Smuggling lama rinhlelhte hi

Tunlai chu What­sapp Group titina lamah Khehpuam duh lohna sawi chhuah a ni ṭhin a, chu titina kal zelah chuan Mizorama kan mi hausa lian ṭhenkhat hi khehpuam vanga hausa niin an sawi kai ta tlat mai le. An sawi zel dan chuan khehpuam hi mipui nawlpuiin an hriat hmain tuna kan milian ṭhenkhat hian an lo khawih tawh angin an sawi ta hial a ni. Ka ngaihtuah neuh neuh a, he ram hmabak hi eng chiah nge? tih hi rilruah a awm reng a ni.

Tunlai hian a inti hre deuhte chuan, “Chu mite pawh chu an ni a, tunhnaiah anni hi an lar thar riauva an eizawnna bul ṭan dante hi hriatthiam phak bak a ni a. An chhungkua hi kan hriat chian an ni bawk si a, tun hmain engmah han chhuan tur leh belh tur an nei si lova. Tuna kum hnih thum chhunga heti taka an lian hi chu khehpuam vanga puh loh theih loh a ni,” an han ti a. An dawr hming list panga vel an han dah diat diat a, keini lam chuan, “Alo ni maw!” tih bak hi sawi tur kan hre ve lo. 

An han sawi zui tak tak mai chu kan politician-te hming thlengin an sawi a, political party pawhin hrerengin an pawm tho an tia lawm. A sawitute hi an han inti hrechiang em em mai bawk si a, engtia han tih chi nge maw ni dawn le? tih zawhna inzawh mai loh chu sawi zui tur a vang a ni.

Veng pakhata khehpuama rinhlelh chuan an veng YMA hruaitute a be thiam lutuk an ti a, a tira amah chhui duhtute pawh a lam ṭangah a siam an tia lawm. Politician tam takin inthlan dawnah khan khehpuama inti hausate pawisa hi an dawng an ti tlat bawk a, khehpuam star-ho hian politician-te hi pawisa an lo pe ṭhin a ni awm a, chu chu a document awm kher lo mah se an sawi chiang thei bawk si.

Silai leh rangkachak hmanga sum siam hi an awm nual bawk an ti a, hengho hi an hausa tawntaw tawh tih an sawi bawk a. Tun hmaa silai leh rangkachak tawlh ru ṭhin Mizo pa pakhat chu Mizorama mi hausa list-ah a ziah luh theih ang, an la ti ta deuh deuh a. An sawia lungchhiat thlak bera ka ngaih chu Police leh Excise hnathawktu zingah meuh pawh hausa an awm a, zahpuiawm khawpa lian in sate an awm a, Zokhawthar leh Champhai lama an awm hnua hausa thur thurte an awm an ti.

Aw, Zoram, i harh chhuah loh chuan smuggler paradise i ni mai dawn a sin.