ṬHALAITE KHAWVEL

Kan tun lai dinhmun te ngaihtuah chuan kan khawvel hman mek hi, ṭhalaite khawvel han tih mai hian a fiahin a chiang deuh nghal kuar ni hian a hriat a. Ṭhalaite nun dan leh kan ram dinhmun en pawhin, ekhai ṭhalaite puala he kum zabi 21-na hi lo inherchhuak em ni? Tih mai pawh thil awl tak chu a ni. 

Ṭhalaite khawvel kan ti a, tuna kan ram Mizoram dinhmun ka thlir hian kei chuan tuna kan khawvel hman mek hi ṭhalaite khawvelah chuan ka dah phal bik hauh lo mai! Kan nun dan, kan khawsak zia, kan incheina te kan en chuan thlang sappui lanu leh val rualte kan iang zo ta; mahse, kan danglam tumna hi a pawn lang deuh em? Kan changkang a, kan khawhawi a zau, kan incheina kan taksa thlengin a mawiin a nalh em em tawh a. Hei hi ṭhalaite khawvel side A lam nise, engtin nge a side B lam chu ni ve ta ang? 

Nalh leh mawina a tawk mai lo, a chhuak thar apiang neih tum a leina man tur nei si lo, nu leh pate thawhchhuah saa inchhekarbawm ṭhin ṭhalai i ni em? It's my life ti ṭhin ṭhalai; mah se, hnathawh mumal pawh nei lo, chhungte pawisa dil a, chaw eikhawm leh hmun danga chhuah vah hrat viau si ṭhalai i ni mai lo maw?  Social media site hrang hranga account neih thluah si. Bank account empty leh lawi si ṭhalai i ni palh ang nge. Google age-ah kan cheng mek a lawm ti chungin social media tualah Mizo ṭawng i pai tlat ang tih ka va hlau em! 

Heng Instagram, Facebook, WhatsApp adt. ah hian sexy leh nalh tak taka i in post avanga i hlawh hi kan hre chak viau asin. Man chawiin kan incheia man nei lovin kan in post leh ang tih hi a hlauhawm ṭhin, ṭhalaite lehkhathiam a ngaihna hria, hawi zau kan ni a holam tak leh mite nuihzat tura awm fo hi he khawvel kan chen dan tur hi a ni dawn em ni? 

Ṭhalaite khawvel alawm i tih lai renga i nu leh pa i chhungte thawhchhuah sa ila ring reng a nih si chuan, i nu leh pa i chhungte khawvelah khualzin chamrei mai i ni lo maw? Changkang kan intihna lo ken hi em ni ang, mipa hmeichhe nih chak tlat te, hmeichhia mipa nih chak tlat te nen kan inpelh suau suau ta ber chu a nih hi. 

Nakinah chuan tuna i khawvel hman mek hi ila chhui kir dawn, inchhirna tur neih tam loh hi a pawimawh hle mai. Hna thawh taimak te, mahni hnam leh ziarang zahpui loh te, hnam dang ṭhalaite el ngam mi huaisen nih te hi kan tum tur a ni dawn lawm ni? 

Mizo nula kan farnu te u, hei hi min lo hriatsak lul teh u. Social media lamah sexy tak taka in in post kual vel ṭhin avanga hnam dangten ṭawngkam mawi lo tak taka inthlalak an lo comment ṭhin te hi in duh reng vanga in post a nih rualin in nuṭa Mizo tlangval te rilru hi a na ṭhin asin! 

Mizo tlangval mahni phak tawk hnathawh tur pawh zawng hmu zo lo hi kan va tam ta em, kan nulaten pasal turin min thlang lo hlauh palh ang nge. PUBG khel a, mahni inchhunga ral do tlut tlut tangkapui awrh sawi tur an vang teh asin. Ral do taima viau si, hnathawh dawn a ni sa do peih miah lo i lo ni ve reng tawh lo maw? 

Ṭhalaite khawvel kan ti a, nu leh pa thawhchhuah sa tho kan ei si chuan siamṭhat ngai lai chu a awm a ni. Mahni tan leh ram tana ke pen thei turin ṭhalaite hi kan inbuatsaih a hun tawh takzet a ni. 

Khawvel hi ṭhalaite khaw­vela kan la chhal zel dawn a nih chuan social media lamah ringawt he khawvel hi chen lovin, mahni inchhung aṭangin bul ṭan ila, hnathawh uar ila, zirlai te pawhin kan zirlaia kan hlawhtlin ngei theih nan theihtawp chhuah thar ila. Khawvel thar ṭhalaite khawvel i din ang u.