Kohhran kan zah tak tak em?

Thla hmasa kumtir mai khan MPCC Presi­dent Pu Lal Thanhawla chuan ‘Kohhran zah lo tan zah tur dang a awm tawh lo’ tih thu a sawi a. Mizorama ringtute hian kohhran kan zah loh chuan zah tur dang kan nei tawh lo, kohhran lu chu Krista a nih avangin kohhran hnathawh leh a rorelte hi kan pawm thiam tur a ni a, kohhran dodal zawngin Congress party miten ṭawngkam kan hmang tur a ni lo, a ti. 

Pu Hawla hian a thusawinaah Pathian thu a sawi lang ve fo a, a tak takah eng ang mi nge a nih hre chiang lo mah ila, Pathian hmachhuana thu a sawi ṭhin hi a entawntlakna lai pakhat chu a ni awm e. Chutih rual chuan an sorkar laia Zu zawrh an tum kha Kohhran mi tam takin an dodal tih kan hre ṭheuh ang a, khami chhan let nan khan MPCC President hian, ‘Zu doin kohhran tawngtai rual mah se A chhanna chu zu zawrh a ni’ a ti ve leh thung a ni. 

Congress sorkar khan zu zawrh chung­changah kohhran chu zah hle mah se an rawn tawh dawn loh thu leh, an duh dana kaltlangpui an tum thu te pawh an sawi a ni. Sorkar hmalakna chi hrang hrangah Kohhran a inrawlh vek lem lo va, mahse Kohhranin zu zawrh an duh loh avangin aw an chhuah a, chumi chhan let nan chuan Kohhran chu ‘Kan rawn dawn lo,’ an ti hmiah thung. 

Kan hriat angin sorkar inrelbawlnaah hian Kohhran a inrawlh khat hle mai a, mahse a vawr tawpah an duh loh ber zu zawrh a nih dawn meuh chuan na takin Kohhran khan an duhlohna an lantir a. Khati khawpa an ṭang chung khan sorkar chuan kohhran kha an bengkhawng eih lo a ni ber - a chhan chu 

ṭawngkam deng­khawng tak takin an bei let a, inthlahrung takin zu kha an zuar tlat lo. 

Khatihlaia Home Minister Pu R Lalzir­liana pawhin, zu zawrh an tum chungchangah Kohhran pawi khawih sorkarin a hlau a, chuvangin Koh­hran rawn a tum lo tih pawh a sawi a. Kohhran hruaitute leh kohhran mipuite rilru tihnat hlauh vanga an rawn lo a nih chuan tha taka sawi theih a ni. Amaherawhchu, Congress sorkar khan Zu an zawrhna lamah Kohhran rilru nat theihna tura tihelna thu anga ngaih theih an chhak chhuak fo a ni. 

Tunah hian zu zuar­tu sorkar chu chiang taka paihthlak an ni. Congress kaih­hruai sorkar khan hna an thawk ṭha ve pangngai viau niin a lang a, kawng tam takah phei chuan Mizoram hma­sawnna bung thar pawh min kai pui nual a ni. 

Amaherawhchu, thil Kohhran pawi lian tak an sawi a, Kohhran tihel ni awm taka thu chhak chhuah te pawh an nei nual a, khatiang thil avang khan tunah hian paihthlak an ni pawh a ni mahna. 

Kristian dik tana pawi­mawh ber chu Pu Hawla sawi ‘‘Kohhran zah lo tan zah tur dang a awm tawh lo’ tih lai te hi a ni.