Spiritual Doctorate Degree an tih kha…

Thuhma

Thiamna leh finna a lo sang zel a, khawvel pangkhing lehlam aṭang pawhin Mizoram Legislative Assembly Budget Session 2020 chu kan thlir ve thei ta reng mai! Ka hriat theih chinah hmasawn tum ṭhalai tam tak, ram pawna hnathawka chhuakte pawhin he session hi an ngaihven hle mai a. Tun hma angin, kan ṭhalaite hian, tih dan phung pangngai anga budget session nei liam puat turin kan rorelna sang ber hi an duh tawh lo niin a lang. Hrethiam lote pawhin hrethiam zawkte sawifiah hun an nghakhlel hle. A lawmawm khawp mai! 

Mizoram Legislative Assembly Budget Session 2020 a Governor thusawi chungchang lawmthu sawina huna Pu Lalduhoma thusawi kha in lo en ve em kha hre lo a. A sawi lai mekin member pakhatin speaker hnenah khan ‘Pu Speaker Governor speech kha sawi ve mai sela, duh duh sawina hun em ni? General discussion hun em ni, tun hi?’ tiin a zualko a. Pu Lalduhoma chu a ṭawng chhunzawm zel a. A hmaa speaker hnena zualko tawhtu tho kha a niin ka hria (ka hresual maithei), heti hian a ti leh a, ‘Spiritual doctorate degree nei a ni a, a ngaihthlak dan pawh kan thiam a ṭha khawp mai’ a lo ti a. Kan ram rorelna sang berah meuh pawh doctoral degree leh doctorate pawh hre hrang lo kan la awm khan ka rilru a luah ve reng a. Chumi chungchang chu kan lo ziak dawn a ni. 

Ṭawng hi kan hriathiam phak bakin a pawimawh

Kan ṭawng chhuah hma hian kan ngaihtuah phawt a, ṭawng kan tih hi chu kan ngaihtuah hnua lo lang chhuak ve ta chauh ṭhin zawk a ni. Ṭawng hi a lo pawimawh khawp mai! Han namnul mai mai tur chi chu a ni lem lo. A hnam ang zawng pawhin kan nihna inpuan chhuahna kawng khat a ni. Kan hnam ziarang leh nihna thleng hian kan ṭawng hman hian a phawk chhuak thei a ni. Chumi engah chuan Mizo chhungkuaa kan ṭawng hman tam takte pawh hi kan sawi tumte kan inhriat sak tawn theihna a nih chuan a ṭha viau zel a. Mizoramah hian hnamdang ṭawng kan hman ni si mahse a ṭawng neitute hman dan nena inang lo hi a awm nual a. Ngaimawh duhtu tan han rehbunna lai tur hriatthiam a har viau thei bawk ang. 

Amaherawhchu, khawvel pumpui anga hman ang chi thumalte hi chu keimahniin lo tihdanglam ve vak hi a ṭha ber ang em tih ngaihtuah a pawimawh khawp mai. ‘Amen’ tih te, ‘Halleluiah’ tih te hi khawvel pumpuia kan inhman-ṭawm (universal) ang a ni a. Mite tihdan anga han hman mai hi ṭhat zawkna a awm ve thei ang. A nihna takah chuan ‘current’ kan tih fo pawh hi scientific term a ni a, Mizoram chhungah kan hmang dik lo a. Hmundangah hi chuan ‘power’ an ti vek a ni. Current kan tih chuan thli emaw tui emaw chein tha a siamna kha current chu a ni. Electron che avanga tha kan neih current chauh hi current an tih hian a huam lo a ni. Mahse hei pawh hi a la ngaihthiam theih thoin ka hria. 

Doctoral degree a ni

Amaherawhchu, doctoral degree tih turah doctorate degree kan ti tlat mai hi chu a ngaihmawhawm viau. College leh University lama thawk leh kal chhuakte pawh hian kan hmang sual fo mai. 

