ṭuk bun chunga Biak In tlar hnuhnung ber pawh kimki chawih chawih chunga luah ve ṭawk ṭhin ‘van muanna’ nei veng veng si a awm theih. 

Chung zawng zawngte tân chuan vawi khat thih ruat a ni vek a, pumpelh theih a ni lo. 

Mahse kan thihsan tur hi lungkham berah kan neih a, kan chhawm zui tur kan ngaihthah lawi si! Van angelten min hmu sela, Khualzinmawl min ti mai hian ka ring ṭhin. 

Siam chhan tipuitling a, duan an nih anga pâr mai ṭhin pangpar mawite, anmahni bawma puar ve ṭhin rannungte chen hian en kham har ka ti fo. 

Engah nge hringmi ber hi mawi taka kan pàr ve ṭhin loh le?