TU TU NGE TLING

Vote chhiar hun kha kan tan zanlai pelh a ni a, chuti chung chuan ka meng ve ran a. A tukah ni lenga vur a sur dawn avangin hna ka in la off tho bawk tia men rei deuh inhuamin thin phu dep depin ka nghak ve a ni - hetiang tak hian AMC inthlanin min la nghawng ngai lo. 

Vote chhiar zawh hmasak lamah MNF 2 leh INC 2 tlingah an han puang ta a, ZPM a la nil tlawng mai kha chu, a zamawm duh hle. A tawp lamah Baryl-i te an han tlin tak hnu kha chuan thaw a veng a, ZPM-in kan rin zat la lo mahse, hmasawnna ropui lutuk a lo lang a, a lawmawm em em. 

A tawpah chuan party pali dinhmun chu hetiang hi a lo ni ta a ni - MNF 11, ZPM 6, INC 2 BJP 0. 

He inthlan result aṭanga rilrua thil lo lang nghalte: 

1. MNF hi MPC leh ZNP-in an thawhpui a, party 3 ṭangrual ang an ni; Ward 11 an la hi an hniam zawk hle. Tute emaw chuan ward 4 ṭheuh la angin chhut se la, a nuihzatthlak  mai thei, hnial erawh a har fu ang. 

2. INC hi rin ai takin an lo la chak a, mimal chakna a  tel vang a ang. Mipui kham an hlawh tehlul nen ward 2 an la hi an mahni chuan sit deuh hlek mahse, a lanna tlang dang aṭang chuan lawmawm tham tling. Hei hi an tan darthlalang  a ni. 

3. Media lamah ZPM an chak hle a, chu chuan anmahniah beiseina a siam sang thar a. Chuvang chuan ward 6 an la hi nur deuh an tam mai thei, amaherawhchu,  ZPM aṭang hian political party pahnih ZNP leh MPC an chhuah thawt avangin ward 3 chauh pawh la se, thathona tham a la tling tho tho. 

4. ZPM chu media lama an chakzia tlang hriat a ni a, tun lai khawvelah chuan media lama chak party hi khawi ramah mah chelh hlen theih an ni lo. Chuvangin, media lama an chak zel chuan tuma chelh zawh loh hun chu a la thleng ngei ang. 

5. Mission Veng pa sawrkar hnathawk politics tui leh hre tak mai chuan, "Lo chhinchhiah kar rawh, INC hian Central lam leh Mizoramah kum 50 hnuah bak sawrkarna an siam tawh lo vang," a ti a. Kei chuan, "Kum 50 em em chu ka sawi ngam lo, term 4 hi chu an lang tawh lovang ka ring," ka ti ve thung a. Kan dik lo ve ve thei tho bawk. Mahse tun hnaiah chuan INC magic touch a tawp hrih tlat. Engpawh nise kum 25 zet 'titheitu' dinhmunah an lo ding tawh a. An rawih ve ta a nih pawhin lawm takin rawih ve mai se, an thil ṭha tih tawh zawng zawngah fak an phu em em.

6. MNF hian an sim chuan arh lam an pan zel thei ang a. Mahse dawt sawi te, sum chhep relhte an chin chhunzawm a, an aia ZPM 6 tlingte hian dik zawk leh ṭha zawka hna an thawh chuan, tun hi an invawrh san lai ber a ni thei. Chuvangin, ZPM 6 te hi a chi ang an ni ang a, emaw, thim zinga eng turin kalphung thar missionary emaw kan vuah thei ang.

7. ZPM hian an manifesto ang taka ward committee an din a, lang tlang taka sum an hman a, ZPM culture tawite kan hmuh tawh anga quality ṭha leh endik dawla hna an thawh chuan, veng mipui an hlim ang a, ward committee-a an awmpui party  dang mi leh sa lawmah a tla ang; tichuan, inthlanpui lo awm leh turah ZPM tana ṭhahnemngai an ni thei tawh ang a, campaign a hnip zat ang. 

8. ZPM  candidate te kha tumah Counselor an la nih ngai loh avangin AMC kawchhung awmzia an la hre pha ve tak tak lo va. Kan CM ang deuh thovin risk-in an campaign a ni ber a. Hetia an lo tlin ve tak thluaiah chuan a nakah an zen ve tawh dawn a, siam ṭhat ngai lai an hmu ang a, dik lo taka AMC an kalpui thin dan chu a chhung aṭangin, 'been there, done that' rilru nen, a ṭha lo apiang an lipse thei tawh ang. Hei hi ram pumin kan chhawr dawn a ni. 

9. Inthlanna felfai kan nei kha a lawmawm. MNF an chak bawk a, hman kuma 'Pi Hlimpuii bawm an chhar' tih te, 'Michael-a signal' ang te sawi a awm ta lo. Party tin ṭang em em ṭheuh mahse tuma'n buaina an siam lo, a lawmawm. Election conduct-tute an fakawm bawk. Sawi hmaih hauh loh tur chu MPF te inpekna sang tak hi a ni, an ngaihsanawm thlawt. Anni inpekna hian rah ṭha Mizoramah a chhuah a, zan thima khawnvar eng angin India ram zauvah mawi takin kan ram a eng thin a ni.

10. A tawp berah chuan a tling zawng zawngte ka lawmpui a, a tlate ka lainat a, ka tuarpui hle mai. Mahni leh kan party tan chauh tia, hamṭhatna duh vanga rawn inzep lut ve ngawt tla ta te chu chawl zui se ka duh a, ram siamṭhat duh vanga tuar huama pen chhuakte erawh fuih ka duh. A bulṭanna chauh a ni a, tuna i rawn inpekna hian rah ṭha a chhuah der tawh tih hria la. Chu chuan tihuaisen che rawh se. Pathian rawn chung zelin Zoram kawng dika hruai leh turin puan ven sawi chhing sauh sauh zawk ang che.