HLEMHLETNA BUL: KA NGAIHDAN!

Pathianin mihring a siam kha ‘duh thlan theihna/ chhia leh ṭha hriatna’ (conscience) thiang tak mihringah a dah a. Chumi awmzia chu Pathian min pek liau liau a ni. Amah, Pathian pawhin  mihringa ‘duh thlan theihna’  hi a khawih chingpensak duh lo va, a duh angin a hman luihtir duh lo bawk a ni. 

Tirhkoh Paula chuan, “Pathian hnen lamah leh mihring hnenah pawh, rilru sual lo mawlh (Conscience) hi vawn ka tum fo ṭhin” a tih hi a ‘chhia leh ṭha’ hriatna chu Pathian leh mihring lamah hman dik a tum tlat thu a sawi a ni. 

Rome 2:15 ah Paula chuan Jentail-te chung chang a sawinaah, an thinlungah dan thiltih ziak a nih thu leh chu chu an ‘chhia leh ṭha’ hriatna chuan a hriattir ṭhin a ni a ti.  

Pathianin ‘duh thlan theihna’ a pek, mihring hmasa berte khan an hralh a nih kha. Setana hnenah thei rah itawm takin an ‘duh thlan theihna’ hlu tak leh thiang tak kha an hralh a. A thlemtu, leisaktu khan Pathian hmuhah sual lian tak a ti a. A hralhtu pawh khan Pathian hmuhah sual lian tak, vawiin ni thlenga sualna lo in hring chho ta zel a chawk chhuak ta a ni. 

A leitu kha Setana a ni a, mi duhthlanna leisak hi Setana zia a ni; a hralhtu khan mahni thu a hmang thei ta lo va, Pathian thu a bawhchhia a, hlemhletna a hring ta a ni.  Jakoba chuan, “Tu pawh thil ṭha tih tur hriaa ti si lo chu a tan sual a ni” A awmzia nia lang chu, duh thlanna hmang sual, chhia leh ṭha hriatna hmang sual chuan thil a tisual a ni. 

Kan ‘duhthlanna’ thianghlim tak (con­science), Pathian min pek hi engti kawng mahin kan hralh tur a ni lo. Pathian leh mihring hmaah pawh ‘chhia leh ṭha’ hriatna keimahni duhthlanna ngeia thianghlim taka hmang tur kan ni. He kan duh thlanna (chhia leh ṭha hriatna) hi Pathian pawhin min khawihsak ngai lo, keimahni mimal kutah a dah - kawng engkimah kan hmang fimkhur fo tur a ni. 

Politics chungchangah phei chuan mipui hian kan duhthlanna thiang tak hi thiang taka midangte khawih chingpen leh khawih kawisak lo va kan hman a ṭul. Eng political party mah hi chhia a awm lo, an thil tum a ṭha em em vek. Ram leh hnam leh sakhua humhalh tum vek an ni. 

Ram hruaitu atan pawh mi ṭha ber ber hming hliauna la nei lo te an theh chhuak ṭhin; mahse party hruaitu lute an lo corrupt si a, corruption thubuai awrh­lai neite an lo la nih phei  chuan  an hnuaia mite tan chuan anmahni in sawi mawi leh an party sawi mawi har duh tak tur a ni. Hei hi kan ram tan chuan thil pawi tak a ni. 

Party hruaitute, Pathian mi, corruption laka fihlim, mipuite hriat leh hmuh pawha  pamham lo an nih loh chuan mi ṭha an vawrh chhuah ṭhinte pawh kha eng ual an ang thei chuang ngai tlat lo. Chuvangin, Zoram mipuite hian kan ram hruaitu turte kan thlan dawn hian kan thlan tur mi leh a awmna party hruaitu lu te kan ngaihtuah kawp tel zel a va ngai ta em. 

Evi  leh Adama te kha Setana'n thei itawm tak hmangin an duh thlanna thiang tak kha a leisak a, Evi leh Adama khan an hun lo awm zel tur te kha tlemin ngaihtuah nachang lo hre ta sela chuan thei kha eng anga itawm pawh ni sela an ei kher lo ang. 

Anmahni ṭanghma chauh, an tun hun chauh kha an ngaihtuah a ni ber  chek  a ni ang chu, an ei tak mai kha!