BULPUI HRIAT CHIAN

VLCC Femina Miss India 2020 runner up Manya Singh-i chu kumin February ni 10 khan Miss intihsiaknaah 'Runner up' lallukhum khumtir a ni a. Amah hi Mumbai veng pakhat Kandavali East-a cheng niin Thakur College of Science & Commerce ah a zir. 

Runner Up lallukhum nen an veng a rawn haw chu ropui takin an lo hmuak a. Zorama Idol/ Icon/ Miss te kan cheibawl ang deuh bawkin amah chawimawina kawng zawhpui a ni a, he kawng zawhnaah hian ama ta ni lo car man toah chuang ve lo vin a pa eizawnna autorickshaw-ah, a pa khalhah ngat chuangin, a bulah a nu in a ṭhutpui a. A pa ṭhiante leh a auto driver puite ho in an zui bawk a, auto rickshaw ringawt pawh meter 500 zel thui an in zui. 

He nula te hian chawimawina leh hlawhtlinna a chan hnuah a bulpui a theihnghilh ve lo tih lai hi ka sawi châklai chu a ni. Hnehtu lallukhum nen ropui takin a lo haw a, an veng tlabirh ve taka an in ropui vak bik lo chu chhuang takin a rawn pan a, a pa eizawnna auto rickshaw chu zahpui lo mai lo vin, amah chawimawina hmanrua atan a hmang a. A college luhna zirlaipui leh zirtirtuten chawimawina kawngzawh an neihpuinaah chhuang takin a pa auto-rickshaw chhung aṭangin India hnam puanzar a pawt pharh a. An in kawtah a chawimawina lallukhum nen thla a la a, a hnungah chuan car man to leh scenery ropui emaw, studio ropui emaw a background-ah a lang lo, an in kawt chep zet, a zira pangpar an khawi ve luk lah, tute kawr emaw inzar duai mai tih vel a ni; mahse he nula hian a nihna a zahpui lo va, a chawrchhuahna a zahpui lo mai ni lovin chhuang takin a pholang ngam zawk. 

Hei hi a ni Mizo ṭhalaite hian zir ve se, entawn ve se ka duh ṭhin. Eng hlawhtlinna emaw kan han sual chhuak a, eng dinhmun sangah emaw, eng lalṭhuthlengah emaw kan han ṭhu ve dek dek a, mahni khua, veng, chhungte zahpui deuh titih mai kan la ni em? TV velah kan lang ve dek dek a, city bus chuan kan hreh ṭhin em ni kha? Gas bûr put kan zah ṭhin maw? Kut hnathawh leh mi hnuai inhlawh te kha kan zak nghal deuh ṭhin em kha? Changkanna leh tunlaina han kan bulpui leh nihna (identity) hi min hliahtir suh se. He nula pawh hian a in leh lo, a nu leh pa, an chhungkaw eizawnna a zahpui loh avangin khawvelin a ngaihsan phah ta sauh zawk a ni. 

He nula hian thu ropui deuh mai sawi a la nei cheu a: "Miss India pageant atan ka lokal dawn hian Plan B ka nei miah lo. Ka hlawhchham chuan eng nge ka tih leh ang tih ka hre lo. Tunah chuan thil engemaw hlenchhuah ka nei ta, heta ṭang hian ka nun chu hmalam panin a kal zel ang," a ti. 

Plan B nei lo khawpa hlawhtlin tuma a theihna zawng zawng nena a inbuatsaih lai takte hi a ropuiin a entawntlak mang e. Kan nunah hian Plan B kan ngah lutuk hian kan thlen tur ang min thlentir thei lo fo zuk nia.