IAS hna bansan chhan tur

Kan Chief Minister thusawi nia an sawi Whatsapp lama mi kha ka lo hmu ve a, fiamthu a ni emaw ka tihlaiin chanchinbu lamahte kan han hmu zui a, IAS pawhin an hna an bansan phah duha rinna kha mau leh rua a sawi mawi tumna a ni a. IAS a sawi nep tumna a ni lo chungin tun hma politician style anga thu uar lutuk hi chu kan zavaia kan kalsan hi a hun ta a ni.

Thlam aṭanga UNO be pawp thei angin kan lo insawi tawh an ti a, changel awm mai maite kan ṭahpui deuhthaw tawh an ti a, thlawhtheihna thlawk pawh mahni lam ṭang angin an chhuah thiam te an ti lehzel a, khatih hunlai khan mipui tan eng information mah dawn phak a ni lova, chanchinbu a la mumal loh bakah TV ni se Doordharshan bak kha kan hmu phak dawn si lo a, TV pawh chu kan la neih loh hmel a, radio kha kan innghahna a nih lai a nih hmel a, duh duh sawi ila mipui chuan an awih thei zelin a rinawm tlat a ni.

Tunah chuan Mizoram hi India mai ni lo khawvel nen kan inzawm tawh a ni. News chi hrang hrang tharlam ber ber hi khawvel hmuh rualin TV leh internet aṭangin kan hmu tawh. Mizoram kilkhawr bera awmte pawhin an phone hmangin chanchin tharlam ber ber an hmu ve ta. Kan phone leh computer kaltlangin khawvel thil awm dan hi English kan thiam chuan kan hmu thei bawk a ni. 

Hetiang khawvel zim taka kan chen tawh hnu hi chuan thil hi uar uchuak taka sawi loh a ṭha a ni. Kan ṭhenawmah Assam a awm a, he state hi India rama mau leh rua thar chhuak hnem ber an ti a, he state-ah pawh hian IAS chu sawi loh sorkar hna lian dang thawk rua avanga hna bansan an la awm kher lo thei a, IAS hna bansanna tur khawp hian mau leh rua hi kan thar thei meuh dawn em ni le? IAS hlawh hi a ṭhat bakah a nihna ken tel hi a ropui si a, central service dang pawh ni lo IAS te hial pawhin an hna an bansan duhna tura rua leh mau sawi mawi hi chu thu uar lutuk, a ni a. Tun hma ang kha chu ni se a pawm dan dan a la awm mai thei a, tunah chuan ṭhangtharte hian thudik leh dik lo, thil ni thei leh thei lo tihte leh thil awmze nei leh nei lote hi an hre hrang tawh a ni. IAS hna bansan chhan tur hi kuthnathawh lamah kher chuan hriat tur a la vang hrilh khawp mai, a ram pum huap pawhin han zawng ila.