Covid-19 vanga puan a nih chuan zan curfew hi hlih a hun tawh

Keini ang rual chuan kan nu leh pate aṭanga ka hriat 'curfew a vin hler hlur' tih chu kan hrethiam ve ngai dawn lo emaw kan tih laiin, Covid-19 avangin ṭawngka aṭang chauha kan lo hriat ṭhin curfew nihna chu a tak ngeiin kan tawng ve ta. Tun ṭumah erawh chuan hripui len vang a ni. 

Rambuai laia cur­few-ah chuan hnamdang an duty tlangpuiin ka ring a, tun ṭumah erawh kan Mizopuite ngei an duty a ni. Chutihlaiin, kan police duty ṭhenkhat hi chu rambuai laia duty-te ai khan an vin hler hlur maithei. 

Covid-19 avangin kum khat dawn chu zan lamah bik curfew puan a ni ta. Hun a liam a, kan nunphung pawh thlah zalen telh telh a ni a, inkaihhruaina a khauh tak tak lai leh tun dinhmun thlir hian tam tak chu jail tang chhuak aiin an thawvengin a rinawm.

Hun liam tawhte thlirin Mizoram sor­karin zan lama curfew a puang hi a demawm hauh lo. Mah se, tuna kan nunphung thlir erawh hi chuan curfew hi Covid-19 vang ni lo, thildang vang zawka puan chhunzawm zel a ang ka ti. Ṭhalaite mai bakah mi tam tak chu eizawnna dan chepin a awm mek a ni.

Chhun lamah kan ri luih luih a, kan zi hut hut a. Biak-ina inkhawm pawh phal a ni tawh a, zai erawh phal a la ni lo. Chutihlaiin political party-te erawh an ri luih luiha an lam luih luih thung si. Kan boruak thlir hian inthlahdul hret hret hi thil tihawm tak a ni ta. 

Chhun lama nilenga hnathawk tan chuan nunphung hi a ho ruih tawh a ni. Chhungkaw tam tak chu chhun lamah inhmukhawm thei loin, zan lamah hun thawl hmangin, pawn lamahte an teihawi ṭhin. Chung tan chuan kan tun dinhmunah chuan intihhlimna hun leh hmun tur a awm ta meuh lo. 

Nula/ tlangvalte hlei hlei hi an khaw­ngaihthlak. Chhun lama hnathawk chi an nih phei chuan an tan inhmuhna hun a vang tawh hle. Zan lamah inrimna hun a awm ta meuh lo a ni. Zan lama eizawng ṭhin tam tak tan Covid-19 hi a huaitthlala rei zual bik khawp ang - an hna­thawh ve hun berah tun thlengin hna an la thawk ve thei lo. 

Kawng hrang hrang han thlir hian zan lam curfew hi Covid-19 avanga puan a nih chuan hlih a hun tawh takzetin ka hria. Chutihrualin Covid-19 vang ni tawh kher loa zan lam curfew hi puan a la nih chuan sorkar hian sawifiah tal se.

Lalsangpuia