Ruihhlo kan do dan thlak a ngai tawh em?

Tunhnai khan National AIDS Control Organization (NACO) leh Ministry of Social Justice & Empowerment (MSJE) te buatsaih, ‘High Level Interdepartmental Meeting on Drug Use and HIV,’ New Delhi a neihah ka tel ve a. Hetiang ang level meeting hi a hmain vawi hnih lai ka lo tel tawh a. MSJE hnuaia National Institute of Social Defence (NISD) hmalakna, AIIMS nena India ram puma ruihhlo hmansual chungchang zirchianna an neih report chu an chhawp chhuak a. Chumi report aṭanga a lan dan chuan zu hman sual chungchangah India average (14.6%) aiin kan hniam daih mai a (7.8%), North East-ah phei chuan Meghalaya chiah kan hnuaiah an awm. 

Chutihlaiin trip/ ganja hmansual lamah erawh a sang lamah parukna (3.2%) kan ni. India average hi 1.2% a ni thung. Opioid drugs kan tih mai zinga hmansual nasat ber heroin hmangsual phei chu India ram average 0.70% a nih laiin Mizoram kan sang ta ber a, 6.90% kan ni dawrh mai. (Internet-ah a download theih - Magnitude of Substance Use in India 2019). Ruihhlo, a bikin drugs, chutah pawh heroin hman sual leh ngawl vei (an research ṭawngkam hman danah tak phei chuan Quantum of Work) lama Mizoram kan sang ber hi a veiawm hle mai. Ruihhlo vanga kan buaina hi a rei tawh hle a, 1980 chho aṭang khan kan buaipui a, tuna a landanah chuan buaina benvawn (endemic problem) a ni ta ber e. Engatinge heti taka ruihhlo vanga kan buai tih hi a chhan a tam thei awm e. Ruihhlo siam chhuahna hmun pui ber Golden Triangle kan hnaih vang leh heroin tawlhna kalkawng pui kan nih vang te hi a ni pakhat thei; ruihhlo a tam a, a tlawm bawk si chuan ruihhloin a tihbuai chu kan tam lo thei lo. 

Kan hriat tur chu supply tam tur chuan a mamawhna demand a sang tihna a ni bawk. Kan naupang leh ṭhalaite ruihhlo ṭhat lohna kan zirtir tam tawk lo a ni thei a, kan khawtlang kalphung leh inrelbawl dan a fel tawk lo a ni thei bawk. Ruihhlo-a sumdawnna hi a hlawk em a, kan dang chat thei lo a ni ber. Chuvangin, demand awm tlem mah se a supply-tute hian demand an siam chawp thei bawk. Chumi tichiangtu chu tunhnai street peddler (khawlaia ruihhlo zuar) te hian a ti ve ngai lo naupang zawkte a thlawna pek an ching thar hi a ni. 

Ruihhlo hman sual hian ken tel a nei tam khawp mai a, chu chu Comorbidities an ti. Hriselna a khawih pawi te, sum leh pai lam tlakranna a thlen dan te, khawtlang ralmuan lohna a thlen te, dan palzutna leh khawtlang pawi khawihna a thlen te hi a tam hle. Ruihhlo inchiu an chin vanga hri ṭha lo darh nasat dan te hi chhui chian a ngai hle. HIV & AIDS tam lamah India ramah kan sang ber a, Hepatitis C hi tuna a lan danah chuan ruihhlo inchiu ṭhinte zinga 80-90% lai hian an pai a, ruihhlo ti ve lo zingah a darh ṭan mek bawk (HIV ang tho-in). Kan ramah ruihhlo ngawlveite enkawlna a awm nual a, mah se a mamawhtute mamawhna a phuhruk zo lo nasa hle. Jail lam nise engtiklai pawhin 40-50% vel hi ruihhlo leh a kaihhnawih vanga tang an ni. 

Ruihhlo ngawlveite enkawl nana sum leh pai, tha leh tui kan sen hi a tam tawh hle mai. Chutihlaiin kar kal ta mai khan kan CM hovin CYMA lamin ruihhlo an man ṭhahnem tak mai an halral thu kan hmu leh bawk. Kan in man reng a, ruihhlo tite lahin an mamawh zat an sum neih dan azirin lei tur an hmu reng bawk. Sorkar kuta innghat ngawt chi chu kan ni lo hle tih a hriat; Excise & Narcotic Dept hian an veng zo lo tih a hriat reng. Drugs supply reduction lama kan hmalakna hi tha thlah chi a ni lo, theihtawp kan chhuah zel tur a ni. Drugs hmanga sumdawngte hi an in upgrade chak hle a, a dotute lam pawh kan system leh opera­tional guidelines kan upgrade ve zung zung a ṭul thei ang. Tun hmaa drugs tawlh ṭhinte kha tunah chuan an in organize ṭha ta hle a, man an tawh pawha ‘aiawh jail tang’ tur nen lam an intodelh tawh a ni. Narcotic Control Bureau (NCB) in tracking system an hman te pawh hi zirchian a chi hle ang. Chutiang bawkin ruihhlo vanga hri ṭha lo darh zel tur venna lama hmalakna MSACS-in a kalpui mek (harm reduction) hi mipuiin kan support a ṭul hle bawk. MSACS thawhpui NGO te hmalakna hi a pawimawh em em a, khawtlang hriselna a hril a ni. Chuvangin, khawtlang tlawmngai pawl leh kohhran te nena thawhhona ṭha a awm phawt chuan an hnathawh a chak ngei ang. 

