Ngam leh ngam loh an awm

Mihring tan hian dik taka thil tih vek a har viau. Chutih rualin, thil dik lo tih hre reng chunga tih luih tlat te, a dik tih hre reng chunga tih duh loh tlatte a awm thei a; hengte hi chu mi dang tan pawmzam theih a ni lo ṭhin.

Nikum Krismas ni takah Sakawrdai leh Vaitin khuaa EFCI kohhrante chu an inkhawm a, sawrkar thupek an bawhchhiat miau avangin thupek kengkawhtute'n rang taka bawhzuiin, an hrem nghal mai a. An che rang viau; 'eh' pawh tih hmain an che a ni ber. Krismas nia inkhawmte khan sawrkar thupek an bawhchhe ngei mai a, Pathian thu erawh an bawhchhe tel lo mai thei; kan rin Pathian lakah hian an lo che ṭha zawk phian thei tlat a ni.

Hripui lêng avanga Mizorama inkhuah­khirhna hrang hrangte hi mi zawng zawngin kan zâwm kim vek lo tih a chiang a, zawm kim vek pawh har tak a ni. Krismas nia inkhawmte hrem tura an zam a ṭha lutuk  erawh kha chu thil danga an chet ṭhin dante ngaihtuahin a mak ve reng. Thil dang, a bik takin sawrkar hotute telnaa sawrkar thupek bawhchhiatna awm ve zauh zauhte erawh chu bawhzui ṭhat duh loh chu sawi loh, an bawhzui duh lo zawk ni hialin a ngaih theih.

Chief Minister, Minister leh MLA-te hovin Mamit district-a khaw ṭhenkhatah mipui an pungkhawm luai luai a, hripui laka inven leh mihring inkar hlata awm tihte chu khawi lamah a ni ringawt. Hman ni lawkah AMC inthlana chak lawmin Vanapa Hall-ah Chief Minister, Minister leh MLA rual hovin an pungkhawm leh chiam bawk a. Hengahte hian phatmarna tur a awm lo, thlalak leh video-ah a chiang takin hmuh theih a ni. Mahse, biak ina inkhawmte rang taka hremtu sawrkar kha a che duh ta tlat lo a; a mak a ná!!!

Nikum lamah khan Mamit lam aiawh Mizoram legislator pakhat, a sakhming Pu H Lalzirliana an tih chu a thurualpuite nen Phaizau khawtlangin Tut lui an humhalh chin huam chhungah bomb hmanga sangha manah puh a ni a, sangha an man lai ni awm tak thlalak pawh a darh chuai chuai kha. An puhnaah khan phatna thu emaw, dâwta inpuhna a nih thu emaw hriat tur a awm lo. Bakah, Phaizau khawtlangin pawisa chawi tura an tih cheng sing khat emaw ni pawh Phaizau MNF unit-in an chawi thute chanchin tharah kan hmu a. Chuti a nih chuan, kan MLA zahawm tak (?) Pu H. Lalzirliana te khan bomb hmangin sangha an man ngei tih hi kan pawm dan tur a ni ang.

Chutiang a nih lai leh police station-ah FIR thlenga thehluh a ni chungin Mamit bialtu MLA leh a thurualpuite chu sawrkara a mawhphurtute'n an man thu leh an hrem thu tun thlengin kan la hre ta chuang lo zu nia! Tuna Mizoram sawr­kar kal danah hi chuan, dan leh thupek bawh­chhia ṭheuh ṭheuh zingah man ngam leh man ngam loh te, man theih leh man theih lohte an awm ngei mai. Dan hnuaiah hian kan intluktlang lo a ni. Hetiang hi kan ram kal zel dan tur a nih chuan a va lungchhiatthlak dawn em! Heti hian hlim taka awmin han nui ve bâwk bâwk bawk ṭhin mah ila, kan hmabak hi a êng vak lo chu a ni.