MNF thla 6 sorkar thlirvelna

December ni 15, 2018-a lakluh Mizoram Sorkar chuan thla 6 zet khua a hawi ve ta. Thla 6 leka upa mah ni se, 2018 Krismas leh kumthar vuakvet bakah, India rampuma MP inthlan boruakin thla 2 leh ni 18 zet chu election model code of conduct rules-in a hnungkhirh titih a. Hnathawhna hun atan ni 110 vel nei angah chhut sak ila, chuta kan thil hmuh langsar zualte i’n tarlang teh ang. 

17.12.2018 : Chief Minister Pu Zoramthanga leh Council of Minister 11-in Pisa an luah a. Home Minister Pu Lalchamliana chuan December ni 21-ah a Pisa a luah. Chief Minister Pu Zoramthanga Delhi kalin Housing & Urban Affairs minister Hardeep Singh Puri a hmu a. Aizawl khawpui chhunga kawng chhawng siam dan tur leh traffic jam tihziaawm dan tur, parking siam dan turte a sawipui. Hemi chungchang zirchiangtu tur Mizorama tirh a tum thu Urban Affairs Minister hian a lo hrilh a, Mizoramah football khelmual paruk siam a nih tur thu a lo hrilh bawk. 

18.12.2018 : Mizoram sorkar thara Assembly session hmasa ber neih a ni. Hetah hian Assembly speaker atan Chalfilh bialtu MLA, Pu Lalrinliana Sailo chu chuhtu awm loa thlan a ni. Hemi ni a Cabinet ṭhukhawm chuan sorkar agency zawng zawngah zu zawrh tihtawp nghal a rel a, December ni 21 aṭanga January ni 14 thleng zu zawrh chhuah phal lohna ‘dry day’ a puang zui. 

10.1.2019 : Health Minister Dr. R. Lalthangliana’n recognised blook bank-a thisen sawngbawlna man (blood processing fee) chu tihtawp a nih thu a sawi. Hemi ni vek hian School Education Deptt. chuan office order ti chhuakin contract-a thawkte hlawh tihpun a nih thu a tarlang.

14.1.2019 : Chief Minister Pu Zoramthanga chuan New Delhi-ah Prime Minister Narendra Modi a kâwm a; The Citizenship (Amendment) Bill, 2016 chu Mizoram sorkar leh Mizo mipui te’n an duh loh thu a hrilh. 

14.1.2019 : MLA te lirthei leina tur sorkarin Rs. 8,00,000 a tum sak ṭhin chu Rs 10,00,000 ah tihpun a ni. 

17.1.2019 : Zu zuarte’n Mizoram Sorkar Gauhati High Court, Aizawl Bench-ah khinna (petition) an thehlut, January ni 29 ah High Court-in a ngaihtuah ṭan. 

29.1.2019 : Zu zawrh chhuah phal lohna sorkarin March ni 31 thleng ‘dry day’ a lo puan tawh chu Gauhati High Court, Aizawl Bench-in a tihtawp sak. 

2.2.2019 : Mission for Integrated Deve­lopment of Horticulture (MIDH) Aijal Club-a ṭhukhawmte hun hmapuitu Chief Minister Pu Zoramthanga chuan ‘Rua’ hmanga India ram per-capita income sang berah Mizoram a awm theih thu a sawi. 

4.2.2019 : A ṭum khatna atan MLA-a thlantlin mi 21 te chu Orientation Programme hmangin New Delhi an kal. 

6.2.2019 : Parking House Support Scheme (PAHOS) chu CM’s conference room-ah Pu Zoramthanga’n a hawng. Kum 2018-2019 atan cheng vbc. 10 (nuai 1,000) dah nghal a ni. 

7.2.2019 : Mizoram Sorkar GAD chuan sorkar hnuaiah Committee pêng hrang 14 din a nih thu hriattirna a ti chhuak. Chairman atan Minister leh, vice chairman atan MLA leh Ex-MLA te ruat an ni. 

1.3.2019 : Chapchar Kût lawmna pui ber, Aizawl Lammuala neih hmanpuitu Chief Minister Pu Zoramthanga, ‘Kût pa’ ni bawk chuan Home Ministry aṭanga thuchhuah (order) lo kal angin Assam Rifles te chu May ni 31, 2019 hmaa insawn chhuak tur an nih thu a puang. 

8.3.2019 : Council of Ministers ṭhukhawm chuan lirthei chhiah lak dan thar an siam a. Life Time Tax chu ṭum thumah - kum 1-na, kum 6-na leh kum 11-naa pek theih turin a ti. 

11.3.2019 : Lokayukta Chiarman atan C. Lalsawta (63) IAS (Rtd) ruat a ni a. Raj Bha­van-ah Mizoram Governor Prof. Jagdish Mukhi-a’n rinawmna thu tiamtirin a la lut.

18.2.2019 : CM Pu Zoramthanga’n foreigner te laka invenna tur leh khua leh tuite chhinchhiahna tur, ‘The Mizoram Maintenance of Household Registers Bill, 2019,’ Assembly house-a a putluh chu pass a ni.

19.3.2019 : Zu khapna dan thar, Excise & Narcotics minister Dr. K. Beichhua put luh, ‘The Mizoram Liquor (Prohibition) Bill, 2019 chu Assembly House-in lungrual takin a pass. 

19.3.2019 : Home Minister Pu Lalchamliana official resolution, Citizenship Ammendment Bill 2016 dodalna leh duh lohna Assembly House-a a putluh chu lungrual taka pass a ni. 