Demand reduction (mamawh tih tlem) lama hmalakna lai tak hi mipui tam zawkin kan la hriatthiam tawk loh, pawimawh em em si a ni. Ruihhlo ngawlveina hi thluak natna benvawn lang chhuak leh ṭhin (chronic relapsing brain disorder) a ni a, chu chu khawvel mithiam zawk te pawm dan pawh a ni. A enkawl danah pawh mithiam zawkten guidelines an siam hi a theih chin chinah kan zawm ve zel a pawimawh hle. Drug dependence treatment hi damdawi hmanga enkawlte (pharmaco therapy), nungchang thlak danglam zawnga enkawlte (behavioural therapy), rilru lam buatsaih zawnga enkawl (psycho therapy) te a mamawh vek a, a enga mah hi lak pen a, a mala result ṭha nei thei a ni lo. Chuti chung chung chuan natna enkawl kawnga success rate nei chhe ber pawh a la ni reng. 

Sakhaw dang betute pawh hian an buaipui ve viau mai a, Buddhist ho te pawh hian an monastery-ah ruihhlo ngawlvei an enkawl ve fo mai. Chain-in an thlung bet a, an hel tir hial ṭhin. Mahse an hlawhtlinna erawh a chau ve viau tho. Ruihhlo kan hman sual common ber heroin hi opioid drugs a ni a, chumi ngawl veite enkawlna atana damdawi him zawk hmanga treatment - Opioid Substitution Treatment (OST) hi enkawl dan ṭha em em mai a ni. Damdawi man to tak a ni a, an taksaa damdawi chambang ṭhuah faina atan a hman theih (Detoxification treatment) a ni. He damdawi Buprenorphine hmang hian Detox hnuah Maintenance treatment a pek leh theih bawk. Ruihhlo an nghei vanga chiri (withdrawals) hrehawm tak takte a control a, a nih dan tur ang taka hman a nih chuan a ṭha em em a ni. Vanneihthlak takin AIDS Control program hnuaiah MSACS hian NGO leh Govt Hospital behchhanin he OST damdawi hi a mamawh te tan a thlawnin a pe a, mi tam takin he treatment hmang hian hma an sawn mek bawk. 

Rehab Home lamah erawh MSJE hnuai an nih avangin he OST damdawi hi an dawng ve lova, chu tak chu a tira kan rawn tarlan NACO leh MSJE thawhhona hian rawn thuam ṭhat a tum tur zinga mi chu a ni a, a lawmawm em em chhan a ni bawk. Ruihhlo ngawlvei enkawl kawngah hian Detox leh Maintenance treatment te hi hmun khatah chuan an pe kawp fo mai. Rehab Home tam zawk hian chutiang chu an kalpui dan a ni. Mahse Behavioural leh Psychotherapy te pe tel tur hi chuan mithiam, a bik takin qualified medical professional (Psychiatrist) leh counselor (Clinical Psychology) te a mamawh a, chu tak chu Rehab Home lama kan tlakchham a ni. Hetiang service a awm loh chuan khung khawm ngawt mah ila, an lo chhuah hnuah a tam ber chu an nun ngaiah bawk an let leh mai ṭhin. Heng treatment bakah hian after-care treatment a la pawimawh lehzel. 

Nunphung pangngaia an let leh theihna tura enkawlna an dawn a pawimawh a, eizawnna ngaihtuah pui te pawh a ṭul tel khawp mai. Heng zawng zawng service pe tur hian a thawktu lam an indaih viau a ṭul a, Home enkawl hi a hautak viau si a ni. Facebook leh news ṭhenkhatah kan sorkarin Social Rehabilitation Board a din thu leh, ruihhlo ngawlvei enkawlna a ngaih pawimawh thu te, Seṭhawn lamah enkawlna hmun changkang tak din an tum thute ka lo chhiar a. He board hian hma a lak dan turah ram changkang zawkten an kalpui dan te zirchiang hmasa se, Central sorkar hmalak tum dan te pawh hi ngaihven se. Ruahmanna fel tak nen ruihhlo kan do dan tur hi duang se ka ti hle mai. Kan hmalak tawh dan te zirchian a, kan hlawhtlin leh hlawhchhamna laite en fiah nise, ṭha zawka hma kan lak theih dan tur a duan chhuah theih ngei ka ring. 

Ruihhlo kan do dan kalphungah hian pawimawhna nei - Dept. hrang hrang (Home, Social Welfare, Health) leh NGO te ṭang tlang ṭhapa an thawhho a pawi­mawh hle dawn a ni. Ruihhlo la ti ve lo te ven him (prevention) kawngah pawh Education Dept lam leh Kohhrante an pawimawh hle bawk ang. Hemi kawngah hian nasa zawka hma kan lak a ṭul hle. Kan sawrkarin ruihhlo vanga kan buaina a ngai pawimawh hi lawmawm ka ti hle a, 

ṭhahnemngaih thuhlaah ka han ziak a ni.