MPSC kal tlang lo

School Education Minister thar zahawm takin zirtirtu mi 1000 vel lak an tum thu a sawi ruala MPSC kal tlang lova lak phawt an tum thu leh, chumi hnua dah ngheh an tum thu a sawi kha ngaihtuah nawn leh atan a ṭha ka ti ngawt mai. Ualau taka, “Kan duhzawng kan dah dawn,” tihna tluk a nih avangin Mizoram zirna tichhe theitu leh sorkar hna lakna tura din MPSC palzutna lian tak a ni thei dawn a, he thil hi chu kaltlang pui lul lo se a ṭha a ni. 

MPSC thuneihna chin, Group B chin an la tur a ni, contract an la thei/ la thei lo etc hi keini ang chuan kan hrethiam ve phak lo. Kan hriatthiam phak chu MPSC kaltlang lova duhzawng lak a nih chuan induhsakna, a tling aia hmelhriat ṭha dahna remchang, a ruh langa sawi chuan MNF mi leh sa zirtirtua luhna kawng inhawnna a ni. 

Tuna mi hi an tum danah chuan contract anga lo lak hmasak phawta chumi hnua dah ngheh leh tur a ni a, chu thilin a kawh chu MPSC kaltlanga lut phak lo tur an duhsak zawngte an dah luh theihna tur kawng an hawng dawn a ni. Hei hian kan Zoram zirna a tichhe khawlo zo vek tawh a, tunah hian tihchhiat belh tumna leh politics-a mahni ṭan zawngte hna pawimawh em em ‘zirtirtu’ hna thawk tura dah luh tumna kawng a ni. 

Tin, hei hian ken tel a neih tur chu ṭha­lai hun rei tak hna lo zawng tawh, exam hunah chuan luh ve lo tum te, zirtirtu lo training ve ngat ngat te, BEd leh MEd te lo zira sorkar hnuaia zirtirtu ngheta luh tuma beitute tana beidawnna a ni. 

Thingtlang khuaah zirtirtu an awm duh lova, ai kal an la zel tihte hi chu sorkar chak loh vang mai mai a ni. Aikal lak hi dan kalh a ni a, dan kalha khawsak sorkar zirtirtute hi chu hrem hmiah hmiah mai se, a sawt loh chuan dan tlawhchhanin ban mai se. Zirtirtu aikal la hi pahnih pathum bak an ban hman lovang, an post-ah an kir leh ṭhap ang. 

Thingtlangah zirtirtu an awm duh lo, ai kal an la tih hi chu aikal la hmu lo der ṭhin sorkar kan neih vang te, thingtlangah School Inspection an neih khat vangte a ni. Mahni post-a awm lo te hmu chhuaka hrem turin kan SDEO leh CEO-te hian bial fangin zin chhuak ṭhin se. 

Zirtirtu pawi­mawhna hre chiangtu tan chuan MPSC kal tlang lova lak hi chu zirna atana pawi­khawihna a ni dawn a, he thil hi sût leh hram teh se. 

Zirlai pawl pawhin na takin nawr se, zirna ṭha an duh a nih chuan zirtirtu lak kher kher hi chu MPSC kal tlangin la se, an duh chuan an tih ṭhin tawh angin police lakahte mahni duhsak zawng chu an thun thei tho alawm.