Chapchar Kût Thingtlang lamah

He thu leh rawtna hi Vanglaini chanchinbu (Aizawl tiamin) vawi thum (3) ka ziak tawh a, tun hi a vawi 4-na leh a tawpna a ni tawh ang. Hetiang rawtna kan han siam ve te hian sorkar beng a thleng pha lo hle ṭhin a, pawl anga nawrh kher emaw te a nih loh chuan sorkar hian engah­mah a ngai lo a ni ang e. 

Engahmah ngai tur pawhin kan ziak chhante hian a chhiar pawh an chhiar lovin hriat pawh an hre lo hrim hrimte pawh niin a lang. 

Sum tam tak sênga Chapchar Kût khawpui chauha kum tin kan hmang ṭhin hi kei chuan ṭul ka ti lo hle. Chapchar Kut hi kan la hmang zui zel kan nih pawhin thingtlang lamah te hmang tel ve tawh ila, an lo hman ve na turte cheng sing diat diatin emaw sorkar hian sem ve sela tih hi a ni. 

Khawpuia awm lêt eng emawzat thing­tlangah Mizo an awm a, chung mite tana kûtpui programme kan siamsak ve ṭhin lo hi chu a 'fair' lo a ni. Anni lahin phût nachang an hre lo a, an ngam lote emaw te pawh a ni mai thei a; an khawngaihthlak a ni. 

Kum khat chhung hian kohhran prog­ramme tih loh chu intihhlimna pakhat­mah an nei lo tluk a ni. Ram pum huap programme - Republic Day te, Independence Day te an hmang pha ve ngai lo mah tih a; keimahni Mizo bik thil lehzela chanvo an nei lo fo hi chu a makin a dik lo hial a ni. 

Tih tak takah chuan khawpuia mite hian hetiang kût hi kan thahlel tehchiam tawh lo. Lam tur leh chanvo nei turte pawisa chawiin kan ruai a, anni'n an pawl sum tuakna ni pahin an rawn ti a, chung an lam leh an zai te hmuh leh ngaihthlak châka kal hrim hrim chu kan tam vak tawh lo. 

Mikhual thingtlang mite zin remchangin an thlîr deuh deuh ang a, ṭhalai sahawk tihtur nei mang loho an kal tam leh deuh ang a, nutling patling va thawk chhuak meuh chu an awm mang lovang. Chanvo nei ho veng hrang hrang leh pawl hrang hranga mite loh theih lohvin an inthlîr bawk ang. Chuti zawng chu a ni mai. Thingtlang lamah chuan a khaw nâwtin an thawk chhuak ang a, an hlim em em ang a, an kham lo hial ang. Chutiang 'hun nuam' chu i siamsak ve ang u, ka ti a ni e. 

A tih dan turah chuan RD Block tinah khaw remchang thlangin kumtin tih chhâwkin emaw a hmun remchangah chuan ti nawnin emaw buatsaih ta sela. Chanvo nei tur block chhung­khaw hrang hranga mite chah khawmin, pocket money te pe ve ila. Zaithiam leh zaithiam te nen han inawi nuam ve sela. 

Block leh Art & Culture official te'n organise puiin, tualchhung tlawm­ngai pawl te nen programme hlimawm tak chu an duang thiam ve em em ang. 

Sum renchem a ṭul chuan Aizawl leh district khawpuiah tun ang luai luai hian ti lo zawk sela, kan thingtlang unaute kian thiam ve zawk tawh sela, a tihchi viau lovang maw? 

Kumin atan chuan phengphehlepa khua a tlai leh zo ta a, nakum aṭang chuan hetiang zawng hian tih tum ve tawh ila. Hei hi hmasawnna leh thil thar ṭha tak a ni ang. Democracy chu mipui siam, mipui tan, an tih fo chu tih dikna pakhat a lo ni bawk ang. 

-