Diknaa roreltute ro hlu ber

Itna leh awhna thinlung hi vawiin ni thlengin mihringte thinlungah a la bet tlat a. He awhna sual hi keimahniah tihpuitlina a awm chuan chapona te, chin tawk nei lova khawsakna te, siamtu theihnghilh phahnate a lo awm ṭhin. 

Mahni ta tur ni lo, thildanga hman tur lo awt tlattu, sawr­kar hnathawk leh Politician te chuan, anmahni tan lak luh dan an ngaih-tuah a, a tawpah chuan an chang leh nge nge ṭhin a ni. 

Mi ta kan awt a nih pawhin keimahnin kan thawh chhuah ve theih thil a ni tur a ni a, chutiang chu keimahni ngeiin kan thawk chhuak ve a nih chuan kan lo intodelh zawk dawn a ni. 

Mi ta emaw, ram danga hman tur emaw kan awt a, mahni tana kan lakluhna hian a la luttu leh a chhungte nun a tichhe vek a, khawtlang tan phurrit a nih mai bakah ramin a tluk chhiat phah ṭhin. 

Mahni chan tur ni lo la luttu chuan thawh rim a peih lova, awlsam taka lak luh leh dan a ngaihtuah reng a, remchang a hmuh veleh ama tan bawk a la lut leh mai 

ṭhin. Kan ramah mahni ta tur ni lo eirukna hian bu a khuar ngheh tawh em avangin, thil ti dik lotu pawh chuan a ruka ei ai chuan tiin ualau takin an ei ho ta zawk mai ṭhin niin a lang. 

Zoram hian state dang a um phak ve theihna tur chuan, eirutu lo pen chhuak sela. Eiru ngai lote nen ṭhahnem ngai leh dik taka an thawhho a va hun ta em! Democracy sawrkarna hnuaiah kan Zoram ngaihtuahawm tak hi mi fing leh fel tak takten kum tam tak an lo kaihruai tawh a. A chhunga chengte kan invulh lian a, mahse kan ram Zoram hi enkawl ṭhat a nih loh avangin hma a sawn thei tlat lo a ni. 

Mahni induhsakna te, tute emaw duhsak bingna te avangin Zoram hmasawnna tur sum awm sa-in a daih loh phah ṭhin a, chungte chuan ram hmasawnna tur kawng hrang hrangah bu a khuar ngheh tawh em avangin kan Zoram hi siam ṭhat hleih theih a ni lova, ramin hma a sawn thei lo a ni. 

Zoram nuam leh hmasawn thlen turin nang leh kei hian mawhphurhna kan nei. Eiru loten eiru ṭhinte an sawm chhuah a, Zoram hmasawnna tur atan lungrual tak leh dik taka hma an lak ho a va hun ta em! 

Mahni chan tur ni miah lo hmanga hausa thur thurte hian ram hmel an tibal a, anmahni duhsak taka thlangtlingtute rilru an va tina ṭhin em. 

Mi rinawm lote chu Zoram tana ṭhahnem ngai taka thawktu, mi dikte ṭhutnaah an ṭhut ve reng a rem lo ang. Diknaa rorel tlattu politician-te hi ram tan an va hlu em! Diknaa rorelna hnuaiah Zoram a awm hun chuan mipui vantlang nun a hlim ang a, ramin hma a sawn ve tawh dawn a ni. 

Mi dik chu mi awh­awm a ni a, a thinlung a hlim a, amah enkawltu Lalpa hnenah lawmna thuruk ṭawngkam a sawi sen rual loh a nei ṭhin. Mi thil tih dik lo a hriatin chu chuan a rilru a tina ṭhin. Chutiang mi dik chu miten an zah ru tlat ṭhin. 

Nang leh kei hian dikna chu kan ro hlu ber atan kan thlan theih hunah mahni ta lo tur awhna a tlem ang a, kan chan tur ni lo kan hmaah min rawn hlui mahse kan hnar thei tawh ang.