Thing leh mai chereu nasa

Tunhnai khan Champhai district khaw hrang hrang tlawhin ka zin kual a, ngaw dur pui pui hmuh tur a vangin thing leh mau a chereu nasa hle mai. Khaw tinah thingfak inchhep erh urh hmuh tur a tam a, truck full load tehmeuha meihawl phur luk luk hmuh tur a awm nual bawk. 

Thingtlangah chuan thing tuahin eirawng an bawl nasa a, gas nei pawhin thing an tuah tho mai. Gas lah hi duhkhawp an hmuh theih loh vangin mei chhemna thuk an nei deuh vek an ni. 

YMA-in ramngaw humhalh kumpuanah a hmang ṭhin a, khaw tina ramngaw ṭhiat tam ber erawh chu YMA member an ni deuh vek. Lo neia eizawng an nih hlawm avangin kum tin, khaw tinin lo an vat a, ramngaw an ṭhiat duai duai mai si a. Lo atana an neih ramah lah thingphun thar a awm ngai tawh si lo. Kum khat an nei a, chul an rih hnuah ram bua angin an kalsan leh zel ṭhin.

Lo neite hian an thlai karah thing phun ziah se, chul an rih leh phei chuan kum hnih an enkawl dawn tihna a ni a. Kum hnih chhung chuan thing ṭhang duh deuh chu a lo lian deuh hman tawh ang a, a puitling engemawzat a awm ngeiin a rinawm. 

India ramah en­vironment & forest an awm a, chu chuan thing leh mau, nungcha enkawltu an ni a. Ka sawi ang khian kumtin Lo atana ram an vah hi he department hian enkawl pui ta se, thing phun tur pe se, an enkawl manah thing pakhat Rs. 100 zel emaw kum khatah pe se, kum thum emaw enkawl tir ta se an Lo kalsan pawh reilote-ah ramngawah a chang leh theiin a rinawm. 

Forest department hi khaw kilkhawr ber thlengin an inzarpharh a, mahse ramngaw leh nungcha humhalh kawngah an fail chiang hle ti ila kan sawi sual lo ang. Meihawl an rawh ber mai hian ramngaw a ti chereu lehzual a ni. Thing lian pui pui an kit a, an han rawh chuan Meihawl tam vak lo a chhuak a, an thing kih leh an meihawl rawh chhuah a inmil si lo a, ramngaw suatna lian tak a ni. 

Heng meihawl rawhte hi khap theih a ni a, khapna thupek pawh an chhuah tawhin ka hria. Mahse dan kenkawh a awm si lo a, kan ramngaw a chereu zo ta. Thing leh mau a chereu chho zel a, tuihna a kang zo a, kum 10 vel kal taa kawngpui sir luikawra tui luang del del ṭhin pawh a ro zo ta, mihring ei tur pawh a awm ta meuh lo. Kan lui liante pawh a kang chat lo chauh a nih tawh hi. 

Chuvangin, kan ramngaw chereu zel veng turin ṭan i han leh teh ang u. Forest department-in hma han la thar leh se, YMA-te thawhpuiah sawm se, Mizo mipui zawng zawng kan ṭanrual leh chuan kum 10 hnuah chuan kan ramngaw chereu pawh kan chhanchhuak leh ngeiin a rinawm.