CAB 16-ah lungmuanna tur a la awm lo

Citizenship Amendment Bill, 2016 (CAB)-in Mizoram mai bakah North East State leh Central India lam thleng nasa taka a nghawng dan leh a boruak alh chho mêk chu kan hre ṭheuh ang. Mizoram tana a pawi theihna kawng hrang hrang chu ziakmi ṭhahnemngai, ram tana ngaihtuahna séng ten min lo chhawp chhuah sak tawh a, Mizoram bikah chuan chhim lamah Bangladesh aṭanga dan lova Chakma lo lut nasa lutuk leh pung chak lutuk hi CAB 16 kan duh lohna bulpui ber a ni tih kan hre bawk awm e. 

Kan ram hruaitute pawhin he CAB dodalna kawngah hian theihtawp an chhuah a, NGO hrang hrang hmalakna kan thlawp ṭha viau bawk. Political party hruaitu ṭhenkhat chuan kum kalta lamah CAB duh lohna Memorandum central hruaitute hnenah an lo submit tawh bawk. Amaherawhchu, tuna Central India-a rorel mék, BJP Alliance NDA chuan dodalna kárah Lok Shaba-ah an pass ta thut mai si a. NE state te mangangin kan rûm tak meuh meuh a ni. 

Tichuan he Bill hi Lok Sabha-a pass a nih hnuah Rajya Sabha-ah pass leh a ngai a, pass a nih vaih chuan kan chhe vek dawn tih kan hriat chian êm vangin Rajya Shaba-a pass a nih lohna turin eptu MP te, NE State mipuite chuan thapui kan han thawh chho ta a ni a. Vanneihthlak takin tahrik ni 12th February, 2019-a Rajya Shaba-a pharh tura tih chu a pamṭul ta hrih a, a lawmawm rual rualin lawm erawh a la kim lo. 

Bill hi a lapse thei em? Parliament-a Dan siam dawn hian Bill pulutin Lok Sabha leh Rajya Shabha-a passed a nih hnuah President-in a lo pawm pui hnu-ah Dan puitling ‘Act’ a lo ni ta ṭhin a ni. Amaherawhchu, tuna kan chai laimék, CAB hi Rajya Sabha-ah chuan pass a ni ta hrih lo a. Bill pharh lo hian Rajya Sabha hi an chawl hrih ta zawk a ni. Hetah hian Rajya Sabha-ah hian CAB hi an lo hnawl a ni lova, an pharh lo mai chauh a ni a, lapse anga sawi nimahse Article 108 angin President-in Joint Parliament sitting hi a la ko thei tlat a ni. 

Kan ram danpui Indian Constitution hi bihchiangila; Article 107 (3&4) ah chuan tihian a inziak, ‘Article 107(3)-A Bill pending in Parliament shall not lapse by reason of the prorogation of the Houses. (4) A Bill pending in the Council of States which has not been passed by the House of the People shall not lapse on a dissolution of House of the Peope…..’ Heta lang chiang ta chu Parliament House pahnihah a Bill put luh te hi House dissolved emaw, chawlh san vangin emaw a lapse thei lo tih hi a ni. Article  107 (5)-ah chuan, “A Bill which is pending in the House of People, or which having been passed by the House of the People is pending in the Council of States, shall, subject to the provisions of article 108, lapse on a dissolution of the House of the People’ a ti leh a. Hetah hian lapse anga chhuah tawp hi a la fuh chiah lo niin a lang. Lok Sabha hi dissolved pawh a la ni lo a, President-in Joint Sitting hi a la ko thei tlat a ni. Chuvangin, mawng hûng hman kan la ni lo a, thapuia kan la do chhunzawm zel hi a la ngai dawn a ni. 

Kan ram tan enge a hlauhawmna?: CAB kan duh loh chhan ber chu Chakmate an ni. Anni hian khawvelah mahnia in relbawl ve theihna Autonomous District Council he Mizoram zímte ah chauh hian an nei. An lo chawr chhuahna hmun Bangladesh sorkar pawhin mahnia rorelna a pek duh loh vangin hel pawl Shanti Bahini te pawh a lo pian chhuah phah a ni. Chuvangin, Mizoram hi an tan chuan Jerusalem a ni. 

