SIKUL ṬAN HMA HI MAW...

Tu pawi mah sawi lo hian eng kawng pawh zawh tum ṭhin teh mah ila, pa khirh­khiap deuh leh nu phunchiar deuh tawn fuh chang a awm ve fo ṭhin a nia. 

Sikul ṭan hma chungchang pawh hi chanchinbu kal tlangin ngaihdan hrang hrang an rawn puang tawh hlawm a. Pu PLa rawn tarlan ṭhin dan pawh hi a thlirna tlang 

aṭang chuan a dik ang. Khawtlanga cheng mipuite leh Sikul-in remchang a tih ang zulzuia school timing ruahmanna siam mai pawh hi a finthlak zawk mai thei. 

Kum 30 chuang sikulah ka lo thawk ve tawh a, eng hunah pawh school ṭan ila harsatna ka nei ngai lo. Rokhawlhna lian tak ka tawk a nih loh chuan sikul tan hma minute 5-15 ah sikul thlen hman ka tum ṭhin. Hotute thua dah hi a finthlak hlein ka hre ve ṭhin. 

Mahse sorkarin school timing a rawn tih danglam hma khan ka thawhna sikul ṭhen­khatah chuan nipui lai khaw lum em em hunah chuan chhun dar 12:00 noon aṭanga dar tlai 2:00 PM inkarah hian a tlangpuiin khua a lum a. Naupang tan sikul chhunga in up beh reng hi a hreawm a, lehkha zir pawh a huphurhawm a. A uap lumin harsatna hrang hrang a awm ṭhin avangin zir dar 6:00 ahte sikul kan ṭan hun a awm ve fo. 

Thlasik nat zual kumah chuan naupang thawmhnaw lum in bel tur ṭha nei lo tana khur beuh beuh chunga zing khaw vawta sikul daia han ṭhut reng chu a hreawm deuh ṭhin avangin zing 9:30am-ah te sikul han ṭan chang a awm leh - a chhan chu sikul naupang kan fate, tlin tawk leh phak ang tawk zela kan kal chhoh pui hi a fin thlakin a zahawm a. Naupang tan harsa leh hreawm ti ngawih ngawih khawpa kan duh kan maka kan kal pui ngawt hi naupang dikna chanvo kan rah beh sakin an tan khawvel thim tak kan chhawp sak a ni ringawt mai - a pawi tak zet a ni. 

Naupang dinhmun hi a inchen lo hlawm hle. Chhungkaw harsa tak aṭanga lo kal, silhfen ṭha in bel tur nei zo lo, thlasik khaw vawt pawh huphurh ngawi ngawih an awm laiin, a ṭhen chuan an fate a lum ṭha ṭha bel thei leh eiin theiin an siam thei thung. Chuvangin, naupang hi kan dah pawimawh ber fo hi thil finthlak a ni ngei ang. 

Zing thawh hma hi mi zawng zawng tan thil ṭha a nih laiin sikul ṭan hma hi mi zawng zawng tan a ṭha ber chuang lo. Sikul ṭan hma ṭha hrim hrima kan ngai dawn a nih chuan office pawh hi ṭan hma a ṭha ve chek ang le! Zing thawh hma kan duh a, tlai lam hun awl tam kan duh a nih ngat chuan zing 6:00amah sikul leh office han ṭan ila hna thawhna hun chu kan ngah ngawt ang le! 

A nih loh vek pawhin tlai lamah hun­awl kan ngah ang a, hmang ṭangkai thiam tan chuan a van zia dawn tak em, a thiam lo tan erawh zu in nan hun an ngah hle ang! 

Sikul timing chung changah pawh hian sikul naupangte kan dah pawimawh hma­sak a, chumi hnuah chuan sikul naupang enkawltu nu leh pate dinhmun kan ngaih pawimawh leh a ngai. Sikula nitina thawktu zirtirtute leh khawtlang mipuite zawh tawk kan thlir thiampui pawh a fin thlak ngawt ang le.