MPSC: Online application & indaihlohna

MPSC indaihlohna leh sorkar tharin Group-B Non-Gazette leh a hnuailam hna la tura Selec­tion Board hran din a tum chung­chângah mipui ngaihdân inang lo tak tak a awm lâi hian eng hi nge he harsatna sutkian dân ni ta ang tih hi kan sawi lan tam loh tak a ni. 

Tahrik ni 17 June, 2019 Vanglaini phêk hmasa luahtu, ‘Mizoram sorkar hnalâknaah a huna tih theih loh kan nei lo - MPSC Chairman’ tihah khân sorkara LDC, UDC, Asst. Grade, Computer Operator leh Officer an mamawh ang an dil leh pêk an nih loh thu kan hmu a. MPSC hna lâk hi kum 2017 vel aṭang khân a tam ta viauin a inzawm zut mai a. Thawktu ngai reng, vawi leh khata hna pung thûr chu indaih loh mai awl tak tur a ni. Amaherawhchu, he indaihloh chhan tak hi thawktute indaih loh vang a nih theih rualin Online Mode of Application kan hman tam loh vang a ni tih a chiang hle. 

Entirna mawlte han pe ila: Application form siam turin OMR sheet, A4 size envelope leh receipt phêk sâng tam tak siam a ngâi phawt a. Form pêk chhuah leh pawisa lut chhuak tifel turin thawktu pali vêlin an vil deuh chawt a ngâi a ni. Zirlaiten form lachhuak turin MPSC office (intlar pût a ngâi fo) or D.C office a kal a ngâi phawt a, veivah nan taxi/ bus fair or lirthei petrol/ diesel man atân in sen fê hnuah dilna form, OMR (phêk hnih, pang li nei) rei ngial han thai bial neuh neuh a ngai leh a, a man atan Rs 150 zêl a ni. Tichuan, admit card lam tura hriattirna lehkha, MPSC lamin Post office kaltlangin an han sem kual leh te te a. Admit card a lam theih a, hna pakhat dil nan passport size photo pahnih (passport photo pakhat hi dawrah pakhat man Rs 12/13 vêl a ni) ken a ngâi. 

Admit card lam tur chuan zirlai tam tak chu MPSC office lamah concert pui tham chhim tur ang maiin kan in hmukhawm leh ta ruih ruih mai - Taxi fair petrol/ diesel man chu a lêt chiah a lo ni ta. Admit card hriattirna leh admit card sâng têl tak meuh print chhuak tura thawktute hnathawh hi fak phu tak a ni hial âwm e. Tichuan, admit card counter siam a, nghah deuh chawt a lo ngâi leh ta; hna diltu zirlai kan tam tawh avangin hun hlu tak chânin intlar fê a ngâi ṭhin. Heta kan sawi chin hi Aizawla khawsa tân chauh a la ni. 

District danga khawsa tân i han ngaihtuah teh ang. Hna tam zawk hi Aizawl-a exam centre awm a ni a. Form fillup chu anmahni district-ah lo theih ta se, admit card lam turin Aizawl kal tho a ngâi, chhungte/ hmelhriat nei lo tân thlen In tur buaina a awm phawt. Thlen In nei ta se, Aizawla kal turin bus leh sumo fair Rs 300/ 500/ 1000 vêl sên a ngâi leh ang, kal leh haw lam phei chu sâng chuang daih a ni. 

Tichuan form chu a fillup thei ta, a haw leh vang vang phawt. Exam hma kar thum emaw vêlah admit card lam turin Aizawla a kal leh a ngâi, a hmâa a sênso zât tho kha a lo ni leh a, exam-in a zawm nghâl ṭhin loh avangin mahni khaw lama haw leh mai loh chuan thlen In buaina nen châm tlang ngawt thu a awm lo. Form submit leh admit card chinah ringawt pawh hun leh tha, sum leh pâi tam tak a ral a ni. Thawktu lam tân buaina namên lo a ni tel bawk. Chawhrualin, Aizawla zirlai chuan taxi fair/ petrol atan cheng 50-200, form man 150 leh veivahna/ intlarna hun atan darkar 2-6 vêl a mamawh ang. District dang zirlai chuan sumo/ bus/ taxi fair-ah Rs 1000 - 3000 leh hun a sen ral chu darkar ni lovin ni hnih emaw ni thum vêl daih a ni ang. Hêng hun leh sum senna chuangliam, MPSC hnathawktute buai lutukna ni bawk hi a tihreh dân awlsam ber chu online application a ni. 

Kan ram hruaitute hian hêngte hi an ngaihtuah chiang em? Hna duh ṭheuh, chhungkaw khawsak inang lo tak kan ni tihte hi? Zirlai sâng têl veivâk tena lirthei an chelek tam turzia mai chu! Traffic thlengin nghawng thui tak a nei ngêi ang. Hetiang a nih avang hian a tihreh dân awlsam nia lang chu online application hi a lo ni ta a ni. Online mode-ah chuan zirlaiten mahni awmhmun aṭangin computer leh smartphone (kan nei deuh vek tawh ang) hmangin minute 10 emaw vêl lekah form kan fillup zo thei ang. Admit card atan passport size photo pahnih (hard copy) hman kher a ngâi tawh lo ang a, admit card lam buai a ngâi tawh lo bawk ang. A chunga zirlaite sum sen, hun leh tha, thawktuten print out siam leh admit card sem chhuaka an hun leh tha sen zawng zawng hi a kiam duak mai dâwn a ni. 

Admit card buaipui nana an lehkha puan hman leh sum senso hi a tam hle ngêi ang. Online ni vek tâ se, heta sum sen zât hi computer operator thiam tak, mi tlemte rawih nâna hman leh theih anga, thawktute pawhin indaih deuh zâwkin hna an kalpui thei ang. Mihring tlemtê lâk belha hneh lehzual taka tih theih mai tûr nia lang si, lâk belh aia Selection Board hran din tum hi thil ṭha ber niin a lang miah lo. Online mode hi computer thiamna nei mi tlemte ina hneh taka an enkawl theih a nihnate hi kan chhût chiang meuh em? 

Kan sorkar hian hêng kan han tarlan tâkte hi ngaihtuah chiangin, MPSC kalphunga danglamna thlen tum ngawr ngawr lo hian tûn aia felfai zâwk, hnalâk hna hi tlin leh zual zâwka a thawh theihna tur ngaihtuah sê. Online application ina thawktute leh zirlaite tân a awlsamna leh zângkhaina nasa tak a thlen turte hi zirchiang peih sela. Mipui sorkar a nih si chuan mipuite tana ṭha tur leh ṭhangthar zirlai, nakina kan ram hruaitu turte hmakhua hi ngun taka thlir chungin dikna leh rinawmna, intluktlânna leh duhsakbik nei lovin min hruai sê.