Vote thlak tam a fair ber ang

Serchhip bial mipui chungah Mizoram mit a fu ta ṭhup a, Serchhip bial mipuite hian kum 2018-a MLA atana an thlan tlin Pu Lalduhoma kha an la duh nawn leh dawn nge? Congress candidate Serchhip bial mi Pu PC Laltlansanga an duh tawh zawk dawn nge? MNF Vice president Pu Vanlalzawma an duh thar zawk dawn? tih hi Mizo­ram mipuiin an thlir ṭhup lai hian vote tlemtea tlak lohna turin vote nei zawng zawngin han thlak chhin se thil awm dan hmuh a chakawm a ni. 

Serchhip hi chu Congress bial him a ni an ti ṭhin a, Pu Lal Thanhawla a dam chhung chu a tling mai dawn an tih ṭhin kha a ni. Kum 2018 khan ZPM chuan an candidate atan Pu Lalduhoma an dah a, Pu Duhoma kha Aizawl West I lamah ZPM hminga a din tho avangin Serchhip lama an din tir chhan kha vote ti darh tur tiin an sawisel a. MNF candidate Pu C Lalramzauva vote tidarha Pu Hawla bawk a tlin lehna tura thil play mai mai anga sawi ni mahse Pu Duhoma zawk chuan Pu Hawla chu a hneh ta daih a, MNF phei chu an lang phak ta lo a ni.

Inthlan hmasaah khan Pu Duhoma khan vote 5481 a hmu a, Pu Hawla khan vote 5071 a hmu ve bawk a, Pu Ramzauva khan vote 4313 a hmu a ni. Pu Zaichhawna Hlawndo khan Zoramthar hminga dingin vote 278 a hmu a, BJP pawhin vote 211 an hmu bawk a ni tih kan la hre ṭheuh awm e. 

Inthlan hmasaah hi chuan tunge sor­kar dawn a la hriat miah lova, chu­vangin khi tehna khi tun by election lo awm turah hi chuan tehna atan a hman theih tawh dawn miah lo tih a chiang ta viau a ni. 

Chuti a nih si chuan eng hmangin nge kan teh tak ang le? tih zawhna a lo awm ta a, chu chu a chhanna chu "Mipui duhthlanna hmangin" tih a ni tawp mai. Chu mipui chu voter zawng zawnga 60% lek ni lo, 70% lek pawh ni lova 80% tal an nih theihna turin mi zawng zawngin ṭan han la tak tak se. 

Party hrang hrang candidate zingah hian tute hi nge an duh ber tih hi hriat a chakawm tawh a ni, vote hi tla tam se inthlan hi chu a fair ber ang.