ZPM-in mipui an uire san dawn em ni?

ZPM innghahna leh an thu puanzarna ṭha ber Vanglaini (24.1.2019) kan chhiar chuan ‘ZPM leh Congress hotute an inbia - Duhoma’ tih a lo chuang kuau mai a. Hei hian mi tam tak mak tih a hlawh! MLA kan inthlan zawh takah khan ZPM hotute thu aupui tam ber chu Congress leh MNF kan enchhin tawh a, he damdawi hi kan ngeih lo a nih hi; Congress leh MNF ni lo sorkhar thar i siam ang an ti a. Mi tam takin chu chu an lo pawm a, Bial 8 laiah an tlin phah bakah Bial tam takah vote an hmu sang hlawm hle a ni. Inthlan kha thla 2 in pawtsei se ZPM hi an sorkhar pha hial mai awm mang e tih huai huai a ni. 

Thla tam tak a ral hmain, bial 34 aṭanga Bial 5 a tlathla mipuiin an lo nin em em Congress chu Pu Duhawma chuan thawhho puiah a lo sawm leh der tawh mai a lo ni a. Heti a nih chuan Bial 8 laia vote tlingtu mipuite kha a hotute hian an phatsan mai dawn ta em ni ang le? Vanneihthlak taka Bial 2 a a tlin hlauh avang hian a hawina lam apianga mipui thle dual dual turin a ngai ta mai em ni ang? 

Kolkata-ah khan hman ni lawkah thu ṭha tak a zu sawi a, tuman an dem lo, a fakawm thlawt a ni. Congress aṭanga peng Trinamool Congress Symbol nge ni a lo zu awrh hman reng tawh a. A inher rem leh hret chuan Mizoram Congress President te pawh a la ni leh thei mai ang. MP leh Bye-Election-ah Congress a thawhpui chuan a hnaih hret hret ang a, a lut leh nge nge mai thei a ni. A ni Pu Duhawma tan chuan Party zuanlawr hi thil thar a ni lova, a tihdan ṭhin a ni a, a tan a zahthlak ve lo. 

Heti a nih chuan Upa leh Pastor tam tak ZPM support-tu ho tan chuan a thanat thlak viau thei ang. Congerss nise Pu Hawla te unau beisei tur an awm tawh rih si lova, vengtu nei lo Beramho an nih lai a ni a, Congress hi an la tlem lutuk lo, an hotute an kham tawh tih mai a ni a, Leader ṭha Pu Duha te ang tan chuan kum 5 lek hnuah chuan awih nun mai theih an la ni ang. 

Pu Duha hian Mizo Nationalism te han sawi ve ṭhin sa teh mahse, a bul rawn ṭanna Indian Nationalism (Congress) bawk hian a lung a len leh ṭhin niin a lang. Ṭha dawna a hriat chuan BJP pawh a thawhpui thei mai a, a sahimna tur nia a hriatah chuan kum 20 lai a lo hnuchhawn tawh Congress chu thawhho puiah a sawm leh thei der tawh mai a. ‘India ramah lemchan thiam an hlawhtling e’ an ti mathlawn lovin Pu Duha hian lemchan chu a lo thiam ber nge nge e. Hetiang mi hi kawng khatah chuan an hlawhtling duh phian a, hlawhtlin ziktluak erawh an nei duh lo viau. 

A thuhrimin ZPM hian an MLA/ Minister khalh ngil turin Val Upa Council an nei khan kan hria a. Hetia Congrss nena lo indawr mai hi an Val Upa Council thuchhuak nge ni ang a, Pu Duha’n ama thua a lo dawr ve tawp ni ang le? Lo sorkar ta se an Minister-te chu an khalh ngil dawn lo tawp a lo nih hi. CM ni phei chuan a duh dan danin thil a kalpui dawn tih a chiang reng mai. 

Central lamah Congress hian ṭan han lain BJP duh lo huikhawm han tum sa teh mahse, MP 44 aṭanga 270 tlin chu ala huphurhawm hle ang. CAB hi keini hmarchhak hoten duh lo eltiang mah ila, India hmunpui lamah chuti hehuin an dodal ve lova. Rajya Sabha-ah a tlang hmel bawk si lova, chuti maiin Central Politics a khawih buai hmel loh. Nimin lawka Opinion Poll-ah NDA la sorkar leh turin an chhut tlai mai a. 

Pu Duhawma’n Bengali nula PM tura a lo zuar ta mai pawh hi midangin an pawmpui ang em? Congress kaihhruai sorkar dawn pawh nise Rahula lo chu PM atan an duh a rinawm lo. A thuhrimin Pu Duhawma’n TMC a zu zawm titih ang maia thu a sawi hi ZPM hotu dangten ṭha an tihpui ang em? Kohhran Upa leh Pastor rual hote khan Vai pawl tho zu zawm hi an duh dan a ni ang em? 

An duh a nih chuan mipuiin MNF an nin huna thlaktu atan Zoram mipuiin an ring lo khawp ang. Kalphung thar an hlat dawn em mai!