Lei chim leh kan politician-te tâl vel dan

Nikum, kum 2018 February 13 khan Lei a chim tih kan la hria ang a, nikum December 22-ah khan lei dang a chim leh tih pawh kan la hria ang. 

A hunlai khan ngawih han chuh deuh mah ila tunah chuan inthlante a zo tawh bawk a, lei chima kan politician-te khawsak vel dan zahpuiawm tak hi sawi chhuah loha awmah chuan a uiawmin democracy rama awm manah ngaihdan huaisen takin puang ve phawng phawng tawh ang hmiang. 

Lei chim hi a awm nual a, lei chim pahnih chiah thur chhuak dawn ta ila, a awlsam zawkna turin, pakhatna chu February, 2018-a chim ta Sesawng bula Tuirini lei chim kha a ni a, a pahnihnaah chuan Thenzawl leh Buarpui inkara kum 2018 December thlaa lei chim kha a ni leh bawk. Lei chim hmasa zawk hi Congress sorkar lai a ni a, lei chim hnuhnung zawk hi MNF sorkar ṭan tirh khan a ni. 

Sesawng leh Khawruhlian inkara Tuirini lei dawh lai hi February 13, 2018-ah a chim a, vanduaithlak takin  lei chim laia zawhtu mi pakhat a thi. A hunlaia media hrang hrangin an report dan chuan mi pathumin thir lei, ‘bailey bridge’ dawh thar a chhuat la phah loh chu an zawh a, lei laihawl vel an thlen laiin lei hi a chim ta a ni awm e. 

Lei chim lai hian hetih hunlaia Chief Minister Pu Lalthanhawla awm loh hlan a nih avangin Home Minister, Pu R. Lalzirliana hovin lei chim chungchang hi an sawiho a. Aizawl DC hnuaiah Magisterial Inquiry din ni se, Inquiry din aṭanga thla 3 chhungin a report sorkarah thehlut se tih a ni. 

Pu Lalruatkima, hetih hunlaia MNF MLA chuan, Tuirini lei chim hi a hmunah a tlawh nghal a, Moral Res­ponsibility lain PWD Minister Pu Lalthanzara chu bang turin a ti. Tin, eptu pawl pathum MNF, PRISM, MPP te chu February 15 khan an ṭhu khawm a, “Kan ram hruaitu, kan aiawh tura kan thlante'n harsatna a thlen changa mawh la duh miah loa an awm leh mipui buaina chinfel kawnga rilru an seng lo hi pawi kan ti a, PWD Minister bang turin kan phût a ni,” tiin thu chhuah an siam bawk. 

PWD Minister hian Cong­ress Bhawan-a a thu­sawiah thiamthu sawi tur an neih loh thu leh an vanduai thu, ban a inpeih thute a sawi a, mahse a bang ta chuang lo. 

December 22, 2018 chhun khan Thenzawl leh Buarpui inkara Tlawng luia thir lei, bailey bridge chu motor pahnihin a rualin an zawh a, a chim. Tantia Construction Company truck pahnih a ruala tlanin an zawh chim a ni. Lei chim hi a hlimchhawnah politician-in an tlawh lova, Minister-in a tlawh ve loh bakah eptu lam pawhin an tlawh chuang lo a ni. 

Lei chim hmasa khi chu inthlan hma a nih avangin sorkar lam pawhin an ngai pawimawh a, CM awm loh hlanin Home Minister hovin an ṭhukhawm a, an ngaihtuah nghal chuk chuk a ni. Tin, mipui hma ngai em em anga langin eptu lam pawhin an tlawh nghal a, MLA hovin media lamah an tarlang chuai chuai a ni. 

MNF-in sorkarna an han chang leh chiah a, vanduaithlak tak maiin lei a chim leh hlauh mai. A hmaa lei chimna hmuna rang taka thleng ṭhin MNF mi leh sate kha an lang ta reng reng lo mai. Inthlan zawh tawha thil thleng a nih vang nge ni mipui nawlpui hriata politician-in an tlawh pawh hriat a ni ta lova, PWD Minister chu sawi loh midang pawh an ngawi thei em em tawh a ni. PWD Highway Chief Engineer-in a tlawh tih kha ka hriat chhun chu a ni ta mai a ni. 

A hnu deuhvah a zawh chimtu driver an man thu kan lo hmu leh a, Agriculture Minister, Pu C. Lalrinsanga’n kum thar hnua a tlawh kha Minister tlawhtu awm chhun a ni ta nge media lamah chuan hmuh tur dang a vang khawp mai. 

Lei chim hi kan zavaiin, politician leh cian lovin pawi kan ti tlang a, mahse pawi kan tih dan a inang lo. Congress ho khan an hunlaia lei chim kha pawi an tiin vanduaithlak an ti, kha kha pawi ti takin eptu lam pawhin an va tlawh a ni. MNF sorkar tuk lawkah lei a chim ve leh a, sorkarna siamtu MNF tan chuan thil pawi tak a ni. Nimahsela a hmunah an tlawh ve tawh lo, an pawi tihna kha inthlan hnuah chuan a tlahniam ta a ni. MNF leh Congress chang ni lovin eptu dang ZPM-te pawhin hetiang thilah hian ram leh hnam hmangaihna tak tak hi lantir ṭhin tawh rawh se.