Lammual chei dan tur

Assam Rifles chuan Ministry of  Home Affairs thu an hmuh hun hunah Lammuala an awmna hi an chhuahsan dawn tih a chiang tawh a, hei vang hian an chhuah hun tur inrin siaka politics khel mai mai lovin an chhuah huna an hmun awl chei dan tur hi mahni dream ang ang thawh khawm ve ila. Politics thila inhnial luih luih ai chuan ram tan a ṭhatna chin a awm tam zawk ka ring. 

Assam Rifles hi chu sorkar laipui lam mi leh sa an nih tawh avangin Pu Hawla leh Pu Zorama te sawn chhuah mai mai theih an ni lo. Khu lamin, "Le, an awmna tur pawh kan sa zo tawh bawka an chhuah phei a hun tawh e," an tih hunah chiah chhuak thei an ni. Chapchar Kut a kutben hum humna tura kan hotupa meuhvin a puan pawhin an chhuah duh miah loh chhan kha chu state thuneihna hnuaia awm ni lovin MHA hnuaia awm an nih avangin an thu hmu lo chuan chhuak thei pawh an ni tlat lo a ni. 

Lammual hmun hi an chhuah san a nih chuan sorkar hian a zavaiin han humhalh hmasa phawt se a pawimawh ber phawt a ni. Chumi ruala pawimawh dang leh chu Lammual mawng lam Bethlehem Veng leh Tuithiang chung lamah hian ram buai neuh neuh a awm tlat mai a, hei hi chinfen a nih loh vaih chuan a LSC neitute hi court-ah an kal ang a, court a thlen tawh chinah chuan Congress leh MNF sorkar pawh ni se, BJP leh ZPM pawh sorkar se a kal chak theih tawh lova, sorkar tan inrinna tur huna  duh leh dawn bawk si a, court thleng lova ramri chin fel hmasak a pawimawh dawn hle a ni. 

A pawimawh dang leh chu thing phun runpui neih a ni leh dawn a, heng ramah hian thing han ding thelh ṭhuau mai se a nuam nghal mai ang. Chumi ni lova 'building' an sa sup sup a nih vaih chuan a pawi dawn a ni. 

Sorkar office pakhatmah sak ni lo se, kawngpui kan mamawh avangin veng hnuai lam aṭanga main road pawhna remchang siam chu ka support thei a, hei bak hi 'construction' lam hawi reng reng chu tih loh ni se. 

Project siama building sakna tur hai chhuak thiam deuh deuh kan sorkar hian nei mahse Lam­mual hmun lovah hai chhuak rawh se. He Aizawl khawpui lai hi chu engmah construction siam lovin humhalh se, Lammual a nih angin inkhelhna leh pui­punna hmuna hman theihin han siam danglam hret bawk se a tawk der mai. 

Building saa sum siamna hmanga chei a ngai lo, space tam tak zuaha thingphun hi a chei dan ṭha ber chu a ni mai.