Mi state chuan Chief Minister an nei asin!

Kum 10 chhung zet chu mahni mipuite rum ṭhaih a, Mizote hi ‘eng hnam hnam emaw kan ni’ ti ṭhin Chief Minister kan nei. Kum 10 chhung kha eiruk velah fihlim phian mahse Mizoram state inenkawl danah leh a hnampui min sawi duh danah kan lawm lova kan paih ta. 

Kum 10 hnuah Chief Minister thar kan nei leh a, a hnampuite chhana hming chherna hun rangkachak a nei a, chu chu Citizenship Ammendment Bill chung­changah a ni. Chu hun rang­kachak chu hun thirtuiekah a chhuah ta hlauh mai a, amah leh a party mualphovin an awm phah ta mek a ni. 

Hetia kei ni ‘Pathian zawn chhuah ram’ inti meuhva cheng, kan Chief Minister thar phei chuan, “Pathian hnena dil belh tur pawh awm tawh chuang lo,” a tih khawpa ram ṭhaa cheng mipuite hi kan vanduai nawn a, tuna kan kalphung en chuan kan chawh tawlh tawlh mai dawn chu a ni ta - kan Chief Minister-te’n kan thlavang an hauh ngam miah lo. Kan ngaihsan loh Bak-thak kan tih Meghalaya chuan Chief Minister mahni mipuite tana ṭang ngam an nei a, Garo mi Conrad Sangma chu tun boruakah hian an state mipuiin “HERO” tiin an sawi. 

Conrad Sangma hi NPP party hotupa a ni a, BJP nena thawk dun, langsar taka inthunzawm an ni. MNF hi chu MLA inthlan khan BJP nen an thawk dun lova, NEDA leh NDA-ah an inkawp chauh kha a ni. Chuti chung chuan Conrad Sangma hian, “CAB hi an pass lui a nih chuan NEDA leh NDA aṭangin kan inhnukdawk dawn,” a ti a, he pa hian Meghalaya-ah BJP nen sorkarna an siam mek a, BJP Minister pawh a nei a, Manipur-a BJP sorkarna thlawptu tura MLA pawh thawhtu a ni. 

Nimahsela Conrad hian Meghalaya leh a chhunga cheng mipuite tana pawi tur CAB an pass dawn a nih chuan BJP aṭanga inlakhran a tum a, chiang takin a sawi a. New Delhi-ah a zin chilh a, biak theih apiang a bia. Guwahati-ah hmarchhak party a ko khawm bawk a, mei kawhin a ṭang a, a tawpa Rajya Sabha-a CAB an put luh ngam loh chhan pawh he pa hmalakna leh hmarchhak ṭanrualna vang a ni. 

Media lamin an hai lova, News18 chuan, “As Sun Sets on Citizenship Bill, Conrad Sangma Rises as ‘Face of the Northeast’” tiin Conrad hi an fak a ni. The New Indian Express chuan, “Citizenship Bill: Northeast gets a new hero in Conrad Sangma,” an ti kuau a, media lamin Conrad-a hmalakna hi an hai lo; an ziak chuai chuai mai. 

Kan Chief Minister tharin NDA (BJP) malsawmna dawn loh a hlauh vanga CAB chungchanga thu tak tak a sawi ve lo khan rilru a tina a. Tun hnaia Rajya Sabha-a an pass loh hnua party lamin an han sawi vete hi zawng mipuiin eng he huah an ngai tawh lo, mipui hian an phone aṭangin national media an ban phak a, tunge CAB dodal ngam tak tak chu an hre chiang khawp mai. Mi state chuan Chief Minister tak tak an nei bik asin.