Lengpui Airport road leh traffic

Kan Aizawl khawpui kawng hi a chep tawh em em a, trafic zam avangin buaina kan tawk chamchi ta mai.  Brig. T Sailo (RIP) khan thil thui tak thlirin, kan ram trafic zam tur hmu lawkin khawpui thawl zawk a awm theih nan Aizawl khawpui zauhna tur Luangmual ram a valh (acquired) chiam a. Mahse a rorel a rei loh avangin a hnua ministry lokal lehten an tuipui ve lo nge, Remna Run area te, Luangmual complex hmun te tak ngial pawh mimalin an nei zo leh ta ni awm tak a ni. Sawrkar hian engti kawng zawng emaw a kawngpui sialah a pian thar loh chuan, khan ṭhenkhat kawngpui in sut khawmna lai, entir nan, Vaivakawn te phei hi chu inhnawh ping thei mai a ni reng a ni. 

Lengpui Airport road: He kawng hi kompani peng aṭang lo chuan hmun dang panna a awm lo tluk a ni. Airport Road kawng pakhat chauhin a pawh hi a risky a, flight reporting time thlen hman loh a hlauh awm ṭhin. Rawtna pakhat han siam ta ila. Kan sawrkar hotute hian survey an lo nei tawh nge nei lo chu ka hre lo na a. Mizoram University Road hi Ramrikawnah a kal a, Ramrikawn aṭang hian Central Jail-ah a kal phei a, jail tlan pelin Sakawrtuichhun kawngah Central Jail main gate thlang hmar lam ep ruamah hian kal peng ta sela. Tlaklam mualah hian liam thlain (Industrial Estate ram an ti emawni) ah hian kal thlain, kawng kawi thleh ngai miah loin Sihhmui bridge/ Tlawng lei kha a zuk man mai dawn a. Satellite google.com (maplandia) aṭanga en hian ram rem tak vek niin ka hria. 

A hnuk a tawi em em a. Company peng aṭanga tuna highway hi chu a kawi hnemin leimin thei a pui a tam a. Company peng thlang ang lei thawp (loose soil) a tam a, leimin avanga Kawnpui kawng lama hel vang vang te pawh Chrismas dawn khan an awm a nih kha. Monsoon a nat changin lei min mai thei a tam a. Tin, High way traffic pumpelh nan a him tawk hrim hrim bawk. Tunah hian Vaivakawn aṭangin Ropaiabawk Ramrikawn - Tanhril ram tlaklamah Sihhmui lei (sak thar) kha a man mai dawn a ni. 

Tuna kan panna aiin a let deuh thawin a lo hnai tawh zawk bawk ang. 

1.    Tichuan, Khatla - Capital Complex leh Chawnpui - Luangmualah kaiin Ramrikawn rawn man leh se, Airport road hi reporting time man turin thlamuang takin kan tlan tawh dawn a ni. Kawng pumpelh (alternative rout) a lo tam chuan Vaivakawn traffic buaina pawh a tlem sawt ang. 

2.    Mizoram University kan nei a, Ramrikawn piah lawka awm a ni. Lengpui Airport-ah Visiting Professor lo ṭumin course leh seminar-ah lecture pein, hmun dang lecture pe leh turin an thlawk chhuak leh nghal mai thei tawh dawn a ni. Kan MZU pawn ram changkan te dinhmun ang (world class education) luah ve in ramdang visiting professor han pawh mai kha a awlsam tawh dawn avangin. International level a in hlankaina tur kawng pawimawh tak a ni. Heng thil hi changkanna ropui tak a lo tling tawh ang. Development grade sang deuh sual te hi kan intih hmuh a hun ta e.