Written by
Rammuanawma
Kolasib
Kan ram dinchhuahna tur Mau
Mizoram Chief Minister tura mipuiin lungrual taka kan thlan Pu Zoramthanga chuan mau hmanga intodelh a tum. Kan CM hian mau hi a atchilh a ni.
A atchilh chhan hi a mimal tan a ni lo. Mizoramin hma a sawn theihna tur leh intodelhna atan mau hi a hman theih tih a hriat chian vang a ni.
Kan Chief Minister leh mau hi thui tak a inzawm tlat tawh a ni. BA pass hmasa leh English thiam em em ni chungin ram leh hnam a hmangaih avangin harsa taka lehkha zirtirtu a chhungte chawm tur pawhin sorkar hna a zawng lova, ramhnuai a pan a ni. Ram hnuaiah hun rei tak a hmang a, chutah chuan mau karah, raw hmunahte a riak fo vang tih hi thil chiang sa a ni.
Ramhnuaiah hian chawhmeh mumal a awm loh pawhin mautuai leh rawtuai chu a tam dawn a, chuvangin kan Chief Minister pawh hi mautuai leh rawtuai ring hian rei tak chu a awm dawn tih a chiang a ni.
Sawi tum takah lut ta ila, mi ṭhenkhat chuan Chief Minister thusawi hi fiamthu ang zawngin an lo chang ṭhin. Mau hmanga intodelh a sawite hi a tihelna leh sawichhiatna Whatsapp group hrang hrangah ka hmu a, ṭhenkhat chuan mumang rama cheng angah an ngai a ni. Kan Chief Minister zahawm tak hian fiamthu a tawh lova, tihtakzetin mau hi a buaipui a ni.
State pakhat Chief Minister meuhvin mau a buaipui tak tak chuan a hlawhtling ngei ang.
Mau hmanga intodelh tir min tum avangin kan CM hian mau hi a thusawina apiangah a sawi ri a, chuvangin kum nga a ral meuh chuan kan intodelh ngei ang tih hi ka ring tlat a ni.
Tih tak takah chuan tun hmain thlai chi hrang hrang an sawi mawi a, kum tam a ral tawh a, eng thlai hmangin nge kan intodelh tak le? Tih tak taka beitu Chief Minister hi kan ram hian a nei tawh ngei reng em ni? Tuna kan CM hi chuan mau hi intodelhna atan a ṭha tawk tih hi a hre chiang a ni.
Kan ram mau Vairama an tawlh thlak zozaite hi a thlalak kan hmu tawh ṭheuh awm e. Hengte hi ṭagkai taka hmang thiam hi he ram hian a mamawh a, kan CM hi chutiang hmang ṭangkai thiam chu a ni. Mau hi kan ram dinchhuahna tur a ni tih hi ring ngam ila, kan CM hi ring ngam bawk ila, chu chuan he ram hi dinhmun ṭha zawlah a la hlangkai ngei ang.