Sangha bomb phal a ni tihna em ni?

Mamit MLA Pu H Lalzirliana leh MNF party hruaitu ṭhenkhatin Phaizau khawtlang humhalh lai Tut luia sangha an bomb ngei nia lang chungchang chanchinbu, TV news leh social media lama darh chuai chuai chungchanga thil tisualtu man an la nih loh dan en hian Mizoramah hian sangha bomb hi sorkin a khap tawh lovin a phalsak a ni tihna angah kan ngai thei tlat a ni. 

MNF hian MNF MLA ni chung hian huaisen takin han hrem rup mai se, Pu Lalduhoma angin a MLA nihna an hlih sak ve em loh pawhin eng case emaw han siam sak ve rup mai se, chumi hnuah court-ah Pu Zira hi han kal se judgement an siam hnuah thiam lohna nei lo tiin han chhuak leh then mai se MNF tan chuan hmingchhiatna awm lovin mahni MLA pawh thubuai siam sak ngam an ni mai dawn a. Pu Zira pawh thiam lohna nei lo a nih chuan mipui hma­ah chuan 'thiam chantir' tiin sawi leh mai tur a nih laiin a reh vang vang hi chu mipui zahlohna lam a tling ve tlat a ni. 

Zep thu a cheng lova sangha bomb hi chu tunah pawh hian Mizoramah hian nasa taka kal pui mek a ni a, Pu Zira te hi an sual vang pawh a ni lova, Mizo pa tam takin an tih ve ang thovin sangha an bomb a ni mai a, MLA a nih avangin a mual­pho ta mai mai a ni. 

He thu ziak i chhiar lai ngei pawh hian Mizoram khawi lui luiah emaw chuan sangha hi an bomb ngeiin a rinawm, sangha bomb hi thil sual thuk lutuka sawi tur pawh a ni lova, Mizo pa thil nuam tih tak a ti ve kha a ni mai a, amah hi chhan tur tihna lam ni lovin sangha bomb hrim hrim hi chu sual lian tham a ni tlat lo. 

MNF tih sual ta zawk chu sangha bomb hi khawtlang humhalh lai a lo ni si a, chumi hma lawkin Pu lalduhoma chu tih sual a neih vang ni lovin "Independent MLA a ni chungin ZPM Party Office ah thu a sawi, ZPM ah mi a lawm lut" tih te kha MLA aṭanga an paih chhan a ni a. An ṭanchhan chu dan kenkawh duh vang, dan ngaih pawimawh vang tiin an lo sawi laklawh tawh si a, sangha an bomb avanga khawtlang hnena pawisa chawi thlap MLA hi dan anga hrem hi mipuiin an phut a ni. 

MNF hi an tlanchia a nih chuan Serchhip MLA By-Election thleng hian a nghawng ve thei tlat lovang maw?