Fur khat daih kawngpui!

Tun lai chu kawng a khu viau mai a, kawng diak a in nawr hrep hnua berh pheng phunga Aizawl bazara cement bag hlui ung deuh pu chunga zuanthlak chheng ai chuan mittlangkawma vut tling thura tumram thlen chu a la hahdam tal. Chu tih mek lai chuan tuna khu chum chum hi ruah sur rual ruala diak leh mai tur a nihna erawh chuan ngaihtuah a ti thui hle mai. 

Furah zoram kawng a chhe leh dawn tih hi zawlnei ni ve lem lo, chawlhni tlai a, a ba ngata rui ve ṭhin satliah tan pawh sawi lawk ngam a ni kum tin a. Kan hma lawka fur lo thleng tur pawh a cho awm loh khawp mai. Zofa tlemte zingah pawh hian mithiam chhinchhiahna lehkha nei chu an kat ve ta nuk mai a, kan thiamna erawh zoram thar lam atan an khek a ni chek ang a, thleng zo loin an khek hlum ṭhak ang tih erawh a hlauhawm viau. Thiam viau si, ram leh hnam tana chhawr tlak hauh lo kan nih hian Zoram tan engnge kan hlutna? Nge ni a, ṭhat hmel deuha lang, tlo chuang miah lo a thawh dan hi kan thiam chiang zawk? Entawn a pass te kawng siam ni awm tak hian mam purha langah pawh kan tlan sawt boh boh mai chu nih hi. 

Kan zoram kawng hi ṭhalvaekchar lai, motor hnuai khampui sawh ri buk buk lova kan tlan khuk chum chum chuan a ṭha chu a ni mai a, a ai ṭha han beiseina em em pawh kan nei lem lo, beisei tur kan nei lo pawh a ni fahmiang. An siam tuk vel a pawnlang ban chip chep a, a dum hil ve bul mai hi chuan ha hipin kan fak ve chu a nih hi. Kan fakna chil per pawh a hul hma leh kan hani ro a hnawh hma in phaitualhnim zikno in a rawn tawp pawp a, valeisawt tla in an thaidarh leh tak kha. 

Ṭhal khawro laiin kan mithiam chhuanvawrten an thiamna zawng zawng zoram tan sawr chhuakin, ram hmangaihna nen an han thawk a. A dum ve zúi mai, mahse fur khua a lo ni a, ṭo haw in tuihawk a rawn hnuk chhuak a, kar hmasa lawka kan siam an len khawk leh mai ṭhin erawh hi chu tu thiam loh nge ni ang. Kan mithiamte han dem dawn ila, an theih tawka ṭha, an thiam leh ṭha ber nia an hriat hmanga an ram tana hnathawk an ni a, an ni chu puh ngawt chi an ni lo. Fur hi a thiam lo chu a ni ta ber awm e! 

Hmanni chu kan in khawilai lai emaw chei nan tiin kan khua aṭanga hnai deuha lui balu lei mai kan tum a. A chin hre deuh kan zawh a, kan biak kual hnuah mi pakhat chuan, in sakna tlak balu ṭha a awm tawh lo, contract thawkho in an la duha a ni mai, a ṭha tawh lo, contrac thawhna tawk chauh a ni a ti ta then mai a! Mahni in sak nana hman duh loh kha vantlang in sak nan kan iai lo a, vantlang kawng leh kopang rem nan kan iai hek lo. 

Chu ti chung chuan inkhawm chak ber awm hian kan phun kan phun a. Contract hralh leh kharchhawng an hlawk viau hi a lo mawh lo e, thawhlawm hmangin an hmingchhe tur an in chhan­dam leh mai dawn alawm! Kawng pawimawhzia chu hrilh nawn ngai kan awm lo, chuti chung chung chuan kawng ṭha kan nei hleithei lo chu a nih hi. Mahni ram kawng pawh siam ṭha thei lo sawrkar, department, engineer nih hi a zahthlak miau lova, beisei san viau chi chu a ni lo. Leimin leh khuarel chhiatna dang vanga kawng chhia hi chu in dem theih a ni lo thung. Mahni ram, mahni kawng ngei pawh siam ṭha thei lo sawrkar, department, engineer nih a zahthlak hunah chuan kawng ṭha kan nei ve thei tawh ang. 

Fur khat paltlang thei lo thiamna chauh hi chuan ram ropui a hlat e mai.