MPSC kal tlang lovin hna lak kan ṭan dawn maw?

Kan pu tharte hi an viak a ṭha hlawm khawp mai a, kan pu ber pawh zingkar karah inperh chhuakin, a vir vat vat nghal mai a. Delhi tlangah Pu Modi ke bulah, sum hnar zuk ṭhutchilhin, herh hawn dan a zuk ngaihtuah nghal ruai a, kawng chhawngte pawh beiseihawm tak takin hei, mi thiamte a ko chhuak dawn ni awm tak a ni. 

"Project siam thiam tan, intodelhna tur, sum pui kan lo thawh ang e" tiin mipui min tiam bawk a. "Central-ah sum lah chu a li hian a li luau mai a, a dawhthleng kan siam thiam chuan, kan herh chhuak hiau hiau mai dawn a ni" titu kha an ni bawk a, beiseihna sang tak nen lo thlir phawt ila. 

Kan hotupa hian Mizoram chu, gas lipui chunga awm ang hial khan a sawi bawk a. Kan gas pawh thermal power siam nan hman a tum thute nen khan min hrilh kha a ni a, current pawh kan hnianghnar tawh mahna. 

Tin, kan in chhung thleng thlengin gas pipe hawlh lutin, eirawng kan bawl ve tawh turah beisei bawk ila. 

Khawi lam kawng nge ni zel dawn: Kan hotupa ber hian, "Sorkarna kan chelh veleh, hna thawh tur chu file-ah kan dah fel vek tawh, kan feh chhuak nghal mai dawn a ni," a ti a. Lal ṭhutthleng an luah chiah a, zu khap hna bulṭanin, dry day an puang nghal a. Ehe, an ti tak tak nghal mai a... kan lo ti a. 

Kan hotupa ber chu zingkar karah, kawng chhawng siam dan tur enin, a phar kual ngal ruai bawk a. Wow, an ti tak tak zel mai... kan lo ti leh a. Zirtirtu hlawh hrensak an han pe leh ṭhuai mai a. A ha, khawia pawisa nge hman tur lo awm reng reng a? tiin min han surprise leh ngei a! 

Cabinet meeting an nei a, MLA car leina tur, a man an han ti sang ta alh mai chu leh. Khai a, a invulh zawng bawkin maw an kal leh dawn? Anni hi MLA hlawh leh pension ti sang tawhtu kha an ni a, tiin kan lo nur deuh leh ṭan ta a ni. 

Hna lak an ṭan dawn e: Chutichuan, hei hna lak an han ṭan dawn a, zirtirtu sang khat dawn lak an tum a, a hmanhmawhthlak avanga MPSC kal tlang lova an lak tur thu an rawn sawi ta mauh mai le. Sorkar hna lak hi fair taka kalpui a har dawn ava ang em! Political appointment hi a hnawk tehreng nen, party mi kum 10 zet awpbeha awm tawh, induhsak theihna kawng sial tur an ang ta tlat mai. 

MPSC kal tlanga hna lak chu, written test, interview pal tlang a ngai a. A fair thei ang berin an kalpui ṭhin a, contract leh hna nghet lo pawh nise, hun reia dah ngheh leh tho tur kha an ni a, party induhsakna kawng hawnna chu a nih hmel dawn a ni. Kan hotute hi an che sual ṭan der dawn a va ang em? 

Ram ven him lam pawh hi...: Mikhual cham rei mawlh mai hi, hmanah khan Pu Ṭhena khan mi 5000 lai kha a hnawt chhuak a, kha tih lai khan tuna kan pute hian, "Kha kha chu lo ti tawh suh u, keimahnin kan rawn hma ang" tiin, ramhnuai aṭang khan an rawn chah a ni awm a. An lo haw hnu hian, kum 10 an lal chhung khan an theihnghilh hman ni maw? Tunah lah MZP lam chuan "Mi 30,000 lai an tling tawh" an ti a. Home Minister, Mizo puan venga, thangchhuah kawr ha kan nei bawk a, Mizo pawh ni lo, mikhual cham rei na na na chu, kuangkuah reng a chak lo turah ngai ila. Kan police-te pawh ramri lamah dah an tum kan lo beisei ve ringawt a, beisei ang an ni pha ang em le? 

Assam nena ramri buaiah pawh, MZP ten vuak an tuar ṭum khan, "Kan hun lai kha chuan, ramri bul hnaiah police out post kan dah a" titu kha an ni a, an dah leh thuai beisei bawk ila. 

Kan pu tharte hi ‘Chhantu baihvai aw kan Zoram, Ka lainatin ka hmangaih che' tia ramhnuai khawhara an awm laia, an ṭah hla kha a ni a, a thluka tawp mai lovin, dik takin han che tak tak teh se.