CHA NGE ACH?

Vanglaini Vol XXXIV no. 12, January 17, 2019 Thursday chhuakah khan Mizoram Journalists’ Association General Headquarters member te tân a thlawna inen­tirna (free clinic) neih a nih thu a inziah bakah 2009 aṭangin kum tin neih ṭhin a nih thu kan chhiar ṭheuh awm e. 

Vanglaini Vol XXXIV no. 22, Janua­ry 29, 2019 Tuesday chhuakah thung erawh chuan Health Minister-in MJA member-te puala free health check up buatsaih khârna a hmanpui ṭuma a thusawi “Damdawiin ṭha tak kan neih theih nân theihtawp chhuah a ni ang” tih thupuiah hmangin a lo ziak leh a. 

Ka rilru lo lang chu ‘Civil Hospital Aizawl nge Aizawl Civil Hospital’ tih hi dik zawk ang le? Vanglaini chhuak hmasa zawkah khian Civil Hospital Aizawl tih vawi khat ziakin, a lamtawi CHA vawi 11 a inziak a, paragraph 8 lekah vawi 12 lai a inziak. A chunga kan sawi chhuak hnuhnung zawkah erawh chuan a phek hmasa berah Aizawl Civil Hospital (ACH) tih vawi 8 a inziak thung. A dik zawk hre turin Vanglaini aṭang ringawt chuan hriatthiam a har khawp mai. 

Vanglaini ka chîk ṭhin dan hi inhriatpui tawn ve ila. Thla khat lak man Rs 100/- aṭanga Rs 150/- a tihsan a nih ṭum khan rei fe chu Rs 150/- tih inziahna lai hi hawrawp lian bikin ziah a ni. Ziah dik loh palh emaw milem leh a thu invuah rem dik lo emaw awm te hi kan hmu chat chat a. A thu leh milem ngai a tuka a lo chhuah nulh ṭum te hian kan hawihâi thei teh a nia! 

A phek (paper quality) chhah zawng a danglam deuh ṭum te hi kan hre thei nia mawle! Deh nuam deuh leh nuam lo deuh lehkhapuan pawh hman a ni fo ṭhin. Fakna huanga ziah dik loh palh hlauh hmu fuh chat chat thei tur khawpa chhiar chîk hi veng tinah ṭhahnem tak an awm awm e. Chanchinbu semtute pawh hian an hre khawp mai, “Sem chhuah zat inang rengah a rih deuh ni a awm ṭhîn” an ti. Vanglaini chhungkua kan nih chuan ‘dik leh ril, rawn tlâk leh rin tlâk bawk si hi chhiar kan inbeisei a ni. 

Civil Hospital, Aizawl hi sawrkar damdawiin a ni a. Sawrkar record (ka hmuh phak chinah) leh lehkha pawimawhah hian Civil Hospital, Aizawl tia ziah leh hriat/ sawi vek a ni. ISO certified a ni bawk a, certificate-ah pawh Civil Hospital, Aizawl Mizoram tiin a inziak. Amaherawhchu, Vanglaini chanchinbu hian Aizawl Civil Hospital tiin a ziak char char a. A thawktute ka hrilh pawh hian ‘Vanglaini ziah dan phung a ni mai thei’ a’n ti tlat ṭhin. 

Inhmin tak tak a har a ni ngei ang, dam­dawiina thawktute ngei ngei pawhin social media lamah a ziah dan tur dik zawk an tarlang fo chung hian chanchinbu enkawltu lam hian Aizawl Civil Hospital (ACH) tiin an ziak leh ṭhin. Nalh an ti a nih dawn hi tih ngawt loh chu sawi tur a vang khawp mai. 

LPS leh Zonet pawh hian Aizawl Civil Hospital tiin an puang fo mai. A dik zawk hria kan awm chuan sawi fiah ni se, a dik zawk chu hman char char ni thei se. Hming pahnih neih hi a inhmeh lovin a rem ṭeuh lo.