SUPER IAS 20-TE KHA!

Nu pakhat fiamthuin, "Rethei tê mah ni ila, sum leh pãi  hi nei ṭïnṭên ila a tãwk mai" a tih ang deuhin rethei tê mah ni se, mi a taimãk miau chuan tumah a awt ngai bik lova, tuman an hmusit ngawt ngai hek lo; a rûkin miin an ngaisang êm êm zawk ṭhin. 

Kan Zoram a la naupanzia ngaihtuahin zirna lamah chuan hma kan sãwn chak hle. India ram State upa tawhte'n lehkha thiam graduate an chher chhuah ṭeuh tawh hnuah Sap Missionary hmasate hmalakna azarah zirna lamtluang kan zawh ve ṭan chauh kha a ni a; heti chung hian lehkha thiam tam zawng tehna (literacy percentage)-ah chuan India ram pumah pakhatna aṭanga pathumna te kan lo hauh pha tawh ṭhin a, a lawmawm hle. Pathian malsawmna ropui tak kan dawn vang a ni. 

Hetih lai mek hian he tehfung hi kan ngaihtuah chian a ngai hle thung. Lehkhathiam tehna hi ziak leh chhiar thiam tam lam tehna chauh a ni - mithiam tam lam tehna erawh a ni lo tih kan hriat reng a ṭha hle. Tun dinhmunah India ramah ziak leh chhiar thiam tam lam tehnaah pathumna dinhmun hauh phain inchhuang hle ṭhin mah ila, mithiam tam lam tehna kawngah erawh chhuan tur vak kan nei lo tih kan hriat a pawimawh. A nihna takah chuan lehkha zir sãng kan ṭhahnem a, lehkhathiam/ mithiam tak tak erawh kan la tlêm hle niin a ngaih theih. Lehkhazir sãng tak tak, degree sãng tak tak nei, chhawrnahawm lem lo kan tam hle niin sawi a tam hle ṭhin. Sapṭawng thiam  leh thiam loh hi tehfung berah kan hnang fo lehnghal a. Sapṭawng thiam hi lehkha thiam/ mithiam tehna chi a ni lo. 

Sapṭawng thiam erawh a ṭhain a pawimawh; khawvel pumin a hmêlhriat ber a ni tlat. Ram changkãng ṭhenkhat leh mahni hnama chiang entir nan- China, Japan, French, Korea, Ger­many etc.te chuan an hnam ṭawng ngeiin degree sãng tak tak zirin an pass thei a; sapṭawng thiam miah lovin mithiam tak tak an chher chhuak ṭhin. India ramah ngei pawh Hindi medium ngatin degree sãng tak tak kan zir thei tawh tih a taka hmutu kan ni. Kan ṭhenawm Myanmar, Bangladesh etc. ngei pawhin anmahni kãwl, bangla ṭawng ngeiin university an zo thei tih kan hria. Chuvangin, thiamna hi sapṭawngah a innghat lova, a zirtu mi­hringah a innghat zawk. 

Kan University (MZU)-ah ngei pawh Mizo ṭawngin MA a zir theih a, mi tam tak zir chhuak an awm tawh tih kan hre ṭheuh awm e. Lehkha thiam/mithiam teh nan sapṭawng hi hman tur a ni lo, kan tehna tur zawk chu:- an ṭhat dan (quality), huhãng nihphung (personality), a tlinna (efficiency), thiam bel nãl zawng (proficiemcy), hmangchang/ remchang hriat dan (expert) leh thiam­na, theihna (ability), nun­phung ṭhat dan (calibre) amahah a awm ṭha em tih hi kan tehna tur chu a ni. 

