Ar vulha eizawngte harsatna

Kum rei tawh tak aṭang khan Aizawl leh a chhehvel khuaah hian chhungkaw ṭha­hnem takin ar vulhin ei kan zawng a. Tun dinhmunah chhungkaw 1,000 chuang zetin ar vulhin ei kan zawng mek a ni. 

Kan sorkar hruaitute leh department lam hotute pawhin chaw leh saa intodelh a ṭul thu an sawi châmchî ṭhin a. Chaw leh saa intodelh hi an tum tak tak lo nge ni, keini ar vulhtute tam zawk hi chuan sorkar hruaitute hmel emaw, department-a thawktute hmel emaw kan hmu ngai lo. Ṭanpuina lah eng mah dawng lovin, keimahni thiam dan dan leh kan tha-in a tlin tawk angin kan lo kalpui ṭhin a, hlawtlin erawh a har khawp mai. 

Ar vulh hi keini Zofate thiam zawng tak a nih avang leh kan tuipui em avangin, eizawnna ṭha takah kan ngai. Harsatna hran tâwk lo ni ila arsaa intodelh hi chu kan ti thei ngeiin kan hria. Amaherawhchu, kum 4/5 kal ta vel aṭang khan, mi ṭhenkhatte'n vai ar lak luh an ching ta a. Ar tuai tak takte kan bazarah rawn phur thlengin, kan hralh theihna aia tlawmin an rawn hralh a. Bazara mite'n rate inang vekin an hralh leh si a. Keini ar vulhtute chuan hralhna hre lovin, kan eizawnna ve chu min tihchhiatsak ve chang a tam mai.

 

Tun dinhmunah phei chuan, ar phuah sa thlengin Assam leh West Bengal aṭangten an rawn phur thleng a, kan tualchhung bazarah zawrh a ni a. Keini chuan kan arsa zawrhna hi chawi tam lutuk ai chuan hlep nei lo tur pawhin kan hralh zawk ṭhin. 

Phai aṭanga ar lo kal kan el (compete) theih loh chhan chu, keini aiin ar chaw an la tlawm a, keini aiin ar notê an la tlawm bawk a. Ar thla khat leh a chanve chin hnuai lam an ei a, a la hrisel zawk bawk a. Chuta an pek sen loh, a lian lian, an hlep hlang tawh chu tlawm takin Mizoramah an rawn tawlh chho thei ta a ni. Ar lian (upa) hi hrisellohna tam tak an kai tawh ṭhin a, chu chu keini’n (Mizoram chhunga miten) kan lo duh zawk si a. 

Hetianga tual­chhunga ar vulhtute hmakhua thlirpui lova mi ṭhenkhatin vai ar la lut a, keini eizawnna min tichhia hi sorkar policy a ni ngai dawn em ni? Nge lo vât leh mai turin min duh zawk? Vawi khat tal chu Vety department-a thawktute hian keini ar vulha eizawngte hi min han tlawh chhuak ve se, kan harsatnate min sutkianpui se, sorkar aṭanga ṭanpuina awm thei ang angte pawh min dawntir ve se; keini chhungkaw rethei tak tak tan malsawmna, kan state tan saa intodelhna a nih ngei kan beisei. 

Kan tlawmngai pawl hruaitute leh zirlai hruaitute pawh hian, ram leh hnam humhalh an tuipui tak tak a nih chuan, Mizo pa eizawnna tichhia a, vai ar lak luh hi min dopui thei lom’m ni? 

Kan CM zahawm takin, 'Chaw leh saa intodelh hi kan hmalak­na pawimawh hmasa a ni,' tia a sawi ṭhin hi, keini ar vulha eizawng­te pawhin kan thlamuanpui hle a. Kan sorkar hian kan harsatnate min ngaihtuahpui chuan, kan ram intodelh policy hi tihlawhtling turin theihtawpin ṭan kan la ang. Keini ar vulha eizawngtute chu kan inpeih e.