Tute lo tih chhuah nge ni ang aw tihte pawh ngaihtuah chian ngai tak a ni. Doctoral degree emaw doctorate emaw hi University-in degree a pek theih sang ber a ni a, mi hman dan kan ṭawm ve mai hi a ṭhain ka hria. Tihdan phung (system) hran daih kan neite a nih ngawt loh chuan a dika kan hman chhawn hi a ngaihna chin a awm tlat a ni. 

Doctorate tih hi noun a ni. Doctoral hi adjective a ni. Degree hi kan sawi tel duh a nih chuan Doctoral degree tia sawi tur a ni. Chuti ang zelin Doctoral supervisor, Doctoral Committee, Doctoral thesis, ldt., hi hman a ni ṭhin. Doctoral degree a hmu tiin emaw Doctorate a hmu tiin emaw kan hmang thei tihna a nih chu. Kan MLA zahawm tak pawh khan Doctorate tiin emaw Doctoral degree tiin emaw a hmang thei tihna a ni. 

Website ṭhenkhatah hian kan hmansual dan anga hmang pawlh nuai an awm ve leh ṭhin. Chu chu Mizo ṭhenkhat hian ṭan chhanah an hmang veleh mai ṭhin a, han sawipui ve chang hian. Mahse, kan hriat tur chu sapṭawng hi hnam dangte pawh hian an thiam em em bik lova. Tin, website update tute pawh tawnhriat nei lo ve tak takte an ni a, chuvangin an news leh blog vela thuthar an ziah hian an hmang sual veleh khauh ṭhin. Mahse official tak hi chuan an hmansualna ka la hmu lo thung. 

Doctoral degree hi

Tuna zirna pangngai (discipline) chhunga doctoral degree lo chhuah dan hi a sawi thui theih viau mai. Doctor tih hrim hrim hi Middle Age (476 AD - 1453) hun laia Latin ṭawng aṭanga an lak chhuah a ni a, ‘teacher’ emaw ‘instructor’ emaw tihna a ni ber. A bulṭhut chu Church Father te, Apostle te leh Kohhran thuneitu te, Bible zirtirtute aṭangin a ni ber mai. Catholic Kohhran zingah zirtirtu nih tumte an test ṭhin a, an pass chuan thu an tiam a, fee an pek zawhah chuti ang dinhmun chu an nei ve thei ta ṭhin a ni. Kum 1150 khan University of Paris chuan tuna kan doctoral degree ang chi hmasa ber hi an lo hlan ta a. Pope leh Bishopte inhmuhkhawmna Council of the Lateran-ah phei chuan fee pek kher ngai loa degree neih theih an rem ti a, kum 1179-ah khan. Chuti ang chuan a lo ṭhang chho ve ta zel a, Kohhranin sorkar hnenah zirna inte a hlan hnu phei chuan a lo hluar ta em em a ni. 

Doctoral degree hi a hran hran a awm ve a. Tuna kan hman tam ber, India rama kan hriat tlanglawn ber, Doctor of Philosophy hi Germany lamin ‘Philosphy (love for wisdom)’ tih awmzia changchawia an inpek ṭhin a ni. Ph.D tih lam pum tak phei chu ‘Philosophiae Doctor’ a ni a, latin ṭawng a ni. 

Honorary degree hi

Honorary degree nei hi Mizote hian kan ngah khawp mai. Academics chhung­ah hi chuan kan ngaisang khawp mai! Degree inpek dan hi hmansual (abuse) theih a nih avangin India ram chhungah awlsam te tea lo nei tate pawh an awm nawk a. Chumi avangte pawh a ni mahna mi nawlpui hian ngaihhlutna chang kan hre tlat lo! 

