Rilru so hma, no hma leh ho hma Mizote

BP su nasa hi a hlauh­awm an ti ṭhin. Kâwlphetha pawh a châng chuan a su ṭhin a, chu chuan khâwl thil a tichhe duh hle. Chutiang deuhin Mizote pawh rilru su awlsam chi kan niin a hriat. Rilru su awlsam lutuk hi thil ṭha lo tak a ni. 

Rilru su awmzia chu awlsam taka ngaih dân inthlâk danglam thut tihna a ni ber mai. Kan biak in chhûng rilru leh biak in pâwn rilru inang lo rang lutukte hi kan rilru sûk awlsam lutuk vâng niin a lang. Entir nân, biak inah inngaihtlâwmna thu leh kan nunna hlobet pâr ang lek a nih thute kan ngaithla a, ṭha kan tiin kan pawm êm êm a, ngaihthlâk lai chuan kan inngâitlâwm a, engmah loah kan indah a, kan hnukte pawh a ulh hial. 

Nakinah inkhâwm kan bâng a, social media-a mi thu post kan helh deuh zâwng a lo awm a, kan rilru chu a su zuk nghâl a, kan tlâwmna rilru chu thing thla nghâlin he mi hi mi sual tak a ni tiin ṭawngkam chhe ber ber hmangin kan ân khum nghâl a. Chutiang rilru chu rilru su kan tih chu a ni. 

Kan rilru a sûk awlsam êm avângin vawiina kan duh leh fak êm êmte pawh a tûk lawkah kan huain kan sêl leh fo a, vawiina rinawm êm êm kan tihte pawh a tûk lawkah an rinawm leh lo ṭhin. Rilru mizo êm êm pu chungin sap leh vai zingah kan zuk awm a, rei lo tê chhûngin kan sap leh vai rilru ta êm êm a. Hei hi kan rilru sûk awlsam vâng bawk a ni. Hlêpru ve thei lo dinhmuna din laia rilru hrisêl tak pu, hlêpru thei dinhmuna din veleha rilru su zuka tuiêk nghâl ang chi te pawh hi rilru sûk awlsam vâng a ni. 

Dinhmun chhiat lâia biak awlsam, dinhmun ṭhat hnu-a induh êm êm ang chite hi thil ṭha lo tak a ni. Kan rilru a sûk hian kan nun pawh a su tel ṭhin. 

Mizote hi rilru so hma, no hma leh ho hma deuh kan ni. A chhan chu kan rilru a nghet lo tihna a ni mai. Hei hi hnam naupang leh tawnhriat nei tlêm kan nih vâng niin a lang. Kan hnam a upa tawlh tawlh ang a, tawnhriat kan ngah telh telh ang a, kan rilru a nghet tial tial mai ang. Tu emaw chuan thil sual ti ta se, thu dik tak kan hriat hma aṭangin kan rilru chu so nghâlin ṭawngkam chhe tinrêng kan chhâk khum sup sup nghâl a. Mahse, a chanchin khawngaihthlâkzia tu emaw chuan thiam taka a rawn ziah hian kan rilru no nghâlin mittui tla pûrin kan lainat thu kan sawi leh sup sup a. A hnu rei lo tê-ah kan rilru a ho telh telh a, fiamthu-ah kan lût zui ṭhin. 

Thil kan chîk peih lo a, kan dâwn a tâwi a, kan ngaihtuah a ho a, rilru nghet loh bawk nên thlêm thlûk kan awl. Thil ṭha lo lamah kan rilru a su awlsam êm êm a, thil ṭha lamah erawh a su mawh leh hle si. Mi paw’n an ti, an awih, an nei, an zawm, an pan tihah kan innghat nasa hle. Hei vâng hian sakhuana, politics, sumdâwnna leh kawng hrang hrangah thlêm thlûk kan awl. Kohhran hrang hrang za vêl lai kan awm phah chhante pawh hi kan rilru a sûk awlsam vâng a ni. Awlsam taka pâwl emaw kohhran emaw thurin hmanga thlêm thlûk theih kan tam. Kan la ruh hlawm êm êm zui. 

Rilru su awlsam deuh kan neih avângin kan mizopui ṭhenkhatte leh hnam dangho hian min zuam a, bum awl min tih phah. Kan chunga pawi khawihtu kan ngâidam fote hi kristian kan nih vâng âi mahin rilru su awlsam kan put vâng zâwk niin a hriat. Ngâidamtute hi kan kris êm êm chuang si lo! Nula hmelṭha deuh hmuh hian kan rilru a su dawt nghâl a, kan duh a, kan bêm zui a, zei taka kan bêm hian ṭawngkam thlum tak chuan chu nula rilru su awlsam tak chu a hmin nghâl a, naupang tê tê pawh inngaizâwng kan tam a, mipat hmeichhiatna kawngah pawh rilru su awlsam tak kan put avângin kan fihlim zo lo fo.

Hnam dang zînga mizo hmeichhia tam takten an zahawmna an hloh fo chhan leh an inneih fo chhante pawh hi he rilru su awlsam lutuk vâng niin a lang. 

Hnam dang ânka nêmah leh sumah an tuiral ṭhin. Hnam dang hmeichhiate erawh hi chu kum tam tak chhûng lehkha zirpuiin hna thawhpui mah ila  ngaihzâwn emaw mutpui emaw hi thil theih loh tluk niin a lang. An hnamah an chiang a, an rilru pawh a nghet. Mizo rilru erawh hi chu a su zuk a, a ‘Amen’ thuai thuai ṭhin.

Fuihpawrhte hi kan awl. Heti zâwnga rilru su awlsam lutuk put hi thil ṭha lo tak a ni.

Tlipna: Kan rilru hi kan nun dân thununtu a ni. Rilru su reng hi a hrisêl lo a, thil ṭha lama rilru nghet tak neih hi kan tân leh kan hnam tân a ṭha. Mizo kan nihna leh kristian kan nihnate hi kan rilruah hian nghet êm êm mai se, su dawta thin thlâk thuai thuai theih ni lo se. 

Rilru su har chuan fîm takin thil a ngaihtuah ṭhin a, awlsam taka bâwl theih leh thlêm thlûk theih a ni ve lo. Kan rilru a sûk ngun hian nun ze hrang hrang kan ngah. Chu chu a ṭha si lo. Rilru nghet, rilru fîm leh nun ze nghet neih i tum ang u.