Hei bakah hian CAB hnuaia hamṭhatna hmu thei Bhudist sakhua zuitute an ni bawk. He CAB hi passed a nih vaih chuan dan lova lo luta kan ngaih, kan sorkar hrawn tawh leh hrawn mék ten an hnawh chhuah ngam lohte hian India khua leh tui nihna neiin he ramah hian awmhmun lo khuar nghet zelin an lo luh belh zel ang. Tunah pawh foreigner lo huangtaute chunga hma la ngam lo kan neih vangin Zofate hi kan lung a muang thei tawh lo chu a nih hi. Kan sorkar te hian ram venhim lamah theih tawp lo chhuah ṭhin ni se he ti êm êm hian CAB pawh hi kan tan a hlauhawm lo tur hi a nia. 

CAB hi Hindu Lalram din tumna a ni em?: Tuna central-a rorel mék NDA hmalak dan leh CAB hi Hindu lal ram din chhuah tumna tih hai rual lohin a lang chiang. India ram ṭhenawma Hindu leh sakhaw tenau ṭhenkhatte tan in pui siam sak a dan hmanga kawng lo hawnsak a tum tih hi hai rual a ni lo. 

Citizenship Act, 1955 kan neih tawhah hian dan lova lo lutte tan engti kawng mahin Citizen a nih theih loh. Dan ang thlapa lo lut, Passport leh sorkar phalna thlapa lo lut te, hna vanga châm hlen taten kum 12 aia tlém lo an awm tlin tawh hnuah by naturalisation-in khua leh tui nihna chu an dil thei chauh a, an dilna erawh ngaihtuah a la ngai thung. Hetiang khawpa dan khirh kan neih mék hi sakhua vanga sedai ṭhiah a ni mai ang tih a hlauhawm takzet. 

Ṭhenawmte hmalakna awhawm: Assam State-ah dan lova lut rû Foreigner hnawh chhuahna kawngah nasa taka hma an lakna zarah kum 1985 khan 'Assam Accord' a lo pian chhuah phah tawh. Citizenship Act, 1955 hi Assam state bik tan liau liau an lo amended tawh a ni. Hetah hian hun bituk siamin ni 25th March, 1971 hma lama Assam state-a lo awm tawh te leh an thlah te chauh India khua leh tuia chhiar tur niin he mi hnu lama lo lutte chu chhui chhuaha hnawh chhuah tur an ni tiin hma an lo la tawh bawk. Ni 31st March, 2016 thleng khan mi 75,489 te chu foreigner-ah an puang a, an chungchang hi Foreigner Tribunal hnuaiah an ngaihtuah ṭhin. Tunah NRC kalpuiin thapui an thawh mek bawk. 

Hetih lai hian Arunachal Pradesh chuan Chakma voters 40,000 (singli) vel Electoral Roll-a thun lut tura Supreme Court-in order a chhuah tawh pawh an do let rap rap bawk. 

Lungmuan hun a ni em?: Kan Danpui, Constitution kan thlir chuan tun din­hmunah lungmuang taka lo ṭhut veng veng chi a la ni lo a, tuna kan hlauh êm êm CAB 16 ngèi pawh hi a la tawp lova, hun chêp tak kárah pawh President of India-in Joint Parliament sitting a la ko thei a ni. Hetiang hi kan boruak a ni tawh a, he Bill hlauhawm êm êm Parliament-a pass tumtu BJP Alliance NDA hian tunah hian hlawhchham hrih mah se kan hma lawka MP inthlana chakna an chan vaih chuan he Bill pass tur hian ar talh dan chi dang pawh an la hmang duh zelin a rinawm; an tawp san mai a rinawm lo bawk. 

Chuvangin, kan hma lawka MP inthlan kan hmachhawn turah pawh hian ngaihtuahna fîm tak nen kan ram aiawh tur palai, Parliament House-a Mizoram leh hnam thlavang hauh ngam tur kan thlan chhuah a ngai ngei ang. He CAB 16 introduce-a NE states leh kan ram tana dan sakei pass tumtu, buaina tinréng min thlena manganga min ṭahtirtu NDA leh a sangawi zawn puite hi kan hnawl a ngái ngèi bawk ang. 

Chuvangin, kan ram leh hnam tan chawl lovin bei zel ila, kan thlahtu huaisente lo sah zau Mizoram hum him tur hian tha thlah lovin i bei chhun zawm zel ang u.