Doctoral degree hrim hrim hi a bulṭhut (concept) chu zirtirtu nihna chi khat angin lang viau mah se a bulpui ber chu a hunlaia midangte tana mi ṭangkai bik, thiamna leh finna hlan chhawngtu an nihna avanga heti ang degree nei hi an ni ber. Zirna a lo ṭhan chhoh (evolve) zelnaah pawh chumi bulṭhut (concept) tho chu hman zel a la ni. Thiamna leh finna hlan chhawngtu nihna mai bakah thiamna leh finna avangin mihringte hmasawn zelna turin research hmanga tha leh zung thawh vetu an nih avang a ni ber. Tunhnai zirna khawvelah phei chuan degree nei turin research paper pahnih khat tal nei turin an ti fer fur tawh a ni. Chu an research paper chuan, a sapṭawng takin, direct takin emaw indirect takin emaw mihringte tan ṭan­kaina a pe a ni. I chheh vel, i phone hman, motor, bike, building leh kawr hak thleng khan han en la, tin kan sorkar inrelbawlna thlengin, khangte kha research avanga lo chhuak a ni. 

Ph.D Thesis defense-naah hian zawhna inbuatsaih lawk theih pakhat a awm ve ṭhin. Chu chu hei hi a ni: 

‘I research tih hi society tan engnge a ṭangkaina?’ tih hi. Ṭhenkhat zirbingnate chu direct taka ṭangkaina han sawi mai a harsa a. Mahse, miin kan paper hi an lo la chhiar ve ang a, an la ṭangkaipui ang a, thil thar leh thil awmze nei zawkte an la hmuh chhuah ve phah mahna tiin an chhang mai ṭhin. 

Chu chu doctoral degree hlawh­chhuahna bulṭhut (concept) chu a ni. University emaw College emaw vela zirtirtu nihna a ni satliah lo a nia! Honorary degree hi a hlutzia i ngaihtuah chhuak thiam tawh mai em? Entirna ka pa ang che: Zuangtui a chanhai leh riangvaite enkawltu hnathawh saw han chhut vang vang la. Mizo society tana a hnathawh hi pui tihna riau i nei ve em? Ani tan chuan thesis phek khat pawh ziah ngai lovin doctoral degree hi a lo phu em em mai a lo ni a. Doctoral degree a nei hi a inhmeh asin! Ratan Tata pawh hi IIT Bombay khan Doctor of Science (DSc) a pe a, hre chiangtu an tam bawk a, an lawmpui teh asin! Thesis ziaka degree neite sawi nan ‘a hlawha hlawh chhuak’ tih kan han hmang deuh bik kher zel hian ka beng a tikhup ve ṭhin khawp mai! Thesis ziaka doctoral degree nei tan hian a inthlahrunawmin a zahthlak ṭhin ngawt ang! 

A nihna takah chuan honoris causa emaw ad honorem emaw tihte pawhin he degree hi an sawi ṭhin a. Chumi awmzia chu a sapṭawngin, for the sake of honour emaw to the honour emaw tihna a ni daih! Chumi awmzia chu Doctoral degree-in a tum ber midangte tana ṭangkai nihna chu an lo hlawh chhuak chiang hle tihna a ni a, chumi avanga zahkai an ni tihna a ni zawk hial a ni! Chu chu zirna system kan tih pawh hian a tum ber a ni. 

HSLC exam-naa top-a lan emaw result ṭha tak neih emaw IAS tlin emaw lam a ni satliah lo! Zirna hi sorkar hna hmuhna emaw ti tawk pawh kan tam, mahse chu chu a ni lo tih hi kan hriat thar leh a pawimawh hlein ka hria. Mi ṭangkai, midangte tana malsawmna thlentu kan nih theihna tura min hrual mumtu a ni, education system hi. 

A thui ta hle mai. Mihringte hi khaw­saho tura duan kan ni. Kan thiamna te, kan hriat zawng te, kan ngaihtuah peih zawng te, kan rilru pek zawng te thlengin a inang lo ṭheuh ang. Chuti ang zelin kan ṭangkaina pawh a hrang ṭheuh a ni. Ropui bik leh lian bik pawh kan awm lo. Kan hmaa tihtur rinawm taka kan tih hi kan zavai mawhphurhna leh kan intluktlanna a ni.