Missionary-te hi Political advantage atana hman chi an ni em?

Tun hnaiah Missionary-te thlavang hauhna tur ni awm tak, Political Party pakhat (Mizoram BJP) chuan, Missionary Cell siamin, an hmalak dan turte an tar chuai chuai a, National news paper thleng thlengin tar chhuahin a awm nghal. 

Eng vanga din nge:? Mizo­ram-ah hian BJP hi Kristianna nena inrem lo, Hindu pawl tia mipui ngaihdan awm reng mai hi nuai bo tumna leh, an Party chak nana BJP party chhung aṭang ngeia kristiante lamṭang an awm vezia tihlan tumna ni berin a lang. 

Party tharlam, ṭhang ve mek, a ṭhan chak nana hma­lakna kawng duhawm tak pawh a ni maithei, mah se heti teh hluaia hmalak chi a ni em? tih hi ngaihtuah ngun ngai tak a ni. Missionary-te tan thla­muanna a tling em? An hmalak tum dan an sawi chu, Mizoram kohhran hrang hrang leh para-church ten zoram pawn leh chhunga missionary an tirh zawng zawngte - hming, address, phone number leh email address an la khawm vek ang a, an update reng ang. 

He thu hi Times of India - July 19, '19 khan hetiang hian an tichhuak. 

BJP eyes last Northeast holdout, sets up Christian cell in Mizoram. Hluna said the missionary cell will also collect data of all Christian missionaries, including names, addresses, phone numbers and e-mail addresses, so the cell can extend help to them when required. 

Hei tak hi Missionary-te tan a thlamuanthlak tak tak ang em? Kan Missionary-te zingah FB kal tlanga RSS mi ṭhenkhatin, an phone number-te dil a, vauna titih an dawn laia chhui theiha awm an duh loh laiin, Missionary Cell-te hian hetiang record hi nei ta se, an vawng him zo ang em? 

National Paper-ah hial an thil tumte tar chhuahin a awm tawh a, RSS ho bengverh zawng tak tur a ni ngei ang. Missionary-te data collect tum an awm thu National Paper lama an lo hmuh tawh chuan, chu record chu neih tumin an za sek tawh dawn a ni. Tunah chuan media a chak nasa tawh mai si a, Missionary cell hian data an collect thei a nih a, him takin an kawlsak thei lo palh a nih vaih chuan, kan Missionary-te data chu vawrh darhin a awm thuai thei zawk a ni. 

Whatsapp Missionary group lamah chuan, "Ka data hi kan hotute lo pe ve lo se a ṭha ang" tih hi an duh dan a ni zawk bawk. Harsatna lo thleng ṭhin hi, hriat lawk loh, lo thleng thut a ni deuh zel a, RSS activist-te hi Mizoram BJP Missionary Cell hian a kal khalh hman bik chuang lo vang. 

Hetia record neih tuma hma an la tih an lo hriat hian, Mizoram aṭangin Missionary engzat chiah nge awm tihte a ti hre chak thar ngei ang. Mi mu­thlu lai kan kaihharhna hman­rua a ni zawk mah thei a ni. Harsatna hi kan tan mal­sawmna a ni thei: Kristianna hi a din tirh aṭangin, harsatna a tawk nasa a, mah se a dintu Krista a nun tlat avangin, Setana leh a hoten nuai bo tumin bei ṭhin mah se, kiam lam aiin pun lam a pan zel a, harsatna thlenna apiangah kristiante chu tih chakin an awm ṭhin. 

India ramah hian Kristianna a luhna a rei tawh, Isua zirtir Thoma te bul lo ṭan ni hiala sawi a ni. Sap Missionary-te khan, sorkar tha chakna nen Chanchin Ṭha an rawn theh darh a. Biak In ropui tak takte an din a, mah se chung Biak In tam tak chu luah lumtu awm mumal lovin, vawiinah chuan Kristianna chu a ṭhan chak lohzia kan hre tlang vek awm e. 

Kristiante hi nek sawra kan awm hian kan chak zawk a ang tlat. Chuvangin, harsatna pumpelh ngawr ngawr hi zawn chi a ni em? Rawngbawlna chep tak karah hian, rawngbawlna a nung duh zawk mah lo maw? Harsatna cho chhuah erawh chu a ṭha kher lo. 

Engpawhnise, Political Party tih chak nana Missionary-te thleng thlenga kan hmatheh ta mai hi, kan ti fuh ang em tih hi ngaihtuah tham tak a ni. Kan Politician-ten politics a hamṭhatna duh vangin, kan ram himna pawh a derthawng zawnga an kalpui tawh laia, kan Missionary-te himna pawh hi, kan politician-te avang bawkin, a derthawn phah lehzel palh ang e.