AMC inthlan thlirletna

Aizawl Municipal Corporation (AMC) inthlan kha ngun taka kan thlir kir chuan, Aizawl mipuiin inthlanah hian Political party kan thlir lova, candidate milin vote kan thlak tih chiang takin a lang. Hei hi Mizoram kalphung atan hman theih ni se ramin nasa takin hma a sawn pheh theih beiseina lian tak mimal takin min siam a ni. 

MNF chuan Ward 19 awm zingah Ward 11 an la a, Ward 6 latu chu party thar ZPM an ni a, party hlun Congress-in ward pahnih an la ve bawk. Tun ṭum inthlan hi sawi thama lang ni lo mahse MNF hi ṭangrual angin a sawi theih a, ZPM aṭanga chhuak ta ZNP khan an thlawp a, PC party-in an thlawp bawk a, a hming chuan party pathum ṭang rual an ni a, mahse heng party hi an lian tham tak tak lova, HPC pawh hi MNF thawh pui sa tho an ni. Engpawhnise tun ṭumah hian party party sawi lovin mipuii vote an thlak tih a lan chian avangin Mizoram hma lam hun hi a eng zawngin a sawi theih a ni. 

Kum 2018 MLA inthlanah khan Aizawl khawpuiah hian MNF lamin bial 11 awm zingah bial 5 an la a, Pu Laldudoma bial pahnihah a tlin tak avangin Aizawl West I bial chu bye election niin MNF an chak a, MNF in bial 11 zinga bial 6 ah MLA an nei ta a ni. A bak bial panga hi ZPM chan a ni a, Congress chuan Aizawl tih hming pu bialah hian MLA an nei lo a ni. Kum 2018 ah pawh kum tawpah mai kan inthlang a, tichuan MNF in sorkarna an siam a, hmingchhiatna pakhatmah an neih hmain kum 2019 kum bulah mai Lok Sabha inthlan a awm leh a. Ṭum dang ang ni se MNF in an lak vek a rinawm tehreng nen by-election neihna bial Aizawl West I ah chuan MP inthlanah MNF-in Aizawlah hnehna an chang a, Chief Minister bialah pawh MNF hi chak zo lovin Independent candidate Pu Lalnghinglova Hmar khan vote a hmu sang ber a, Aizawlah MNF kha MP inthlanah bik kha chuan an che chhe takzet zet a ni. 

Kum 2020 a lo inher chhuak a, Local Council inthlan hun a lo ni a, inthlan hnuhnung ber result aṭanga en kha chuan MNF tan beisei tur awm awm mang lo tura ngaih theih a ni - a chhan chu MP inthlanah Aizawlah MNF khan vote an hmu chhe hle a ni. Mahse Local Council inthlanah chuan MP inthlana an bawhbeh MNF kha an rawn tho chhuak leh chiang em em khawp mai a, Sap hovin "Back with a bang" an tih ang maiin Aizawlah ro an han rel leh ta a. Aizawl khawpuia Local Council veng 83-a seat awm zawng zawng 545 ah 368 an la ta daih mai a, "MN ka sawi thei lo," tiin Aizawl a zai leh thei ta chiah a ni. MNF seat lak zat hi 67% a tling a, Local Council 83 zinga Local Council veng 71-ah  rorelna an chelh a, hei hi  85.5% lai a ni ta daih a ni. 

MLA inthlana che ṭha tak, MP inthlana che chhe zui tak MNF chu Local Council inthlanah chuan ropui takin an invawrh a, Aizawla an chet ṭhatna ber chu Local Council inthlan a ni ta a, hetia en mai hi chuan AMC inthlan lo awm leh turah chuan MNF tan bel chhunga sa a ni tawh a, an tling dawn em/ tih chu zawhna ni tawh lovin Bial engzatah nge an tlin ang? tih zawk chu inthlan hmaa zawhna a ni leh ta a ni. Inthlan result a lo chhuak a, rin lawk ang ngei ngeiin MNF chu an sorkar ta a, mahse an sorkar dan en chuan MNF ruhkawl tan chuan lawmawm lo a awm ru ta nawk mai tih a hmuh theih mai a ni. MNF tlinna hi en dang vang ni loinparty tha ni lovin candidate mimal hming ṭhatnain a ken tel a ni nual mai a, an Concillor zingah hian inthlan dawna MNF lama an sawm luh chawp mi pathum an han awm a, heng bialah hian MNF ṭha tak tak an awm loh avangin tlin loh hlauh vangin tling tura beisei TV personality ni ṭhin Pi Chuauzikpuii, Vaivakawn YMA President Pu Lalfakzuala Chenkual leh Mount Everest lawn chhuak mi hming ṭha tak Pu David Zohmangaiha te an ni. Heng mi pathumte tel lo hian MNF hi AMC ah an sorkar phak lo dawn tihna a lo ni a, MNF lam aia pawimawh chu mimal weight an tih mai, mipuiin mi ṭha an vote hi a ni. 

Congress pawh MLA ah chuan Aizawlah an nil ṭhak a, inthlan awm apianga an tla zel chungin Councillor pahnih an la nei ve. Pu Rosiamngheta leh Pi Zodingpuii te hi an bial mipuite hian Congress an nih vanga thlang ni lovin hna an thawh ṭhat avangin an thlang niin a lang tlat hi a lawmawm. Chutiang tho chuan MNF Coun­cillor tling nawnte pawh hi en ila Pi B Lalawmpuii te hi mipa pawh din theihna General Ward-ah a tlin chhan chu MNF a nih vang ni lovin Councillor ṭha tak a lo nih hmasak vang a ni a, ZPM pawh candidate an neih ṭhat naah an tling zel tiin a sawi ve theih bawk. 

AMC inthlan kan thlir let hian mipuiin party lam aiin mimal an en thiam tawh tih a lang chhuak kan ti thei a, hei hi Zoram khawvar an sawi fo ṭhin tluka lawmawm a ni.