22222 REVOLUTION IN MYANMAR

A thupuiah sap ṭawng hman inthlahrung lo mai teh ang. Khawchhak lama unaute (Myanmar) sipai sawrkar laka an lungawilohna lantirna chuan zuai leh chuai lam aiin pun leh vûn lam a pan zel a, a rei telh telh a, an nghet telh telh a, an inhlawm ruh telh telh emaw tih tur a ni. Khawvelin an nghinhmang a thlir ṭhuap a ni tih hre rengin, an tu leh fate tana zalenna famkim a awm theihna turin ṭhahnemngai takin mittui nen an au mêk a ni. 

Mipui pungkhawm chuan khawvel mittui a ko chhuak a, an zingah chuan mitdel, kebai, bengngawng, tawngtheilo te pawh pawh eng vangin nge an lo punkhawm ve? Zalenna dâr vuak a nih theihna turin a aw râwl tâwpin an au a. Sipai lalte beng thleng ngei turin an aw an sûm lo. Pitar, putar, nau pawm te leh mi zawng zawng tih theih deuhthaw chuan thei leh thei lovin an kut zungṭang pathum tipirin chunglamah an phâr chhuak a, chu chu sipai sawrkar an duhlohna entirna (symbol/ sign) a ni. 

Tichuan, February ni 22 khan sipai sawrkar an duh lohzia leh dodalna entirna '22222 Revolution' an tih mai chu an han entir ta tak tak mai a le, mihring a maka maka tam an pungkhawm a, Myanmar khawpui chu zalen châka tuihalin a nghing dual dual mai a nih chu! He '22222 Revolution' an tihna chhan hi kum 1988 August ni 8 khan Myanmar sipai sawrkar chuan mipui laka dodalna nasa ber a tawk a. Mipuiin sipai sawrkar an duh lohzia nasa takin an lantir a, hemi ṭuma an dodalna lantir hi '8888 (Aug ni 8, 1988)' tiin a hminglem an vuah a. Hemi ṭum hian sipai sawrkarin mipui chungah nasa takin kut a thlak a, mi za tam tak a tihlum a, niminah khan chumi hriatrengna ni pah fawmin mipuite hian sipai sawrkar hi an duh lo takzet tawh a ni tih lantir nan '22222 Revolution' hming vuahin sipai sawrkar duhlohna hi an lantir leh ta a ni. 

Thompson Chau-a, tualchhung chanchinbu Editor-in BBC a hrilh danin, February ni 22 a mipui pungkhawm ang hi an ram history-ah hetiang taka tam an la pungkhawm ngai lo tih a hrilh a. Mi zawng zawngin an dâwr an khar a, tumah hnathawk an awm lo va, sawrkar hnathawk zawng zawng pawhin office kal bik lovin an châwl thuap mai a ni a ti.

He dodalna puitham tak hian khawvel a nghawr nghing a, khawvel ram hrang hrangte chuan sipai sawrkar chu mipui hnena thuneihna pe lêt leh turin an au nghal a. UN Secretary General António Guterres chuan, "Sipai sawrkar chu an thiltih lai titawp nghal turin ka ngen a. An mitângte chhuah a, mihring dikna zah sak turin leh mipui duhdan tipuitlinga inthlanna buatsaih leh turin ka ngen a ni" a ti. 

European Union pawhin Thawhṭannia Myanmar mipui lungawi lohna lantir chu thlawpin Myanmar ram hruaitute chu mipuite ngenna ti hlawhlting turin an ngen nghal bawk. US pawh a ngai bik lo, sipaiin pawisawi lo chunga kut an thlak chu an dem thu an puang bawk. 

Myanmar mipuite hi an khawngaih­thlak takzet a, nitin lungawilohna lantirin an hun an la hmang a, tunah hian kar thum lai a ni ta. Chau mahse an zalenna tur atan chuan an thisen far tawp thlenga beih inhuamin hma lam an pan a. Pitar putar hmelah te chuan hmân ang khan zâm hmel leh hlau hmel a awm tawh lo, zalenna chu an thisena lei a ngai a nih pawhin lei turin an inphal reng a ni. 

An hotunu leh mipui rorelna tung­dingtu Aung San Suu Kyi-i chu chhuah turin an ngen reng a, an ramin zalenna kâwl eng a hmuh theih nan hmeichhia, naupang thlengin ṭhahnem­ngai takin an bei mek a. Kristian pawl zawng zawngte chuan bawkkhupin Vân Pathian an au a, Buddhist puithiamte pawhin an pathiante au in an ramin zalenna an hmuh thuai theihna tur leh boruak muanawm a awm thuai theihna turin bâng lovin an ṭawngṭai bawk. Zalenna man hi a va tam em! 

Zoramah muangleia kan mut chawlh dêr dêr laiin kan chhak lawka kan unaute khi tunah zalenna ngiatin thih hlauhawmna hmunah an awm mek a ni. Vawikhat tal chu Myanmar ram zalenna atan hian lo ṭawngṭai ve ta che.