Mizoram chhung sawrkarin a ngaihthah thiang lo

Thawhṭanni 8.7.2018 a Council of Ministers, Mizoram, Chief Minister Pu Zoramthanga hoa ṭhukhawm chuan Bengal Eastern Frontier Regulations, 1873 (Regulation 1 of 1873) Section 2 tlawhchhana siam Cachar Inner Line, 1875 chu sawrkar dinna a nih thu an an puang a, he thu hi zofate tan chuan thawk huaina tham leh thlamuan sawng sawngna tham a ni ngei ang. Sawrkar huaisen tak leh ramri chungchanga thu vuakthlak fel tak nei ngam kan nei ngei niin a hriat ta bawk a ni. 

Hetihrual hian engatinge Mizoram sawrkar hian a ram chhunga Assam sawrkar-in sawrkar office a sak hi a ngaimawh miah loh tih erawh chu ngaihtuahtham tak a ni. Council of Ministers hian rintlak taka ramri chungchanga an thu pawm an puan hi ken tlang an tum tak tak a nih chuan Mizoram chhunga Assam sawrkar-in Forest office an rawn sa ve ringawt hi a ngai­mawh ngei tur a ni ang. 

Mizoram sawrkar chuan Vairengte Police check gate thlang BRTF hmun hluiah huaisen takin India Reserve Police Platoon mi 30 rual zet mai tun Inrinni zan dar 9:00 vel khan a dahlut a. Amaherawchu, Mizoram sawrkar-in IR a dahna hmun hi Council of Ministers ṭhukhawm thu leh hla nen a inpersan deuh a, Assam sawrkar lam hian Mizoramin Cachar Inner Line, 1875 anga a pawm chin/ a hauh chin hmuhin a hmu ang tih a hlauhawm hle. Assam sawrkarin ramri buai anga puan a nih chhung chu tu lam ve mah mahin hmalak loh nise a tihna hmuna lung muang takah office an neih theih takah hian Cachar DFO hi Assam sawrkar hian chawimawina a hlan ngei a rinawm. 

Mizoram chhunga Assam-in Forest office a hun hian Mizoram sawrkar mit a timim miah lo a nih chuan Cachar Inner Line, 1875 Mizoram chhung lama rin ṭhat leh a pawi ti lem lo niin a ngaih theih a, Council of Ministers 

ṭhukhawm hian an thu an keng tlang ngam tak tak ngam lo emaw, ken tlan tak tak tum lem lova issue tih reh nan ringawt an pawm ve hrim hrim ni ang pawhin an lang theih a ni. Mizoram sawrkar-in ramri chungchang thu lian tham tak a pawm tawh hnua MZP-in Zophai a Zofate Chawlhbuk sak an rawt pawh hi thil ṭha ber a la ni chuang lo. Zofate Chawlhbuk, MZP in sak an rawt piahlam fe-ah hian Mizo tam takin leilet an la nei a, heng Mizo leilet te hi Mizoram sawrkar-in Mizoram china a ngaih huam chhunga awm vek a ni. Chuvangin, Sawrkar hian Zofate Chawlhbuk humhim ringawt hi a hna a ni lo a, a piah lama Mizo leileta Assam lamin Mizorama harsatna an siamah hian sawrkar hian thlamuanna a thlen a ngai a, thlamuanna a thlen theih nan hma a lak a ngai. Mizoram sawrkar hian a ram chhung chu a venghim zo ngei tur a ni. 

Ramri a buaina siamah MZP te puh an ni ṭhin pawh hi thil dik a ni lo. Ramri a buaina siamtu chu Assam sawrkar an ni zawk. Assam sawrkar hian ramri-ah mai buaina an siam lo, Mizoram chhungah buaina an rawn siam zawk a ni. Ramri a buaina siam anga kan insawina ṭawngkam hi paih bo a ngai a, kan media lam te pawh hian Assam-in ramri-ah hma an la tih ṭawngkam hi an paih a, Assam-in Mizoram chhungah hma an rawn la, tia an ṭawngkam an thlak a ṭul hle. 

Mizoram sawrkar-in Mizo­ram ramri atana a pawm chin en hian MZP hian ramri-ah zafate chawlhbuk sak an lo tum reng reng lo. Ramri te chu sawtah sawtah a ni. Mizoram chhung ramri aṭanga teh phei chuan a lailum ni pha hial tur Mizoram chhungah chawlhbuk sak an tum mai mai alawm. Assam hian ramri-ah pawh ni lo Mizoram chhungah buaina an rawn siam zawk a ni. Thawhṭannia Council of Misnisters ṭhukhawm thu hian a nem nghet chiang hle. Ramri-ah Mizoram aṭanga buaina siam an awm ngai lo a, Assam sawrkar-in Mizoram chhungah buaina a rawn siam zawk a ni. 

Mahni ram chhungah ngei miin hma an rawn la a, kan ban phunin kan ramri tlemin kan hnaih ve ta deuh, titu chuan a ṭhenawmpa a ngam lo hle tihna a ni. A nupui fanaute hnenah, kan ṭhenawmpa hi ka ngam ngang lo a ni, ti mai teh se... A chhungkuate pawhin an hrethiam em em ang. Chutiang a nih loh chuan a faten, ‘A pa ṭhenawmte sawn kan ramah ban an rawn phun leh tawh a nia,’ an ti leh ṭhin ang a, ṭhenawmpa ban phun lai tukverh aṭang chhungkua-in an thlir kum tin a ngai mai dawn a ni. Mizoram hi Mizoram sawrkar hian a humhalh ngam tak tak dawn lo a nih chuan kan sir tluk theihna hmuna inremna siam mai hi a ṭha mai awm e. Chutiang a nih loh chuan mipui rilru a phawklek a, kan ram ngei nia kan hriatah kut tuar zawkah kan ṭang leh mai ṭhin a ni.