Entreprenuership-ah ṭang la ang u

Kan sorkar hian sorkar hna vanzia hria in ṭhalaite mahni puala eizawnna dap thiam turin min fuih ṭhin a, kan Chief Minister Pu Zoramthanga ngei pawhin he thu hi a sawi fo tawh a ni. 

Hetiang taka eizawnna ngai pawimawh sorkar kan nei hi a lawmawm a, a bikin hna zawng mek ṭhalaiten mahni pual eizawnna kan dap thiam chuan state sum dinhmun pawh a lo ṭha ang a, mimal sum thawh chhuah (per capita income) pawh a lo sang chho ang a, chu chuan Mizoram sum dinhmun pawh a rawn siam ṭha thei thuai dawn a ni. 

Tunah hian sorkar hna ringawt kan zawn chuan hna nei lo kan tam tulh tulh dawn a, ram danga hna zawng thei lo leh, ram danga hna zawng ve ngam lote tan pawh mahni kutkawih eizawnna dap thiam hi a pawimawh hle a ni. 

Tin, mahni pual eizawnna dap thiam chuan sorkar hnathawk tam takin an tluk loh khawpa hna ṭha pawh hmuh chhuah tur tam tak a la awm ve zel a ni. Ram changkang leh hnam fing zawkte pawhin mahni pual eizawnna kawngah thil thar hlawk tak tak an la hmu chhuak thei zel a ni. Mizoram hi eizawnna bakah thil dang kawng tam takah ram dang kan la phak lo em em a, a ngaihna hria leh ngaihtuah peihte tan chuan eizawna ṭha leh rotling tak tak hmuh chhuah thar tur a la awm ṭeuh a, chumi hai chhuak thiam tur chuan zir san viau lam ai mahin taimak leh ngaihtuah peih a, eng hi nge kan mamawh tih dap thiam a ngai a ni. 

Minister viak ṭha tak kan nei a, Skill Development & Entrepreneurship department-ah Pu Lalchhandama Ralte kan nei a. Ani hi ṭhalaite zirlai pawl hruaitu hlui, ṭhalaite ngaihtuahna hrethiam pha a ni bawk a, mahni kutkawiha eizawnna (entreprenuership) lam tui pui phak tur a ni bawk a, sorkar hnain a daih loh ṭhalaite mahni intodelh turin ṭan i la sauh sauh ang u.