26.3.2019 : Mizoram sorkar tlawha lo zin, 15th Finance Commission Member te hnenah Mizoram sorkar aiawhte’n cheng vbc.94,647.33 an mamawh thu an lo thlen. 

12.4.2019 : Zu zawrh tir leh turin Gauhati High Court chuan Mizoram sorkar a hriattir. Hei hi Bonded Warehouse pathum - Raphael, RTP leh SS Enterprise ten Gauhati High Court, Aizawl Bench-ah writ petition an thehluh vang a ni. 

22.4.2019 : Zirtirtu 946 lak phalna Council of Minister-in a pawm. Hemi rual hian Mizoram State Institute of Hotel Management kalpui a nih theih nan post ruak 32 hnawhkhah remtih a ni bawk. 

22.4.2019 : Council of Ministers chuan Mizoram Institute of Medical Education and Research (MIMER) chu ‘Zoram Medical Collage’ tiin a hming an thlak. 

22.4.2019 : Social Welfare department chu Directorate pahnih - Directorate of Social Welfare & Tribal Affairs leh, Directorate of Women & Child Development-ah ṭhen a ni. 

24.4.2019 : Ration Chini sem leh turin Food, Civil Supplies & Consumer Affairs Dpartment chuan MIZOFED hnenah Supply Order a pe fel. 

25.4.2019 : Lirthei intlan chhâwk dan thar Coordination Committee on Traffic Ma­nagement hotute’n an siam. He intlan chhawkna dan thar ang chuan Aizawl khawpui chhung­ah lirthei nitin 12,000 vel ding ziah tura ngaih a ni a, nî khat ṭheuh tlan loh nî a awm. 

9.5.2019 : Agriculture Minister, Pu C. Lalrinsanga chuan Pangngang puang (Fall Armywarm)-in kuthnathawktute Vaimim a eichhiatte a hmunah a tlawh. Minister hian phai lam aṭangin mi thiam Indian Institute of Maize Research (IIMR) bakah National Bureau of Agriculture Insect Research te an lo kal tur thu a sawi. 

23.5.2019 : Mizoram MP atan MNF candi­date Pu C. Lalrosanga thlantlin a ni a. Aizawl West- I MLA bye election-ah MNF candidate Pu Zothantluanga thlantlin a ni. 

28.5.2019 : Excise & Narcotics Minister, Dr. K. Beichhua chuan zu khapna dan, Mizoram Liquor Prohibition (MLP) Act. hman ṭan a nih thu leh notification pawh chhuah nghal a nih tur thu a sawi. 

30.5.2019 : Assam Rifles te chu May ni 31 ral hmaa an awmna tur hmun Zokhawsang-a an insawn chhuah loh chuan, Home Department hotute’n Ministry of Home Affairs-ah report an thehluh tur thu an sawi. Hetih lai hian hnathawktu Engineer Projects India Ltd. (ECIL) hotute chuan Mizoram sorkar chu ni 45 tal hun pek belh turin an ngén ve thung. 

1.6.2019 : June ni 1 aṭanga hman ṭan tur lirthei intlan chhawk dan thar chu Mizoram Bar Association (MBA) in Gauhati High Court, Aizawl Bench-a an khin vangin ‘stay’ a ni. 

3.6.2019 : Saitual, Khawzawl leh Hnahthial District tihpuitlin nan SDO(C) pisa te chu DC pisa atan hman lailawk rih tur a ni tih Sorkar GAD-in thuchhuah a siam. (Heng District 3 te tan hian nuai 150 ṭheuh pawisa dah phawt a ni) 

5.6.2019 : Home Minsiter, Pu Lalchamliana chuan Mizoram leh Assam inrina Zophai Border Outpost leh MZP-in Zofate Chawlhbuk sak an tumna hmun a tlawh. 

11.6.2019 : MPSC hnalak thin, Group ‘B’ Non-gazetted chin chu Council of Ministers ṭhukhawmin chhâwk zangkhai nan Mizoram Sub-Ordinate Service Selection Board (MSSSB) din a, anni kuta hnalak pawh dahzui nise a ti. 

13.6.2019 : MNF sorkar tharin a vawi khatna atan budget puitling 2019-2020 atan Rs. vbc. 10,692.30 a pharh. Budget pharhtu CM Pu Zoramthanga chuan sorkar hmalakna hlawm lian ber chu SEDP a nih tur thu leh, SEDP atan Rs.750 crore, SEDP hming pú ve chiah loa sum dahte en chuan SEDP ah 1,000 crore dah ang a nih thu a sawi. 

13.6.2019 : Mizoram State Planning Board Vice Chiarman-ah Pu H. Rammawi Ex-Minister ruat a ni a, June ni 18-ah Pisa a luah. 

15.6.2019 : Home Minister, Pu Lalcham­liana’n Tripura-a Tuikuk, kumina Mizorama kir lote chu sorkarin a ngaihven zui zel dawn lo tih a sawi. 

17.6.2019 : DM&R Minister, Pu Lalcham­liana chuan Aizawl Hunthar veng lei tlahniam ṭhin chu cheng vaibelchhe 20 senga siam tur a nih tur thu House a hrilh. 

19.6.2019 : Chief Minister, PWD changtu Pu Zoramthanga chuan Mizorama kawngpui siamtu contractor leh company te lakah sorkar a huaisen tur thu Assembly House-ah a sawi.