HMASAWNNA KHAIRUAL

Tunlai chu TV chanchinthar puan han ngaihthlak leh chanchinbu hrang hrang han thlir hian kan sorkar thar minister-te Delhi a sorkar laipui dawr chanchin kan hre hnemin kan chhiar hnem hle thin a. Hetiang taka kan sorkar thar minister-ten Union minister-te an dawr ta suau suau mai hi tun hma lam kha chuan kan la hre ngai vak awm love a! Heti taka ram hmasawn nana an tan tlan ngat hi chuan ram pawhin hmasawnna hmel a hmu ngei ang. 

Kan sorkar hrawn hmasa kha chu Delhi lama kan minister-te feh chhuah kha a khat pharh mai a, kan Chief Minister kal kha a lar hlur zel a. Tunah zet erawh kan Chief Minister mai bakah a council of minister-te pawh union minister biain an thang ve fo a ni ang chu, chanchintharah kan ngaithla ta fo mai! 

Kan Chief Minister thar hi chuan a vawikhat dawrnaah Aizawl aṭanga Assam Rifles sawn chhuah an thlen mai ngamte kha a ropuiin a mak khawp mai. Chutih rualin inthlan hma, campaign laia nuihza fiamthu ang deuha kan sawi thin ‘Aizawl khawpui kawng tawt lutuk tih­ziaawm nana kawng chhawng siam’ tihte an thlen mai te leh, a zir chiang tur mithiam a rang a ranga Aizawla an lo lang nghal mai te kha a ropuiin a mak khawp mai! 

Heng hi chu hma­sawnna tur dik tak leh tluangtlam pangngai a ni mai a, mahse kan Sports Minister thar, Pu Robert Romawia Royte-in ‘Kan Mizo tlangvalte ke ngata Arakan aṭanga China kala, ke bawka China aṭanga Arakan kal thleng leh ngamte Central leh State sor­karin an chawimawi dan tur ngaihtuaha a hma laknate kha a ropui chu thu khat, Centrala a thlen ngam ringawt pawh kha  Mizo hnam tan chuan thil chhin­chhiah tlak tak a ni kan ti thei awm e. 

Heng lo pawh kawng hrang hrangin hma lakna an nei tih kan lo hre thina, tunah rih chuan a thlamuan thlak hle mai. 

Hetiang hma lakna kawng hrang hrang kan hriat rual hian heng hmasawnnate hian Zoram pum hi deng chhuak vek sela, sorkar hmasa ang khan thingtlang lam hi ngaihthah lo sela a tha hle awm e. 

Kei ni, thingtlang khuate pawh hian khaw­pui ang thoin hma­sawnna chu kan ma­mawh tho a. SEDP a’ Thingtlang khuate ro inrelna tihchangtlun’ tih kha a takin kalpui vat ni se a tha hle ang. 

Campaign lai khan he thil hi kan hruaitute khan Assembly Se­ssion hmasa berah ngaihtuaha, pass tur ni khan sawi a ni thin a. Tunah chuan MNF-in hneh takin sorkarna a chang ta chu a ni a, chuvangin thingtlang mipuite chuan nghakhlel takin a hlawhtlinna an lo thlir reng a ni tih hi kan roreltute hian lo hria se a tha hle ang. 

Kan sorkar thar hian ama pual budget ala hmang lova, sorkar hmasa kuang bang an la kui vel mai mai a ni rih a. Hetiang a nih avang hian thingtlang mite tan pawh beisei han san vak ngaihna a la awm lo. Mahse March thla emaw hi chuan budget session nei ngei turah ngai ila, an mahni pual budget an pharh hmasak ber aṭang chuan kei ni, thingtlang mite thawvenna tur a awm leh awm loh chu a lo lang mai dawn a ni. 

Chuvangin tun budget hmasa ber, thla leh maia pharh tur hi thingtlang mite hian uluk takin lo thlir teh u. He budget aṭang hian rilru put hmang pawh thiam turah i inngai phawt mai teh ang u.