Tuikum bial mipuite tan... KUT BEN A LA HUN LO!

Tun hnai khan chief minister Zoramthanga chuan Tuikum bial chhunga khaw pakhat a tlawh a, vantlang inkhawmah thu a sawi. CM thusawiah hian mipuiin kut an beng dur dur a ni awm a - inthlan hma-a a thusawite kha an theihngilh ta em ni ang le? 

Chief minister Zoramthanga hian inthlan dawn khan Tuikum Bial mipuite hnenah thu tiamin - an bialtu MLA chu an thlang tling nawn a nih chuan minister-ah a dah tur thu a sawi. He a intiamkamna hi a ngaipawimawh lo nge ni a, bial mipuite hmai a zah zo lo zawk. 

Mipuiten duh taka an thlan tlin Tuikum bialtu MLA Er. Lalrinawma chu Assembly Deputy Speaker atan a dah daih! 

Mipuite hian kan politician te thusawi hi kan ngaithla liam mai bik lo a, an thutiamah pawh ding turin kan beisei a ni. Kan CM zahawm tak hian a thutiam kha a la theihngilh hauh lo ang tih a rinawm a, bial mipuite hian an hre lo der zawk a ni ang em? 

Hmanni lawka minister bial nih tiamtu hian a thusawi a tihlawhtlin hma chuan lawm suh u - kut ben a la hun lo! A thusawiah a ding ta lo rau rau a nih chuan, bialin hma a sawn ngei ngeina tur a tihsak hma che u chuan in kut lo kuangkuah tlat rawh u. 

Chief minister hian bialtu MLA kaltlangin a duhsak che u a nih tih a lantir ngei tur a ni a, hmasawnna pawh in hmu ngei tur a ni ang. Mizoram laili taka awm - kawng engkima hnufual em em si bial nih reng tum suh u. 

Inkalpawhna a chhe em em vek a, khaw ṭhenkhat phei chu furah tlawh pawh theih loh an la ni hial. 

MNF sokar a liam hma leh, chief minister  ṭhuthlenga Zoramthanga a ṭhut lai ngei hian bial hmasawna tur ngaihtuah ula, chumi a hlawhtlin hunah chuan kut kan la beng ho zawk dawn nia.