Footpath-a Serthlum zawrh thu kha

Tunlai hian kea kalna tur footpath-ah serthlum zawrh leh thlai dan zawrh a tam hle a. Aizawl DC chuan mihring kalna hnawk khawpa inzuar an tam tak avangin tunhnai khan thupek chhuah a, chu thupek chhuah chu force (police) hmangin a khuahkhirh (enforce) ta a; thlai zuartute pawh an buai phah hle a ni. Footh­path-a thil zuar zingah serthlum zuar an buai zual a ni. 

Serthlum thar vanglai a ni a, Aizawl khawpui hmun hrang hrangah zawrh a nih laiin kea kalte tana kalna tur awm lo khawpa footpath-a an zuar erawh hi chu Dan lam mit aṭang chuan thil kawng kal lo tak a ni a, Aizawl DC-in a khap pawh hi a awm viau a ni. Serthlum chang a ni lo, thlai zuartu tam takte pawhin footpath-ah an zuar a, kea kalna tur awm lo khawpa nileng lenga an zuar pawh hi a dik lo a, khapna thupek a chhuah ta a ni. 

DC thupek avangin serthlum zuartute an buai zual a, chuvang chuan Aizawl khawpui enkawltu Aizawl Municipal Council (AMC) ah phalna an dil a, AMC chuan serthlum thar hunlai reilote atan permit pein footpath-a zawrh a phal lawisi a, AMC leh Aizawl DC thupek chu a inkalh ta a, kar kal ta khan an buai ta nak a nih kha. 

Horticulture department-in hma a lak takah chuan serthlum huan neitute nasa takin a ṭanpui a, an serthlum kung tar tawhte an tih nulat sak a, chuvangin nikum ai khan kumin hian an thar tam ta a, thil lawmawm tak a ni. Nikum ai chuan an thar tam taka chuan an zawrhna pawh a tlawm phah deuh a, mimir pangngai hnuailam pawhin kan ram serthlum thar kan ei tam ve theih phah viau a ni. Serthlum huan neitute Horticulture department hian theihtawpin han ṭanpui zel se, thlai dang tomato leh zikhlumah pawh nasa taka a ṭanpui avang hian kan ram thar ngei kan ei theih phah ta a ni. 

Footpath-a an zawrh chungchangah thu inhmu lo palh a awm ni ngei turah ngai i la, AMC lamin serthlum thar vanglai hun reilote chhung zawrh phalna a lo pe pawh hi a awm ve vengvawng viau a ni. Thil an tisual hran lo e. Amaherawhchu, Dan kengkawhtu DC lamin kea kalte hmakhua ngaia zawrh a khap pawh hi thil tihawm reng chu a ni a, Aizawl DC pawhin thil a tisual chuang bawk lo.

Kha thilah khan police ten footpath-a serthlum zuar an han khawm deuh rap rap pawh kha thil tihawm loh a ni chuan lo. Mahse DC leh AMC thu a inhmuh lo vanga buai ta mai mai kha a ni a, an pahnih hnihin thiam loh em emna tur a awm pawhin a lang lo. Mahse DC-in thupek a chhuah khan AMC lam hian DC lamah, "Serthlum thar hunlai a rei lo a, chuvangin hei hi chu lo hrethiam teh u," tiin tennis court sira zuarte chu hriatthiam theih ngei tur a ni. Chuvangin, DC lam leh AMC lam thiam lohna em em a awm lo ni ta berin a lang e.