Cheng nuaithum khawi aṭangin nge?

MNF party chuan an campaign auhla zingah NLUP thlak nan Socio Economic Development Prog­ramme (NEDP) hmangin mirethei min khaichhuah an tum a, NLUP cheng nuaikhat kha Congress party chuan mirethei khai chhuah nan an hmang tawh a. Tuna MNF-in chhungkaw khat zelah cheng nuaithum an tawktar a, engtikah nge cheng nuaithum kan dawn dawn tih chu keini mirerthei chuan Tlumtea thlirin vanva­dak ak akin kan thlir mek a ni. 

Congress-in NLUP a sem khan cheng nuaikhat lek anga lang pawh nise instalment thumin an pechhuak a, MNF hian an tum angin nuaithum ṭheuh sem dawn ta se instalment thum anga an pe dawn a nih pawhin vawikhatah nuaikhat zel an pekchhuah a ngai dawn tihna a ni a; khawi aṭangin nge chung sum zozai chu an pekchhuah ang. Tunah Mizoram sorkar sum lakluh theihna (revenue) awm thei ang ang an sawkkhawm a, leiman chhiah te, lirthei aṭangin kum 15 chhung chhiah an lalawk vek tawh bawk si. 

Nuaithum zel sem dawn ta se engtin nge state sorkar hian sum hi a chawkluh ang tih chu ngaihtuah tham tak a ni a, central zem zen thiam tak an nih chuan thil harsa chu a ni hauh lo. Mahse central-ah BJP a sorkar mek a, MNF hian BJP a zawm lo niin an insawi bawk si a; chuti chung chuan fachuam duatin central BJP sorkar hian MNF sorkar mek hi a rawn duat a rinawm si lo. 

Thla leh lawkah Lok Sabha kan in­thlang dawn a, BJP hian tlakhniam lam a pan mek laiin Cong­ress leh a thurualpui an sorkar vaih phei chuan MNF hi cen­tral-ah a mikhual leh dawn ropui bawk si. Political party ho hi an duhna lamah chuan sual tak vek an ni. Khu lamah Congress leh a thurualpui emaw, party malin emaw sorkar ta se, helama Congress hruaitute chuan MNF sorkar mek chu rawn vulh lo turin a ti dawn chiang si a. 

Chuvangin, MNF hian mipui aṭanga chhiah tam tawk a khawn a ngai dawn niin a lang a, chhiah lakluhna ṭha em em mai, zu zawrh lah chu a titawp a ni tawh mai bawk si a. Lirthei chhiah (road tax) te hi an tihsan viau chuan mipuiin kan tuar leh dawn chiang sa bawk si. Eng aṭang nge sum a lakluh belh ang tih chu zawhna lian tak a ni ta. 

Hetiang zel a nih chuan mirethei khaichhuahna tura NEDP hi a kalpui thei tak tak ang em? Nge a ti zuzi zawk ang? Kan thlan tlin chhan ber pakhat NEDP hi a sawi lawk anga a kalpui thei lo a nih vaih chuan kum nga a ral hnuah chuan kan hnawl leh mai dawn niin a lang bawk si. Engtin nge kan thlan tlin chhan a tihhlawhtlin loh chuan miretheite kan awm tak ang le? 

Tunah hian nasa takin MNF sorkar thar chuan hma a la mek a, NEDP sawi rik a awm rih ta hauh lo mai hian miretheite ngaih a ti ṭha mawlh lo a nih hi.