Mizo dawrkai vrs Vai dawrkai

Tute nge an nih - Kan thlahtute lam pangah pawh hian sumdawnna lam sawi tur kan nei teh chiam lo. Chhurbura thawnthua paihte sumdawng tih vel bak kha chu, kan nei lo hle. U.T, kan nih hnu vel aṭangin sumdawnna lam ṭhenkhat chuan an ti ṭan a. Hlawhtling tak takte kan awm ve a, mah se kan uar teh chiam lo. Vawiina dawrkai kan hmuh tam zawk hi chu hman ni lawka mi, kum 5 em pawh la tling lote kan ni hlawm.

Vai kan tih hote erawh an upa thei hle. An nu leh pa, pi leh pute, kum 30/40, chuang lai lo tih tawh ṭhin te an ni hlawm. Hei vang hian thil chinchang an hre hle a, vai chhia/ naupang kan tih mai mai te pawh hian rilru an nei thei riau ṭhin. Keini erawh chuan experience kan la neih loh vang nge ni, sumdawn dan te hi kan la thiam tawk lo, kan taima lo, a tawpah kan dawng leh der mai ṭhin. Hetih lai hian vai thir chhe zawng mai mai emaw kan tih te khan kum 4/5 te a lo vei chuan bike/ scooty an khalh tur tur tawh mai ṭhin a ni. An tei rei peih a, keini erawh kan hmanhmawh a, kan nghak hlei thei lo ṭhin. 

Hmalakna - Kum 1980 chho vel lai aṭang khan Mizoten hnam feeling nei ṭanin hnam dang dawrkaite kan ngaimawh ṭan a. An dawrte kan suasam a, kan um darh ta vek a. Chumi hnuah dawr neitute lamin Mizo chauh an han luah tir ve ṭan bawk a. Tlawmngai pawl hrang hrangten hma la zelin, hnam dangte chu nek chepin an awm ta hle a. Sawrkar lam aṭang pawhin dan a awm ve bawk a. Tuna la awm hote hi chu Mizo hming hawh an ni hlawm tawh ang. 

Zokhaw lamah te pawh hma lak zel a ni a, sawt pawh a sawt viau mai. Tunah hian Mizo sumdawng pawlte kan awm ve ta nuk a, heng te hian eng emaw hlekah chuan hma la thei zel tura ngaih an ni. Hetih lai hian kan sumdawng pawlte an ṭhat loh a, duh duha thil man te an tih danglam zung zung ṭhin chuan mipuite an lawm lo ang a, thlawp an hlawh lo thuai mai ang. Hetiang thil hi VISHAL leh Bazar India chungchangah khan kan hmu ṭheuhin ka ring. 

Ka thlir dan - Hman deuh aṭang khan tiffin tur biscuit hi ka lei lawk ṭhin a. Eng emaw deuh lai aṭang khan, ṭha lo tak, vin deuh takte hian min ti ta fo mai. A chhan tur ni awm ka ngaihtuah vang vang pawh hian ka hre mai thei lo. Mite chuan regular customer neih te an duh hle ṭhin a, anni (Mizo) erawh chuan duh mang lo ni awm takin an khawsa ta tlat mai. A hnu aṭang chuan ka bazar dawn apiangin ka ṭawngṭainaah te ka telh ta ṭhin a, a zia lo hle a ni. 

Ka rilru te te chuan vaiho kha an ngaihawm mang e aw, te ka ti a. Tichuan, loh theih lohin vai dawr kai awm chhun te chu ka pan ve ta ṭhin a. Vai chu dawr lo hram zel teh ang han tih pawhin, a tih hleih theih loh; Mizo dawr dawn chuan mi duh lo chung chung dawr tum kan ang ta riau zel mai. Hetiang hi kan ni ve deuh a, kei lo pawnin an tawng ve foin ka ring. Chuvang chuan vai dawr 2/1, te hi chu awm ve zel se, inzir nan, in en let nan te a ṭhain ka hria. Mizote pawn an ramah sumdawnte eng tik hunah emaw chuan kan la duh ve maithei asin. 

Hmalam hun - Khasi, Assamese-te kan hria ang a, tunah chuan anmahni hmuh tur an awm mang tawh lo. Sumdawng lian, dawrkai zawng zawng deuh thaw chu hnam dang an ni deuh vek tawh. An tan tih ngaihna a awm tawh lo, hnam dangin an chim hneh tawh lutuk a, a chang changa nawrh huaihawt bak chu, tih theih an nei tawh lo. Keini erawh kan harh hma, kan vannei hle mai, thil a kal thui hma in kan nawr chhuak leh hman deuh vek a. Amaherawhchu, kan in hre tlang ang a, Mizo dawr kaite hi a tlangpuiin dawr kan hrehawm ṭhin hle. Dawr neituten kan dawr nghakte biak nuam zawk ni tura kan hrilh ve fo a pawimawh hle. 

Kan hriat ṭheuh angin Aizawlah phei chuan hnam dang dawr kai kan nei tam ta lo, hei vang hian kan hmalam hun a eng hlein ka hria. Tun ang renga kan kal theih chuan chimral mai pawh a hlauhthawnawm lo hrih hle mai, amaherawhchu kan fimkhur hle reng a ngai tho ang. Mizote hi sumdawn thiam tak chu kan la ni lo tih chu kan in hre tlang ang a, mah se, kan in dawr luih hram hram hi a ṭul hle mai. Nakinah experience kan neih ve hunah kan la ziaawm chho ve mai ang tih a rinawm. Mut fuh loh ṭum te hi a awm ve a, mah se a nazawng hi chuan mut fuh loh tum lo hram ila. Customer kan lo welcome thiam viau ṭhin chuan kar loah miin min lo hria ang a, min rawn pan ruih ruih mai dawn a ni.