Mahni hnam ṭawngin eng degree pawh zir ila kan zirlai kha kan belin kan thiam nãl hle a nih chuan mi chhawrnahawm lehkha­thiam/ mithiam kan ni thei tih hriat a pawimawh hle. Chutiang bawkin sapṭawng vekin zir tluan chhuak parh mah ila kan zirlai kan thiam bel chuan si loh chuan dãr ri mai emaw, dãrbenthek ri mai mai emaw kan lo ni ang. Sapṭawng Bible pawh pãwm kualin a chhung thu ziak nãl taka chhiarin sapṭawng vekin sermon thiam mah ila, a chhung thu tlar khat lek pawh sawi tur kan hriat  chuan si loh chuan engtihna mah a ni chuang lovang. Chuvangin, sapṭawng thiam nãl satliah ringawt hi lehkhathiam, mithiam nihna a ni lo. 

Kum engemaw chen liam ta aṭang khan Mizo ṭhalai zirlai rualte zingah Central Civil Services, UPSC, staff selection, IAS etc. hmachhawna hlawh­tling kan tlem sãwt ta hle. Chuvangin, Sorkar leh NGO lian ber YMA pawh an mangang a, awareness chi hrang hrang an kalpui chho mek hi a lawmawm takzet a ni. Hemi hmalãkna kal zelah Higher & Technical Education Department hnuaiah 16.12.2020 khan Full Sponsorship Selection ziaka exam neiin 17-18.12.2020 khan Personal Interview neih a ni a. Tichuan, Mizo ṭhalai aṭangin Super IAS 20 Full Sponsorship Selection-ah  mi 19 thlan an nih bãkah  General Category-ah mi 5 thlan an ni. 

Kum 1 chhung tal thil dang UPSC exams-a pui thei lo, mark tipung lo chi theihnghilh rih a, nitin darkar 12 tal ni 365 chhung an concen­trate theih nan heng ṭhalaite hi thlan chhuah an ni a, an hlawhtlin ngei beiseipui tlat ila. 

Anniho pawh hian thiam­na, hriatnain tawpintai a nei lo va chuvangin, hlawh­tlinna nei tur chuan tihtak­zeta beih a ngai a ni tih hre rengin bei ṭang ṭang bawk se a duhawm hle. 

Kan mitham leh IAS, Central Service hmasate khan an zirlaiin Sikul rûn in hulhliap tha mumal leh zirna hmanraw tha mumal pawh nei pha lovin mãu leh thing nawi tuah êng hnuaiah hlawhtlin takin an zir chhuak a; an fakawmin an ngaihsanawm takzet a ni. An zavaia tarlan sen ni lo mah se, hlawhtling tawhte zinga State Chief Secretary hial lo ni tawh leh ni mekte hi tarlang lawk teh ang:

1. Pu Lalkhama 

2. Pu  P. Rohmingthanga 

3. Pu M. Lalmanzuala  

4. Pu F. Pahnuna 

5. Pu Lalkakzuala 

6. Pu H.V. Lalringa  

7. Pu Haukhum Hauzel 

8. Pu Vanhela Pachuau .

9. Pi L. Tochhawng  

10. Lalmalsawma

11. Lalnunmawia Chuaungo

Mizo chhûl chhuak ngat mi 11 lai CS mahni state tana thawk thei kan han nei hi an ngaihsanawmin an va han ropui tehlul êm! Hnam hkãwn khat CS ngah zawngin kan dinhmun hi Chawhruala tehkhawng ni ta se'ng chuan India ram state hrang hrang zingah hian kan zahpuiawm bik hauh lovang. Mahse, tunah chuan mithiam kan khãt pharh tawh mai thei. 

 

Heng kan mithiam hmasate hian Sponsor-tu an nei pha ve lo, hrehawm tinreng tuarin mahniin, nitin inhlawhfa chawp chung takmeuhin thiamna hi àn sual chhuak a. Tuna Supper IAS 20 thlanchhuahte leh thangthar zirlai mekte hian kan hranghluite hi entawnin theihtawp chhuah se, mithiam leh lehkhathiam tehfung hrang hrangte khi nei turin an zãwl tawk theuhah bei tang tang zel se; hlawhtlinna ropu tak an hmu ang a, ziak leh chhiar thiam tamna hmun ringawt ni lovin mithiam, lehkhathiam tamna hmun State entawn tlãk kan ni thei mai dawn a lo ni e. Zirlaite u tang fan fan.