Kawng chhawng hi flyover a ni lo

Mizoram khaw­pui Aizawla traffic jam pumpelhna tura tuna kan Chief Minister thar zah­awm tak Pu Zoram­thanga’n a siam tum kha ‘fly over’ mai mai angin an sawi a, chu chu ni lovin kawng chhawng tak tak, kawngpui chunga inphah phei deuh duai a ni. 

Kawng peng ṭhuam ṭhenkhata tawi te tea dawh mai hi a dream leh vision a ni lo tih chu inthlan hmaa a interview-ah khan chiang takin a hmuh theih. 

Kan Chief Minister a fakawm em em chhan chu MLA pawh ni lova a awm chhung khan a lo awm mai mai hauh lova, Aizawl khawpui traffic jam tihtawp dan tur hi a lo ngaihtuah char char a ni. 

Chief Minister a ni chiah chu a lo dream ang ngeiin Aizawla parking tam zawk siam belh dan tur pawisa tam tham tak an siam nghal rup mai a, Parking House Support Scheme (PAHOSS) hnuaiah hian parking ṭha tak tak kan neih belh ṭeuh dawn a ni. 

Ama sawi ṭhin angin kan Chief Minister hi a ‘think big’ a ni. Aizawla kawngpui peng ṭhuam pali panga vela lei dawh satliah hi kan Chief Minister sawi hi a ni lo. 

Minister pakhat leh politician ṭhen­khat ṭawngkamah Aizawla kawng chhawng kan Chief Minister Vision kha fly over mai mai ang hi niin a lang a, mahse Zonet leh LPS a inthlan hmaa kan CM interview kha chiang takin YouTube-ah hmuh theihin a la awm a, tuna kan kawngpui neih sa chungah hian a inphah phei ruah dawn a ni. 

A ban phun dan turte pawh a rua­hman lawk vek tawh mai bakah a hisap fel vek tawh a, Aizawl traffic jam buai ṭhin hi tihtawp vek a intiamah duhtawk mai lovin parking-ah pawh harsatna awm lohnaa siam a tiam a, chu chu “Tuna in awih loh pawhin kum thum hnuah chuan in awih tawh ang,” ti lam hawiin a sawi tawh kha a ni a, a ban pawh a thlur phei sung dawn a tihte kha khawi laia emaw fly over tawo te te ang a sawina a ni lo. 

Kan Chief Mi­nister hi thil ti tak tak mi a ni, Aizawl khawpuiah hian kum thum chhunga traffic jam awm lohna tur khawpa beih a inhuam avang hian kawngpui chungah kawng dang a indawh phei zui dawn tih hi amah ringtute hi chuan kan ring tlat a ni.