CAB duh lo tan BJP hransan a hun ta

India Hmar Chhak mipuiin kan ram leh sakhaw tana him lo tur Citizenship Ammendment Bill (CAB) chu kan duh loh avangin ṭang rual takin kan dova. BJP-in Lok Sabha lama an pass hnuah Rajya Sabha lamah an pu lut ngam ta lo. Kan lawmna kutbeng thawm a reh hmain BJP President chuan Northeast mite min tham lo takin, Assam state chhungah ngei Lakhimpur-ah, “Lok Sabha-ah BJP a sorkar leh chuan CAB hi kan thar thawh leh tho ang,” a ti siah siah mai.

Hengho hian Hmar Chhak mite hi engah mah min ngai lo. 

Mizoram BJP President khan CAB hi an tih tlang chuan ban an inhuam thu a sawi kha a huaisen ka tiin zahna chibai buk tlak a ni. MNF President-in a ṭul chuan NDA leh NEDA an thlawpna inhnuhdawh thlenga an ngaihtuh tur thu a zinna hmun pakhatah a sawi kha a ropui bawk a ni. 

Tunah chuan Lok Sabha inthlana BJP an tlin chuan CAB hi an thar thawh leh dawn tih a chiang tawh a, Mizoramah BJP a lo awm ve zel hi a ngai tawh lova, MNF pawhin Mizo mipui aiawh an nih tak tak chuan NDA leh NEDA an chhuahsan a ngai. 

Kan hma lawkah Lok Sabha MP tur kan thlang dawn a, Mizoram aṭanga BJP thlawp tum, kan hlauh leh huat rawn CAB pass tumtu thawhpui tum tlat mai MP candidate neih phal loh ni se, CAB thlawptu lama ṭan hi Mizo leh Kristian dik tak tan chuan thil theih a ni lo.